AYUBU 24
24
Ayubu ogendererete gokwana
1“Nase ki Omonguru atabegeti chingaki chi’ekina?
Naende nase ki baria bamwanchete batararora rituko riria riaye?
2“Abanto nigo bagotigeria chimbebe,
baira amaicho e chitugo nechinguru, bachia koyarisia aba ayabo.
3Abwo nigo bakoira chitigere chie chintakana,
baira chiombe chi’ababoraka koba intenenera.
4Nigo bagotwoma abaremeire korwa inchera,
bagera abataka bonsi b’ense eyio bachia kwebisa amo.
5“Rora, abataka abwo babeire buna chitigere chi’orosana chire ase erooro;
nigo bagokora emeremo emekong’u ase okonyora ebi bakoria.
Ase ekerubo ekiomo nao bakorigeria abana babo endagera.
6Nigo bakogesera omonto onde chindagera chie chitugo chiaye,
naende basangereria amasabibu agotigwa ase omogondo bw’omokori amabe.
7Nigo bakorara gesobono ase obotuko bwonsi, batabwati eki bakwebisia,
gose tibabwati eki bakobeka ekero ki’embeo.
8Emebere yabo nigo enyiete nembura egotwa ase ebitunwa,
erio bamigererania ase chingako chi’ebitare koigama aroro.
9“Abande nigo bagotaboria chintakana korwa ase chimbeere chi’abang’ina,
na baira abana ebing’werere b’abataka babe intenenera.
10Abataka baria bakona‐koong’anya bare getirianda,
nigo bakobogoria emesaima bare nenchara.
11Nigo bakomitera abakori amabe amaguta ’amazeituni,
korende nonya naboigo nigo bare nerang’o.
12Abanto bachandegete ase omochie nigo bakweumia,
abanto baakire chingoma nigo bakorera,
nonya naboigo Nyasae tari gotegerera ogosaba kwabo.
13“Abanto bande bangire oborabu,
nonya ne chinchera chi’oborabu tibachimanyeti,
gose tibari kobwatia chinchera chi’oborabu obwo.
14Omoiti nigo akoboa mambia chuni ng’a
aite abataka na abachandegete,
na ase obotuko bwekora omoibi.
15Eriso ri’omotomani nigo rikoganya kobwairire,
ere oteba: Onde tari ondoche,
erio otuba obosio bwaye bwekona.
16Omosunte gosoire, abaibi nigo bakobochora chinyomba basoa ime.
Barabwo mobaso nigo bagwesiekerera bebisa;
tibancheti oborabu.
17Omosunte ekerima nigo onga buna emambia asebare;
barabwo nigo bare abasani b’okwoboyia kw’omosunte.
18“Inwe nigo mogoteba:
Omokori amabe nigo akoirwa bwango ne chiooro,
na egetari kiaye ase ense eye nigo keragereirie,
ere takonyara koirana ase emegondo yaye y’emesabibu.
19Buna koreng’ana egurugura ne riberera bigokoora amache ’amagena ’embura,
naboigo nabanto bakorire ebibe barairwe gochia aase abakure.
20Chinda chi’abaiborete nchibebe pi;
amakonde nabarie baere, tibakoinyorwa nonya ng’ake;
igo oyogokora amabe nabunwe buna omote.
21Omokori amabe nigo akoibera omokungu omogomba;
gose tari gokorera omoboraka amaya.
22Nonya naboigo Nyasae ase okobua kwaye nigo akoa omokori amabe chinguru;
ekero erusirie moyo, nigo agotenena naende.
23Nabo Nyasae akomorenda buya na komokonya,
na nigo akoba origereretie mono chinchera chiaye.
24Ase engaki enke nabo abakori amabe bagokinigwa, erio bwango basirigwa;
nigo bakogwa inse, bakwa buna abande,
babutorwa buna ebigara bikobutorwa ekero bikogeswa.
25Onye amang’ana ayio tari bo,
ning’o oranyare kong’enekia ng’a nomorimo inde,
naende aorokie ng’a amang’ana nakwanire nigo are bosa?”
Currently Selected:
AYUBU 24: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
