ABAGAMBI 13
13
Okoiborwa gwa Samison
1Abaisraeli bagakora ebibe naende ase obosio bw’Omonene; ere akabatiga, akababeka ase amaboko ’Abafilisti ase engaki y’emiaka emerongo ene.
2Ase engaki eria narengeo omonto ore korokwa Manoa. Nigo arenge korwa omochie ore korokwa Sora, omonto bw’egesaku kia Dani. Omokungu oye nigo arenge omogomba, taiborete bana. 3Omomalaika bw’Omonene akamoorokera, akamotebia, “Aye nigo ore omogomba, tobwati bana, korende nobe morito, erio oibore omwana omomura. 4Ase ayio, bwerite, tobaisa konywa edivai, gose ebinyugwa ebigotindia, na tobaisa koria endagera ende yonsi ere etachenegeti, 5ekiagera aye nobe morito, na oibore omwana omomura. Onde tabaisa kogingira etukia y’omotwe oye, ekiagera omwana oria omomura naatananwe ase Nyasae, abe Omwerwa oye korwa ase enda ya ng’ina. Ere nachake gotooria Abaisraeli korwa ase amaboko ’Abafilisti.”
6Erio omokungu oria akagenda agatebia omosacha oye, “Omonto o Nyasae nachicha asende: nigo arenge kororekana buna omomalaika o Nyasae, nigo arenge bw’okoondokia mono. Tinamoboretie ase are korwa, nere tantebetie erieta riaye. 7Korende nigo antebia ng’a nimbe morito na ing’ibore omwana omoisia, naende ng’a timbaisa konywa edivai, gose ebinyugwa bigotindia, na timbaisa koria endagera ende yonsi etachenegeti, ekiagera omwana oria naatananwe ase Nyasae abe Omwerwa oye korwa okoiborwa kwaye.”
8Erio Manoa agasaba Omonene, agateba, “Omonene, nagosabire, tiga omonto oria o Nyasae gwatoma atochere naende, erinde atworokererie aya togwenerete gokora ase omwana oria omomura oraiborwe.”
9Nyasae akaigwa ogosaba kwa Manoa, na omomalaika o Nyasae agacha naende ase omokungu oria ekero aikaransete mogondo. Manoa, omosacha oye, tarenge amo nere. 10Ase igo omokungu oria akaminyoka bwango akarangeria omosacha oye, akamotebia, “Rora, omonto oria ochicha asende rituko riria ong’orokeire naende.”
11Manoa akaimoka, agatunyana mokaye. Erio agacha ase omonto oria, akamoboria, “Inee! Naye omonto oria okwana nomorugi one?” Omomalaika oria akamoiraneria, “Ee, ninche.”
12Manoa akamoboria, “Bono ekero amang’ana ao araikerane, naki obogima bw’omwana oria borabe? Meremo ki arakore?”
13Omomalaika bw’Omonene akamoiraneria, “Ayio onsi natebia omorugi oo, goika ayakore. 14Tabaisa koria gento kende gionsi gekorwa ase omosabibu, gose tabaisa konywa edivai na ebinyugwa ebigotindia, gose taria endagera ende yonsi ere etachenegeti. Aya onsi namochika, goika ayarende.”
15Manoa agatebia omomalaika oria, “Koranche twagotangire, obeere aa, tokonyenyere emanwa y’embori, tokoyeroiserie orie.”
16Omomalaika oria bw’Omonene akamoiraneria, “Nonya gwantanga ng’a mbeere aiga, tinkoria endagera yao, korende koraroisie ekeng’wanso ki’ogosambwa, okerue ase Omonene.” (Manoa tamanyete ng’a oria nigo arenge omomalaika bw’Omonene.) 17Manoa akabora, “Totebie buna okorokwa, erinde torue amasikani asore, ekero amang’ana ao araikerane!”
18Omomalaika oria akamoboria, “Nase ki otagete komanya erieta riane? Erieta riane neri’ogokumia#13:18 Neri’ogokumia, gose nerigiya mono.”
19Erio Manoa akaimokia emanwa y’embori amo nokoruegwa kw’endagera, akabibeka ase egetare, akabirua ase Omonene, oyokorete ogokumia ekero Manoa na mokaye barigereretie. 20Ekero omorero orenge gwoka gochia igoro korwa ase egesasimero, Omomalaika bw’Omonene agatiirera ime y’omorero oria, na ekero Manoa na mokaye baroche ayio, bagatung’ama inse bakaumama. 21Korwa ekero keria omomalaika oria taoroka ase Manoa naende, gose ase omorugi oye, Erio Manoa akamanya ng’a oria nigo arenge omomalaika bw’Omonene.
22Manoa agatebia mokaye, “Amaene goika tokwe, ekiagera twarorire Nyasae.”
23Korende mokaye akamoiraneria, “Onye Omonene nigo aganetie gotoita, nanga tare gwancha ekeng’wanso ki’ogosambwa na okoruegwa kw’endagera korwa ase amaboko aito, gose gotworokia aya onsi atworokia, gose gototebia amang’ana aya twaigure.”
24Nyuma y’ayio omokungu oria akaibora omwana omoisia, akamoroka Samison. Omwana oyio agakina, na Omonene akamosesenia. 25Omoika bw’Omonene ogachaka gokora emeremo ime yaye ekero arenge ase egetwori kia Dani, agwo gati ya Sora na Esitaoli.
Currently Selected:
ABAGAMBI 13: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
