AYUBU 2
2
Saitani ogendererete goteema Ayubu
1Naende ekaba ng’a rituko erimo, ekero abana ba Nyasae bachete kweorokia ase obosio bw’Omonene, Saitani nere agacha agwo ase barenge kweorokia ase obosio bw’Omonene. 2Erio Omonene akaboria Saitani, “Naye ng’ai okorwa?”
Saitani akamoiraneria, “Nigo nkorwa ase etaaro yane, nkona‐goetanana ase ense yonsi, naende nabo nkonagotiira na gotirimboka aroro.”
3Agwo Omonene akaboria Saitani, “N’Ayubu, omosomba one, kwarorire buna are? Monto onde tari ase ense onga buna ere; nigo are omwegenwa na obwate enkoro endonge; ere nigo anyirogete inche Nyasae, naende nigo etangete korwa ase ogokora amabe. Nonya kwang’ebereretie komochanda ngencho ende etaiyo, ere nigo agendererete koba omwegenwa.”
4Erio Saitani akairaneria Omonene, akamotebia, “Risankwa ase risankwa; omonto nigo ararue gento kende gionsi abwate ase ogotooria obogima bwaye. 5Bono aye rambora okoboko kwao, okune amauga ’omobere oye, amo ne chinyama, omokore bobe, ekeene, ere nigo arakoragereria agwo ase obosio bwao.”
6Naende Omonene agatebia Saitani, “Rora, Ayubu nigo are inse y’okobua kwao, korende omotige abe moyo.”
7Erio Saitani akarua agwo ase Omonene, akagenda, akarentera Ayubu amagumba, gochakera chimbaratero goikera ase omotwe igoro. 8Ayubu akaba ogoikaransa ase ribu, akaimokia orogio, akana‐kwearera amaote aye. 9Erio mokaye akamoboria, “Inee, nonya ngoika bono nigo ogendererete koba omwegenwa ase Omonene? Ragereria Nyasae, erio okwe!”
10Korende Ayubu akairaneria mokaye, akamotebia, “Aye nigo ogokwana buna omokungu omoriri agokwana. Onye tokonyora amaya korwa ase Nyasae, Inee, titokonyora amabe naro korwa asare?”
Ase amang’ana ayio onsi Ayubu takorete ebibe ase ogokwana kwaye.
Abasani b’Ayubu bagocha
11Ayubu nabwate abasani batato: Elifasi korwa Temani, na Bilidadi korwa Sua, na Sofari korwa Naama. Ekero barabwo baigwete igoro y’emechando eria Ayubu anyorete, bagachikana ng’a kera oyomo arue bwoye, baumerane amo, bagende komwechandera na komoremia. 12Bagachia komorora korwa aare, tibanyara komomanya gose nere. Bagachaka goaka amariogi bakorera; bagatandora chianga chiabo, bagesiarera ebuse gochia igoro na ase emetwe yabo. 13Abanto abwo bagaikaransa inse agwo amo nere ase engaki y’amatuko atano na abere, omobaso na obotuko; agwo onde tabete ogokwana ing’ana rinde rionsi ase Ayubu, ekiagera baroche ng’a emechando yaye nigo yarenge emenene mono.
Currently Selected:
AYUBU 2: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
