ABAGAMBI 9
9
Abimeleki
1Abimeleki, mosinto o Yerubi‐Baali, akagenda Sekemu, ase abang’ina rome, na ase abanto bonsi b’eamate ya ise ng’ina, akabatebia 2ng’a baborie abanto ba Sekemu, “Inki kere ekiya kobua, ng’a abana abamura emerongo etano na ebere ba Yerubi‐Baali babagambere, gose omonto oyomo bweka abagambere? Inyora boigo ng’a Abimeleki nigo are oyomino kegima bw’amanyinga ayamo.” 3Ase ayio aba ng’ina rome bagakwana amang’ana ayio ase abanto ba Sekemu ase ogokonya Abimeleki, na bonsi bakang’uswa bakaba ase ensemo yaye, naende bagateba ng’a ere nere orenge oyomwabo. 4Abanto bakamoa chisekeli chie chifeta emerongo etano na ebere korwa ase enyomba ya Baali‐Beriti, na ase chibesa echio akarikera abanto abatantanu batechigeti: nabarabwo bakamotunyana. 5Nyuma y’ayio akagenda nyomba mwa ise agwo Ofura, na igoro ase rigena erimo agaitera abamura bamwabo aroro, abana ba Yerubi‐Baali, emerongo etano na ebere. Yotamu bweka, omomura omoke kegima o Yerubi‐Baali, nere otigarete ore moyo. Ere konya bwebisire. 6Erio abanto bonsi ba Sekemu, na abwo ba Beti‐Milo, bagasangererekana amo agwo Sekemu ase omote oria onga buna omotontera ang’e nekeinyorio giatenenirieo, na agwo bakabeka Abimeleki akaba omoruoti.
7Ekero Yotamu atebetigwe amang’ana ayio, akagenda, agatenena ase egetunwa kia Gerisimu igoro, agaaka eriogi rinene agateba, “Inwe abanto ba Sekemu, ntegerera, erinde Nyasae nere abategerere. 8Agwo kare ekaba ng’a emete ekagenda gochora eruoti ekoyegambera. Egatebia omozeituni: Togambere! 9Omozeituni oria okairaneria: Inee! Igo ngotiga amaguta aane ayakorenta ogosika ase chinyasae na ase mwanyabanto, erinde ngambere emete ende? 10Erio emete egatebia omoko: Inchuo aye otogambere! 11Korende omoko oria okairaneria: Igo ngotiga obwansu bwane na amatunda aane amaya, erinde ngambere emete ende? 12Emete egatebia omosabibu: Inchuo aye otogambere! 13Korende omosasibu okairaneria: Igo ngotiga okorua edivai yane, eria ekogokia chinyasae na mwanyabanto, erinde ngambere emete ende? 14Erio emete yonsi egatebia egetutu ki’amagwa: Inchuo aye otogambere! 15Na egetutu ki’amagwa gekairaneria emete yonsi: Onye ekeene mwanchire gonchora imbe eruoti yaino, inchuo mokenderere inse y’ekiriri kiane, korende onye taibo, tiga omorero osoke korwa ase chinsagia chiane chi’amagwa, osambe emecharake ya Lebanoni.
16“Na bono, Inee, nigo mwakorete ayare boronge na ay’obwegenwa ekero mwachorete Abimeleki akaba omoruoti oino? Naende mwakorerete Yerubi‐Baali na ab’enyomba yaye boronge na ayamogwenerete ase ogokora kwaye? 17Inyora ng’a nigo arwanete esegi ase engencho yaino. Igo ebegete ang’e ase ogokwa ase okobatooria korwa ase Abamidiani. 18Rero inwe mwabeire mamincha y’enyomba ya tata, na mwaiteire abana baye abamura, abanto emerongo etano na ebere, ase rigena erimo igoro, naende mwabekire Abimeleki, omwana bw’omosomba oye omokungu, obeire omoruoti bw’abanto ba Sekemu, ekiagera are momura omino. 19Onye rero mwakoreire Yerubi‐Baali amo nab’enyomba yaye ayare boronge na ay’obwegenwa, rirorio gokera Abimeleki, nere tiga abagokere. 20Korende onye taibo, tiga omorero osoke korwa ase Abimeleki obasambe inwe abamomenyete Sekemu na Beti‐Milo, obasirie; naende tiga omorero osoke korwa asemore inwe abamomenyete Sekemu na Beti‐Milo, osambe Abimeleki, omosirie.” 21Erio Yotamu akaminyoka, agatama gochia Beeri, akamenya agwo, ekiagera airogete Abimeleki momura omwabo.
