ABAGAMBI 6
6
Gidioni
1Abaisraeli bagakora ebibe naende ase obosio bw’Omonene, na Omonene akababeka ase amaboko ’Abamidiani ase engaki y’emiaka etano na ebere. 2Abamidiani nigo baengerete Abaisraeli, na ase engencho y’Abamidiani Abaisraeli bakabetererigwa korigia obotamero ase amakuruma na emetaro, na ase chingoro chiakunyire ase ebitunwa. 3Kero kende gionsi Abaisraeli barenge kobusura chimbusuro chiabo, Abamimidiani, na Abaameleki, na abanto ba moocha nigo baare gocha kobarwania esegi. 4Bakaba bagotoora ase ense y’Abaisraeli, erio basaria chindagera chiabo goika chimbebe chia Gasa. Tibaare gotigareria Abaisraeli ching’ondi, gose chiombe, gose chitigere, nonya ngento kende gionsi Abaisraeli baare koria. 5Nigo barenge gocha amo ne chitugo chiabo ne chiema chiabo, abange buna chingige. Barabwo abanyene ne chingamia chiabo, omobaro obo torenge kobareka. Bagasoa ase ense eria, bakagania koyesaria kegima. 6Ase ayio Abaisraeli bagachandeka mono ase engencho y’Abamidiani; erio bakarera ase Omonene ng’a abakonye.
7Ekero Abaisraeli barerete ase Omonene ase engencho y’Abamidiani, 8Omonene akabatomera omobani, na ere akabarentera amang’ana korwa ase Omonene, Nyasae bw’Abaisraeli, akabatebia, “Ninche nabarusetie Miisiri, ense eria ase mwarenge abasomba. 9Nkabatooria korwa ase Abamisiri, na korwa ase abanto bonsi babachandete ase ense eye. Nkabaseria, bakarua ase obosio bwaino, erio nkabaa inwe ense yabo. 10Nkabatebia: Inche ninche Omonene, Nyasae oino, timobaisa koiroka chinyasae chi’Abaamori, abwo momenyete ase ense yabo. Korende timwaigwerete amang’ana aane.”
11Erio omomalaika bw’Omonene agacha, agaikaransa inse y’omote onga buna omotontera agwo Ofura, oyio orenge o Yoashi, omonto bw’eamate y’Abieseri. Gidioni, omomura oye, nigo arenge koora engano ase ekemitero ki’edivai, erinde Abamidiani tibayenyora. 12Omomalaika bw’Omonene akamoorokera agwo, akamotebia, “Omonene nigo are amo naye, aye omonto omoremu ase okorwana esegi!”
13Gidioni agakwana nere, agateba, “Aye Omonene one, onye Omonene ore amo naintwe, nase ki rende aya onsi atonyorire? Naende ogokora kwaye gwe chinguru, ng’ai kore, koria chisokoro chiaito chiatotebetie ng’a Omonene nere otorusetie Misiri? Na bono Omonene otwangire na gotobeka ase amaboko ’Abamidiani.”
14Erio Omonene akeonchora gochia asare, akamotebia, “Genda ne chinguru echio chiao, otoorie Abaisraeli korwa ase amaboko ’Abamidiani. Inche ninche nkogotoma.”
15Gidioni akamoboria, “Omonene one, naki ndakore mbatoorie Abaisraeli? Eamate yane nigo ere enke kobua chiamate chinde ase egesaku kia Manase, na ase enyomba ya tata inche tindi omonto omanyekanete.”
16Omonene akamoiraneria, “Inche nimbe amo naye, naye noite Abamidiani buna nigo bare omonto oyomo.”
17Gidioni akamotebia, “Omonene, onye nanyorire ogwancherwa asore, inyorokie ekemanyererio ng’a aye naye ogokwana nainche. 18Koranche, torua aase aa goika nkorentere okoruegwa kwane kw’endagera.”
Omomalaika oria akamoiraneria, “Nimbeere aa, nkoganye goika oirane.”
19Erio Gidioni akagenda nyomba mwaye, akanyenya emanwa y’embori, akayeroisia; naende korwa ase obosie bw’ekerengo ki’ebimunu bibere akaroisia emegati etabekiri memera. Akabeka chinyama ase egetonga, na omosori akayoumora ase enyongo, akairera omomalaika oria orenge inse y’omote onga buna omotontera endagera eyio. 20Omomalaika oria o Nyasae akamotebia, “Imokia chinyama echi na emegati eye etabekiri memera, obibeke igoro ase egetare eke, naende obiumorere omosori oyio.” Gidioni agakora bo. 21Erio omomalaika oria akarambora okoboko kwaye, na ase mesia y’enyimbo yaye agakuna chinyama chiria na emegati eria etabekiri memera. Aroro agwo omorero ogatuboka ogoka korwa ase egetare keria ime, ne chinyama echio amo nemegati eyio bigasambwa bikayia bikaera. Na omomalaika oria bw’Omonene akarua ase Gidioni.
