AYUBU 12
12
Ayubu okoiraneria ogokwana gwa Sofari
1Erio Ayubu akairaneria, akabora:
2“Ekeene, inwe ninwe abanto bori,
ekero morakwe, na obong’aini mbosire.
3Korende nainche nabo inde nokomanya buna inwe,
gose timombueti.
Ning’o otamanyeti amang’ana buna ayio?
4Abasani baane nigo bagonchecheria, inche oyo narenge korangeria Nyasae,
na ere akaba okong’iraneria,
inche omonyakeene ntari na komocha,
bono nigo ngochecherigwa.
5Omonto otari na mechando ende, nigo agochaya emechando,
nigo are ang’e gotachera inse abwo batererigwe.
6Chinka chi’abauri nigo chigendererete koba nomorembe,
na abwo bagechete Nyasae nigo barendire buya,
na enyasae yabo nigo ere ase amaboko abo.”
7“Bono boria ching’iti, nchikworokererie;
boria chinyoni chia igoro chigotebie amang’ana;
8gose kwana ne riroba, ndikworokererie,
ne chinswe chia nyancha, nchikorarerie.
9Ning’o otamanyeti amang’ana aya onsi
ng’a okoboko kw’Omonene nakwo gwakorire aya?
10Obogima bwa kera egetongwa kere moyo
na omoika o mwanyabanto, nigo bire ase okoboko kwaye.
11Inee! Amang’ana ogoto gokoigwa, tikori koyateema
buna oromeme rokomena rwaigwa endagera?”
12“Obong’aini nigo bore ase abanto abanene,
na okomenya emiaka emenge nakwo okomanya.
13Nyasae nigo are nobong’aini na okobua,
boigo nare nogosemia na obomanyi.
14Ere aise gotagora, onde tari oraagache naende;
aise gosiekera omonto, onde tari oramoigorere.
15Aise gotanga amache, ense igo erome pa,
na ekero akoyarenta nigo akoonchorana ense.”
16“Chinguru na obong’aini nigo bikorwa asare.
Abwo bakong’aineka na abakong’ainereria nigo bare ase okoboko kwaye.
17Omonene nigo akoombogania abare abasemia obatiga getirianda,
nigo agokora abagambi ebina baba abariri.
18Nigo agosibora chinkini chi’abaruoti,
erio obaboyia ebibarachi.
19Ere nigo akoombogania abakuani,
obatiga getirianda,
na oonchorana abanto bare nokobua.
20Abanto abwo basemeirie nigo akobaura amang’ana bagokwana,
na oura abanto abagotu ogosemia.
21Omonene nigo akorentera abagambi ogochaywa,
na abanto bare nokobua nigo akobaura chinguru.
22Ere nigo akoorokia obobisi ase omosunte,
erio okora obobisi boria bore ase omosunte bwaba oborabu.
23Nigo agokinia ebisaku, naende obisiria;
nigo akobikora biabucha, naende obing’anyia.
24Ere nigo akorusia obong’aini ase abatang’ani b’abanto bare ase ense,
erio obatiga bakoombogana erooro bosa.
25Abanto abwo nigo bagotaba‐taba ase omosunte borabu botaiyo,
na ogera baong’anya buna omonto otindire.”
Currently Selected:
AYUBU 12: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
