AYUBU 31
31
Ayubu ogendererete gokwana
1“Inche nakorire okobwatana kw’ogotianania namaiso aane
ng’a tinkorigereria omoiseke omwekungi ase okomogania.
2Naki rende egetari kiane gekorwa ase Nyasae o igoro kerabe?
Na omwando one okorwa ase Omonguru ore igoro, naki orabe?
3Inee! Emechando teri konyora abatari abanyaboronge,
na ogosirigwa gwachera abagokora ebibe?
4Inee! Nyasae tarochi chinchera chiane chionsi
na kobara amatambokero aane onsi?”
5“Inee! Nabeire ngotaara ase chinchera chi’obong’ainereria,
gose amagoro aane naminyokeire ay’oborimo?
6Tiga ndengwe ase ekerengo ekeronge,
na Nyasae amanye oboikeranu bwane.
7Onye nagobeire korwa ase enchera,
na enkoro yane yabeire ekobwatia okogania kw’amaiso aane,
na onye komocha konde kwabwatereire amaboko aane,
8rirorio inche nsimeke endagera, na omonto omoao ayeire,
na kende gionsi kiane keramere gesimorwe.”
9“Onye omoyo one obeire okoebererigwa na gwancha omokungu omoao,
na igo nabeire nkoboera omonto onde ase egesieri kiaye imosirie,
10rirorio tiga omokungu one abe ogosera omonto omoao obosie,
naende abasacha bande babe bakoba nere.
11Okwo nigo kware koba ogosaria okobe mono goetania,
na kware koegwa egesusuro nabagambi ebina bonsi.
12Boigo nigo kware koba omorero ogosamba gochia aase ay’ogosiria
na koria ebinto biane bionsi kobikoora.”
13“Inse kwanga koroisia amang’ana ’omosomba one, omosacha gose omokungu,
ekero baremurunganie igoro yane,
14ninki ndakore ekero Nyasae aranyimokere?
Ninki ndamoiranerie ekero arabe okorua egesusuro ki’ebibe biane?
15Inee! Oyio ontongete ase enda ya baba, tari ere otongete oyio boigo?
Tari ere oyomo otobombete ase enda ime?”
16“Inche tinarinete omotaka egento aganetie,
gose tinatigete omoboraka kwerusia moyo;
17tinarenge koria endagera yane inche bweka,
nigo naete nentakana nero, ekayeria.
18Oyio inche nabete ise korwa obosae bwaye,
na korwa okoiborwa kwaye nkaba nkomorera na komoraa.”
19“Inee! Monto onde nare ochandegete ase okoborwa chianga,
gose omotaka otabwati ekiebisio, ntakonyete?
20Barabwo nigo bansesenetie,
ekiagera nabaete chingobo chi’amarionya e ching’ondi chikorwa ase amaicho aane.”
21“Onye nakorerete entakana bobe
ekiagera namanyete ng’a ekegambero agwo ase egeita ngenkonye,
22rirorio tiga amareko aane ongoke agwe inse,
ne chinengo chi’amaboko aane chinsomoke.
23Nigo nare kocha kwoboigwa nemechando korwa ase Nyasae;
na tinare konyara gotenena bosio bw’obonene bwaye.”
24“Tinasemeretie etahabu,
nonya netahabu echenire;
25tinagokerete gose gochengera obotenenku bwane obonge,
gose ebinto nenyorerete namaboko aane.
26Tinarigereretie erioba ekero riabarete,
gose omotienyi ekero omesete,
27goika enkoro yane ekaebererigwa bobisi ase okobisasima,
gose tinanyunyuntete okoboko kwane ase okobisika.
28Onye nakorete ayio nigo nare koegwa egesusuro nabagambi ebina,
ekiagera ayio nokomokana Nyasae ore igoro.”
29“Inee! Nagokerete ogosirigwa kw’omobisa one?
Gose netogetie ekero amabe amocherete?
30Yaya, tinatigete omonwa one okore ebibe
ase okomoragereria na komoganeria amakweri.
31Abanto bonsi bamenyete aa bwone babeire birori ng’a
kera omonto obeire oisanegete nendagera nkomoa.
32Nigo narenge koigorera abaeti ebisieri biane basoa;
gose onde tabete okorara isiko botuko.
33Tinatubete ogosaria kwane buna engencho ya mwanyabanto ere,
gose ebibe biane ase egekuba kiane ime.
34Tinairogete omoganda omonene bw’abanto,
gose kwoboa abaamate abwo barenge gonchaya,
erinde imbe nkirete na kobeera nyomba ime.”
35“Naki yare koba buya onye nanyora omonto okonyigwa.
Inche nakoorire amang’ana aane!
Oria Omonguru nang’iranerie!
Ninganetie ndore amang’ana omobisa one andikerete ase okonyomania.
36Ekeene, nigo nare koyabogoria igoro ase amareko aane;
nanga nigo nayesiberania abe buna egutwa asende.
37Nanga namotebia igoro y’orogendo rwane rwonsi;
nigo nare komochiera inde buna omogambi.”
38“Inee! Oboremo bwane bwanakondeera
gose emeng’ororia ye chintinde yana‐korererana?
39Onye nabeire nkoria okwama kwaye ntari goakana
na kogera abanyene bakwe,
40rirorio tiga amagwa amereo ribaga ri’engano,
na amabanchore ribaga ri’esairi.”
Amang’ana ’Ayubu aereire aa.
Currently Selected:
AYUBU 31: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
