ABAGAMBI 7
7
Gidioni okobua Abamidiani
1Yerubi‐Baali (nere Gidioni) amo nabanto abarenge komo bakaimoka mambia chuni, bagatoora ang’e nensoko ya Harodi. Abamidiani nigo batoorete ase ense omweya sugusu yabo, ang’e negetunwa kia More.
2Omonene agatebia Gidioni, “Abanto abwo bagokobwatia nigo bare abange goetania ntanyare kobeka Abamidiani ase amaboko abo. Aande Abaisraeli nigo barachie gwetogia mamincha yane, na goteba: Amaboko aito intwe abanyene naro atotooretie. 3Ase ayio, raria ase abanto, obatebie: Onde bwensi ore nobwoba na omoondoko, airane gochia nka na arue egetunwa kia Gileadi.” Abanto chilifu emerongo ebere na ibere, bakairana, bakagenda, na abanto chilifu ikomi bagatigara.
4Naende Omonene agatebia Gidioni, “Nonya mbono abanto aba nigo bare abange mono; tiga batirimboke gochia rooche, na inche nkobaatananere aroro. Ase onde bwensi ndagotebie: Omonto oyo nanyare kogenda amo naye, oyio agende; na ase onde bwensi ndagotebie: Omonto oyo takogenda amo naye, oyio takogenda.” 5Ase igo Gidioni agatirimbokia abanto baria gochia rooche, na Omonene akamotebia, “Onde bwensi orabe ogosiara amache noromeme gochia monwa oye, buna esese egosiara, omobeke ensemo eyemo; na onde bwensi oratung’ame inse namaru konywa amache, omobeke ensemo eng’ao.” 6Abanto baria basiarete amache ase okoyasiara gochia monwa nebiara bi’amaboko abo, nigo barenge amagana atato. Na abatigarete igo batung’amete namaru inse, bakanywa. 7Omonene agatebia Gidioni, “Ase abanto aba amagana atato basiara amache gochia monwa nimbatoorie inwe na kobeka Abamidiani ase amaboko ao, korende tiga abanto bande bonsi bairane, kera oyomo ase enka yaye.”
8Nabo Gidioni akarusia asebare endagera eye babwate amo nebitureri, agatebia Abaisraeli bonsi, otatiga abwo amagana atato, bairane nka. Egetwori ki’Abamidiani nigo kiarenge maate yabo ase ense omweya.
9Ase obotuko boria Omonene agatebia Gidioni, “Imoka, otirimboke gochia ase egetwori kiabo obaumokere, ekiagera nakebekire ase amaboko ao. 10Korende onye gokoiroka, tirimboka ritang’ani amo na Pura, omosomba oo. 11Aye noigwe amang’ana aya bagokwana, erio ekero kwayaigure onyore oboremu ogende gokeumokera.” Nabo Gidioni amo na Pura, omosomba oye, bagatirimboka goika ase ensinyo y’egetwori keria aase kiarendire. 12Abamidiani, na Abaameleki, na abanto ba moocha nigo barenge agwo ase ense omweya abange buna chingige. Nigo barenge ne chingamia chinyinge buna omokenye ore ase engegu y’enyancha chitaare kobareka.
13Ekero Gidioni aigeteo, akaigwa omonto oyomo ogotebia omogisangio oye buna arotire, ogoteba, “Nigo narota okorota, narora omogati bw’esairi ogoturunkana gocha aiga ase egetwori giaito, oaka eema, oyeonchorana, oyeiyeria inse.”
14Omogisangio bw’omonto oria akairaneria, “Oyio nomoro o Gidioni, oria Omoisraeli, mosinto o Yoashi. Tigekonyara koba gento kende ekeao. Nyasae otobekire intwe Abamidiani, amo nemeganda yaito yonsi y’abarwani, ase amaboko aye.”
15Gidioni agachia koigwa okorota okwo, naende buna engencho y’okorota okwo yarenge, agatung’ama inse, agasasima. Erio akairana gochia ase Abaisraeli, akabatebia, “Imoka mogende! Omonene obekire ebitwori bi’abarwani b’Abamidiani ase amaboko aino.” 16Agaatanana abanto baria baye amagana atato ase ebiombe bitato, akaa kera oyomo egetureri, na ekeguuru amo nekieri ki’omorero kere imeo. 17Akabatebia, “Ndigererie, mokore buna ndakore. Ekero ndaike ase ensinyo y’egetwori, mondigererie buna ndakore nainwe mokore bo. 18Ekero inche amo nabanto bonsi tore komo torabugie ebitureri, nainwe mobugie ebitureri biaino ase chinsemo chionsi chi’egetwori, erio moake eriogi rinene, motebe: Ase Omonene na ase Gidioni!”
19Bono Gidioni na abanto baria rigana erimo barenge amo nere bagaika ensinyo y’egetwori ki’Abamidiani ase engaki abarendi ba botuko gati bachagete korenda. Erio bakabugia ebitureri biria na bagaata ebiguuru biria babwate ase amaboko abo. 20Naboigo abanto bonsi b’ebiombe biria bitato bakabugia ebitureri biabo na bagaata ebiguuru biabo; babwate ebieri bi’omorero ase amaboko abo a bomosi, na ase amaboko a borio babwate ebitureri biabo bi’okobugia, bagaaka eriogi rinene, bakabora, “Omoro ase Omonene na ase Gidioni!” 21Kera omonto agatenena aase aye goetanana ase egetwori keria; erio abarwani b’esegi abarenge imeo bagachaka kominyoka gochia aaria na aaria, bagakuura na gotama. 22Ekero abanto ba Gidioni babugetie ebitureri biria amagana atato, Omonene akaondokia Abamidiani, kera oyomo akaonchokera goita oyomwabo nomoro ase egetwori keria ekegima, na abarwani bonsi bagatama gochia ensemo ya Serera goikera Beti‐Hasita, na goikera Abeli‐Mehola, ang’e na Tabati.
23Erio Abaisraeli korwa egesaku kia Nafutali na egi’Aseri, amo nekia Manase gionsi bakarangerigwa gocha amo kobwatia Abamidiani. 24Gidioni agatoma abanto ase ense yonsi y’ebitunwa y’Efraimu batebe, “Tirimboka gochia maate, morwanie Abamidiani; mobwate ebiambokero bie chindooche goikera Beti‐Bara, amo nebia Yorodan.” Ase igo abanto b’Efraimu bagasangererigwa amo, bakabwata ebiambokero goikera Beti‐Bara, na ebia Yorodan boigo. 25Bakabwata abagambi babere b’Abamidiani, Orebu na Seebu. Bagaitera Orebu ase Egetare ki’Orebu, na Seebu bakamoitera ase ekemitero ki’edivai gia Seebu, na bakagenderera kobwatia Abamidiani. Omotwe bw’Orebu na oyo o Seebu bakayeirera Gidioni aase arenge, moocha ya Yorodan.
Currently Selected:
ABAGAMBI 7: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