22Bono Gidioni akamanya ng’a oria nomomalaika bw’Omonene orenge, akabora, “Ani! Aye Omonene Nyasae! Narorire omomalaika oo obosio ase obosio.”
23Korende Omonene akamotebia, “Omorembe obe amo naye! Toiroka! Aye togokwa.” 24Erio Gidioni akaagachera Omonene egesasimero aroro agwo, agakeroka “Omonene nere Omorembe.” Egesasimero ekio nigo geteneine agwo Ofura, omochie bw’eamate y’Abieseri, nonya ngoika rero iga.
25Ase obotuko boria Omonene agatebia Gidioni, “Imokia eeri ya iso, na eeri eyemo ende ere nemiaka etano na ebere, naende otagore egesasimero gia iso, keria aagacherete Baali, na okeiyerie inse; naende onache emete y’Asera, enyasae yabo enkungu, ere ensemo y’egesasimero keria. 26Naende ong’agachere inche Omonene, Nyasae oo, egesasimero, ase ogochoka amagena buya igoro ase eburi eye enkong’u. Erio orente eeri eria ya kabere, oyerue ebe ekeng’wanso ki’ogosambwa, oyesambere chinko chi’omote oria bw’Asera ogochia konacha.” 27Gidioni akaimoka amo nabasomba baye ikomi, agakora buna Omonene amotebetie. Bono ekiagera arenge nobwoba ase abanto b’eamate yaye, na ab’omochie obo, gokora aya ekero kia mobaso, akayakora botuko.
28Rituko ria kabere, ekero abanto babogete mambia chuni, bakanyora ng’a egesasimero kia Baali giatagoirwe amo nomote oria bw’Asera orenge ensemo yaye, naende bakarora ng’a eeri eria ya kabere yarusigwe yakoreirwe ekeng’wanso igoro ase egesasimero keria konya kiaagachirwe. 29Barabwo bakaborania, “Ning’o okorete amang’ana aya?” Ekero baare koboria na kouna‐unia, bakanyora ng’a Gidioni, mosinto o Yoashi, nere okorete ayio. 30Erio abanto b’omochie oria bagatebia Yoashi, “Morente omomura oyio oo aiga, ere goika aitwe, ekiagera otagoire egesasimero kia Baali, na otagoire omote oria bw’Asera orenge ensemo yaye.”
31Korende Yoashi agatebia abwo bonsi bachete koamererania nere, “Inee! Ninwe mokorwanerera Baali? Gose ninwe mokoyekengera? Onde bwensi okoyerwanerera goika aitwe ritang’ani emambia ende etaraika. Onye Baali nenyasae, tiga erwanerere ere bweka omonyene. Egesasimero kiaye nakio giatagoirwe.” 32Korwa rituko riria Gidioni akarokwa Yerubi‐Baali, engencho yaye, “Tiga Baali erwanerere ere bweka omonyene”, ekiagera Gidioni atagorete egesasimero kiaye.
33Erio Abamidiani na Abaameleki, na abanto ba moocha bagasangererekana amo, na ekero bambokire Yorodan bagatoora ase ense omweremo ya Yesireeli. 34Gidioni agasogwa ne chinguru chi’Omoika bw’Omonene. Ere akabugia egetureri gi’esegi, na Abaabieseri bakarangerigwa bakamobwatia. 35Naende agatoma abanto ase orogongo rwonsi rw’abanto b’egesaku kia Manase barangerie abanto b’aroro bamobwatie. Naboigo akarangeria abanto b’egesaku gi’Aseri, na egia Sabuloni, na ekia Nafutali; barabwo bakaimoka, bakagenda bakamobwatia.
36Gidioni agatebia Nyasae, “Aye gwatebire ng’a norigetie gotooria Abaisraeli goetera ase okoboko kwane. Onye naboigo, 37rora, nkobeka nde risankwa rire namarionya e ching’ondi ase ekeooreri gekoorerwa; obotooru bokoba ase risankwa riria rire namarionya oka, korende riroba ribe eriomo, erio nario ndamanye ng’a aye notoorie Abaisraeli goetera ase okoboko kwane, buna gwatebire.” 38Ayio akaba boigo. Ekero Gidioni abogete mambia chuni, akamita risankwa riria, akanyititora amache ’obotooru, egetaabo kegaichora. 39Gidioni agakwana na Nyasae, akamotebia, “Nyasae, totiga endamwamu yao yoke asende, korende ing’a ribaga nkwane naye rimo naende. Tiga nteeme rimo naende ne risankwa eri. Na bono ekero eke kora iga ng’a risankwa ribe eriomo, korende obotooru bobe ase riroba inse rionsi.” 40Na ase obotuko boria Nyasae agakora bo; mambia yaye risankwa nigo riarenge eriomo, korende riroba inse rionsi rikaba rinyiu ase obotooru.
Currently Selected:
ABAGAMBI 6: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