22Abimeleki akagambera Abaisraeli ase engaki y’emiaka etato. 23Erio Nyasae agatoma omoika omobe ase ogwatanana Abimeleki na abanto ba Sekemu, na abanto aba bagakorera Abimeleki obong’ainereria. 24Aya nigo abete bo, erinde obotindi obwo bwakoreretwe abana abamura baria ba Yerubi‐Baali emerongo etano na ebere baakanerwe egesiomba. Ase igo okomocha kw’ogoiterwa kw’amanyinga abo kogaakanerwa igoro y’Abimeleki, oyio obaitete, naende igoro y’abanto ba Sekemu, abwo bamobegete chinguru chi’ogokora ayio. 25Abanto ba Sekemu bakabeka abanto ase ebitunwa igoro baboere abanto bonsi barenge goeta ase chinchera chiria na kobaura ebinto biabo. Abimeleki agatebigwa amang’ana ayio.
26Gaali, mosinto bw’Ebedi, agacha Sekemu amo nabamura bamwabo, na abanto ba Sekemu bakamwegena na komosemeria. 27Barabwo bonsi bakagenda ase emegondo y’emesabibu, bagatora amasabibu, bakayamita, bakaroisia edivai na gokora omoyega omonene. Bagasoa ase enyomba y’enyasae yabo, bakaria na bakanywa, erio bakaragereria Abimeleki. 28Gaali, mosinto bw’Ebedi agateba, “Abimeleki nere ng’o? Naintwe, abanto ba Sekemu, mbanto ki tore? Nase ki togokorera Abimeleki? Ere mosinto o Yerubi‐Baali! Na Sebuli, nere omoteneneri bw’abanto baye! Nase ki rende togokorera Abimeleki? Taibo, tobe abegenwa ase abanto abarwete Hamori, sokoro y’abanto ba Sekemu! 29Onye abanto aba nkoba barenge ase oborendi bwane, nanga narusia Abimeleki. Nigo nare komotebia: Menta abarwani bao b’esegi, erio ochiche korwana!”
30Ekero Sebuli, omogambi bw’omochie oria, aigwete amang’ana a Gaali, mosinto bw’Ebedi, akaba nendamwamu enene. 31Agatoma abanto gochia ase Abimeleki bobisi bamotebie, “Gaali, mosinto bw’Ebedi, amo nabamura bamwabo bachire Sekemu, goseegeta abanto b’omochie babe mamincha yao. 32Ase ayio, aye amo nabanto bao more komo, genda botuko mwebise, moboe ase ebitii. 33Ankio mambia, ekero erioba rigosoka, moimoke bwango, moumokere omochie. Erio ekero Gaali na abanto baria bare komo bakobachera kobarwania, mobakore buna moranyare ekero ekio!”
34Abimeleki amo nabanto bonsi barenge komo bakaimoka botuko, bakebisa, bakaboera Sekemu, bare ebiombe bine. 35Gaali agasoka, agatenena ase egeita ki’omochie, na erio agwo Abimeleki amo nabanto baye bakaimoka korwa ase baboete. 36Ekero Gaali aroche abanto, agatebia Sebuli, “Rigereria, abanto bagotirimboka korwa ebitunwa igoro.”
Korende Sebuli agateba, “Ebio nebiriria bi’ebitunwa kwarorire bikororekana buna abanto.”
37Gaali agakwana naende, agateba, “Yaya, rigereria, abanto ngotirimboka bare korwa ase esagamu eria gati‐gati, na abanto b’ekeombe kende nigo bagocha ase enchera ekorwa ase omote oria onga buna omotontera, oria bw’abaringoria.”
