AYUBU 14
14
Ayubu ogendererete gokwana
1“Mwanyabanto okoiborwa nomokungu,
amatuko aye namake;
ere nigo aichire nemechando.
2Ere nigo akororekana buna egesicha giasichire na giasira bwango,
nigo agoeta bwango buna omorengari, tari kogenderera kobao.
3Inee! Aye nigo okorigereria omonto buna oyio?
Nigo okondeta ase obosio bwao na kongambia ekina?
4Ning’o oranyare korenta egento gechenegete korwa ase egetachenegeti?
Onde taiyo, nonya noyomo.
5Omonto nigo abareire amatuko aye,
na omobaro bw’emetienyi yaye naye kwayochikire,
naende kwamobekeire chimbebe atanyare goetania.
6Tiga komorigereria, motige anyore obotoereru,
erinde agokere amatuko aye buna omonto orikire emeremo.
7“Ogosemeria nkoreo ase omote,
ekero ogechirwe noseboke naende,
na emeseboko eyio tegosira.
8Emeri y’omote oyio neisa kogota ime ase riroba,
na egetugi kiaye nkegote gesire ime ase riroba,
9nonya naboigo, ekero embura eratwe,
nigo keraseboke na gosokia ebisebo buna ekemeri ekeyia.
10Korende omonto nigo agokwa, bwarerigwa riroba inse;
omonto nigo agotweka mo, ng’ai agochia?
11“Buna koreng’ana amache e chinyancha agosira pi,
naboigo naye chindooche agokama chioma pa,
12naboigo na mwanyabanto kararire, tagotenena naende;
tagoturwa goika ekero igoro na ense bitabeo;
tagotaboborwa korwa ase chitoro chiaye.
13“Naki anga yaba buya, onye nkwambisa agwo aase abakure;
onye kwandenda aase are bobisi, goika endamwamu yao ebe yaetire,
onye gwanchikera engaki na kong’inyora!
14Inee! Omonto gakure, nairane koba moyo naende?
Inche ase amatuko aane onsi inchikeire, nimbe nganyete,
goika ogosiborwa kwane goche.
15Aye korandangerie, na inche ningoitabere,
ekiagera noganie emeremo y’amaboko ao.
16Bono aye nigo okobara amatambokero aane,
gose tori korigereria ebibe biane.
17Ogosaria kwane kware komumekerigwa egunia ime,
aye nigo kware gotuba ebibe biane.
18“Buna egetunwa gekogwa na giasamunyokana,
na egetare giasukigwa korwa aase aye;
19buna amache agwata amagena asamunyokana,
ne chiooro chiaira amaroba aera,
naboigo aye ogosiria ogosemeria kwa mwanyabanto.
20Aye nigo ogendererete kobua omonto,
na ere nigo agoeta osira,
nigo okoonchora ekieni kiaye kwamosiria.
21Abana baye nigo bakoegwa ogosikwa,
korende ere tari komanya ayio;
nigo bakourwa ogosikwa kwabo na gokeeigwa,
korende ere tari komanya ayio.
22Ere nigo akoigwa obororo ase omobere oye,
na oba okona‐kwereera omonyene.”
Currently Selected:
AYUBU 14: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
