ABAGAMBI 3
3
Abanto b’ebisaku biatigarete ase ense ya Kanani
1Omonene nigo atigete abanto b’ebisaku binde bamenye ase ense eria, erinde ateeme Abaisraeli baria konya bataramanya esegi ende yonsi ase ense ya Kanani. 2Nabo akorete ase okworokereria kera ekegori ki’Abaisraeli engencho y’esegi, mono abwo konya batararwana esegi ende yonsi. 3Abanto batigarete ase ense eria nabwo aba: Abagambi batano b’Abafilisti, na Abakanani bonsi, na Abasidoni, na Abahivi, baria bamenyete ase ense y’ebitunwa bia Lebanoni, korwa egetunwa kia Baali‐Herimoni goika enchera ekogenda Hamati. 4Omonene nigo atigete abanto aba ase ense eria, erinde ateeme Abaisraeli, arore gose mbatagete koigwera amachiko aria achigete chisokoro chiabo goetera ase Musa. 5Ase igo Abaisraeli bakamenya ase egati y’Abakanani, na Abahiti, na Abaamori, na Abaperisi, na Abahivi, na Abayebusi. 6Bakanyuomeria abamura babo abaiseke b’abanto baria b’ebisaku, na bagasokia abaiseke babo ase abanto abwo naende bagakorera chinyasae chiabo.
Otinieli
7Abaisraeli bagakora amabe ase obosio bw’Omonene, bakeba Omonene, Nyasae obo, na bagasasima chinyasae chiria Baali na Asera. 8Ase igo Omonene akaba nendamwamu entindi ase Abaisraeli, akabatiga bakabugwa na Kusani‐Risataimu, omoruoti o Mesopotamia; na Abaisraeli bakaba bakomokorera ase engaki y’emiaka etano na etato. 9Erio Abaisraeli bakarera ase Omonene ng’a abatoorie, nere akabaa omonto abatoorie. Omonto oyio nere Otinieli, mosinto o Kenasi, omomura omoke omwabo Kalebu. 10Omoika o Nyasae ogacha igoro asare, na ere akaba omogambi bw’Abaisraeli. Akagenda korwana esegi, na Omonene akabeka Kusani‐Risataimu, omoruoti o Mesopotamia, ase amaboko aye. Otinieli akamobua kegima. 11Bono ense eria ekaba nobotoereru ase engaki y’emiaka emerongo ene. Erio Otinieli, mosinto o Kenasi, agakwa.
Ehudi
12Naende Abaisraeli bagakora amabe ase obosio bw’Omonene, na ase engencho y’ayio Omonene akabarentera Egiloni, omoruoti bw’ense ya Moabu, nere akabarwania, akababua. 13Egiloni akabwatana n’Abaamori na Abaameleki; barabwo bakarwania Abaisraeli, bakababua, bakaira Omochie bw’Emekendo.#3:13 Omochie bw’Emekendo, rora 1:16 14Abaisraeli bakaba bagokorera Egiloni, omoruoti o Moabu, ase engaki y’emiaka ikomi, na etano na etato.
15Erio Abaisraeli bakarera ase Omonene ng’a abatoorie, nere akabaa omonto kobatooria. Omonto oria nere Ehudi, mosinto o Gera, bw’egesaku kia Benjamin. Ehudi nigo arenge omonyakebee. Abaisraeli bagatoma Ehudi koirera Egiloni, omoruoti bw’ense ya Moabu, ebiegwa bi’amasikani. 16Ehudi ageturera omoyio o birende ore nobwoge chinsemo ibere; obotambe bwaye nigo bwarenge obw’ekerengo gi’okoboko okomo; akayweboerania ensemo yaye y’okorio, ime ye chianga chiaye. 17Erio akairera Egiloni, omoruoti bw’ense ya Moabu, ebiegwa biria. Egiloni nigo arenge omonto omonetu mono. 18Ekero Ehudi aruete ebiegwa biria agatebia abanto baria babibogoretie bairane bagende, 19korende Ehudi omonyene, ekero aigete ase amagena abaachire are emegwekano, ang’e na Giligali, akairana, akagenda naende ase Egiloni, akamotebia, “Omonene one omoruoti, nimbwate ring’ana ria bobisi nkogotebia.” Ase igo omoruoti agatebia abanto bonsi abateneine ang’e komokorera, “Toe ribaga, tobe intwe tweka!” Barabwo bonsi bagasoka.
20Ehudi akariina kerama igoro ase akanyomba kare nembeo engiya, ase omoruoti aikaransete, akamotebia, “Ninde namang’ana arure ase Omonene nkogotebia.” Omoruoti oria akaimoka korwa ase aikaransete. 21Ehudi akarambora okoboko kwaye gw’okobee, agasomora omoyio oye o birende, oyio eboeranetie ensemo yaye y’okorio, akabeta Egiloni enda yaye ime. 22Omoyio oyio okarimera ime amo negete, na ebitinya bikayotuba, ekiagera Ehudi tarenge koyosomora korwa ase enda y’omoruoti oria.
Omoyio okaorokera magega. 23Erio Ehudi agasoka, agasieka ebisieri bi’akanyomba karia, akabibunga. 24Ekero asokire, abasomba b’Egiloni bagacha, bakanyora ebisieri bisiekire bibungire, bakarengereria ng’a omoruoti nigo are ase akanyomba ka ime kogwekonya. 25Barabwo bakaganya egeka giaisanete koganya. Nonya naboigo, omoruoti taigora egesieri ki’enyomba. Ase ayio bakaimokia ekeigorero, bakaigora egesieri, na Ani! Omonene obo nigo araire inse okwete.
26Ekero abasomba baria barenge baganyete, Ehudi agatama. Ere konya oetire ase amagena arenge, aria abaachire are emegwekano, agatama gochia Seira. 27Ekero aigete aroro, akabugia egetureri gi’esegi ase ense y’ebitunwa y’Efraimu. Erio Abaisraeli bagatirimboka korwa ase ebitunwa bakamobwatia, nere akaba omotang’ani obo. 28Ere akabatebia, “Ntunyana, ekiagera Omonene obekire ababisa baino Abamoabu ase amaboko aino.” Erio bakamobwatia, bagasieka ebiambokero bia Yorodan, ase Abamoabu banarete kwambokera, tibaa nonya noyomo ribaga ri’okwamboka. 29Ase rituko erio bagaita Abamoabu koreng’ana chilifu ikomi. Abwo bonsi nigo barenge abanto abanene, naende barenge chituoni chi’esegi; onde tatooregete nonya noyomo. 30Ase rituko riria Abaisraeli bakabua Abamoabu, na ense eria ekaba nomorembe ase engaki y’emiaka emerongo etano na etato.
Samigari
31Oyobwatetie Ehudi ase okogamba, nere Samigari, mosinto bw’Anati Ere agaita Abafilisti amagana atano na rimo nenyimbo are gotemera chieri. Nere boigo agatooria Abaisraeli.
Currently Selected:
ABAGAMBI 3: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