38Erio Sebuli akamotebia, “Ng’ai are amang’ana ao ay’ogwetogia ekero gwatebete: Abimeleki nere ng’o? Nase ki tokomokorera? Aba tibari abanto abagwachayete? Soka bono obarwanie.” 39Gaali agatang’ana abanto ba Sekemu, nabarabwo bakagenda bakarwania Abimeleki. 40Abimeleki agaseria Gaali, na ere agatama. Abange bagaitwa, bakarambereria inse goika ase egeita ki’omochie. 41Abimeleki akairana Aruma, na Sebuli agaseria Gaali na abamura bamwabo, erio tibanyara kogenderera komenya Sekemu.
42Rituko ria kabere abanto bagasoka ase egetii aarabu, na Abimeleki agatebigwa amang’ana ayio. 43Ere akaimoka nabanto baye, akabaatanana ase ebiombe bitato, barabwo bakebisa na koboa ase egetii. Ekero aroche abanto bagosoka korwa ase omochie, agasoka korwa aase ebisete, akabaumokera na kobaita. 44Abimeleki na abanto b’ekeombe kiaye bakaayerera gochia gotenena ase egeita ki’omochie, korende abanto b’ebiombe biria bibere binde bakarindokera na koumokera abanto bonsi abarenge ase egetii, bakabaita. 45Na ekero Abimeleki arwanetie omochie rituko riria rigima, akayobwata na agaita abanto abamenyeteo. Erio akayoiyeria na koyoitororera omonyo.
46Ekero abanto bonsi b’Omorobiri o Sekemu baigwete amang’ana ayio, bakebisa ime ase ekenunchi kiarenge obotamero obokong’u agwo ase hekalu y’Eli‐Beriti. 47Abimeleki agatebigwa ng’a abanto bonsi b’Omorobiri o Sekemu nigo bagasangererekanete amo. 48Erio agatiirera egetunwa gia Salimoni amo nabanto baye bonsi, akaimokia egesire, akagecha chinsagia chi’emete, agachibeka ase amareko aye. Naende agatebia abanto baye, “Aya morarore inche ngokora, nainwe mokore boigo, na moyakore bwango!” 49Ase igo, kera oyomo ase abanto baria akagecha chinsagia chiaye; erio bagatunyana Abimeleki, bakabeka emete eria ang’e ase obotamero boria obokong’u, na kobotongia omorero, bakabosiria amo nabanto bonsi b’omorobiri oria. Abwo bonsi, abanto koreng’ana elifu eyemo, abasacha na abakungu, bagakwa.
50Nyuma y’ayio Abimeleki akagenda Tebesi, akayonaria na koyoira. 51Korende omorobiri omokong’u norenge ase omochie oria ime, na abanto bonsi b’omochie, abasacha na abakungu, bagatama gochiao, bagesiekera imeo. Erio bakariina gochia kerama igoro. 52Abimeleki agacha koumokera omorobiri oyio, agaika ang’e negesieri kiaye ayosambe nomorero, 53na omokungu oyomo akaruta ensio agosera, agaaka Abimeleki omotwe, agasenyenta ekeore kiaye. 54Erio Abimeleki akarangeria omosae obogoretie ebirwanero biaye, akamotebia, “Somora omoyio oo o birende, ong’ite, abanto tibabaisa goteba ng’a: Nomokungu omoita.” Erio omosae oria akamobeta omoyio oye, akamoita. 55Ekero Abaisraeli baroche ng’a Abimeleki okure, bakairana nka, kera oyomo goika bwoye.
56Naboigo ekaba ng’a Nyasae oakanire egesiomba ase engencho y’ebibe biria Abimeleki akorerete ise ase ogoita abana baye, abamura bamwabo omonyene, emerongo etano na ebere. 57Nyasae akagera abanto ba Sekemu bakanyora egesusuro ase engencho y’obonyaka babwo. Naboigo okoragereria kwa Yotamu, mosinto o Yerubi‐Baali, kogaikeranigwa igoro yabo.
Currently Selected:
ABAGAMBI 9: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
