ISAYA 6
6
Nyasae okorangeria Isaya abe omobani
1Ase omwaka oria omoruoti Usia akwete, nkarora Omonene oikaransete ase ekerogo ki’obonene kiaimokererete igoro. Egesicho kiaye nigo kiarenge kegokurura inse nigo giaichorete ase Hekalu yonsi. 2Goetanana ase Omonene, abaserafi mbateneine aroro; kera oyomo obo nigo abwate chimbaba isano nemo, na kera oyomo nigo atubete obosio bwaye ne chimbaba ibere, na amagoro aye ne chimbaba ibere, na akairurukera chimbaba chinde ibere. 3Bakarangerania, bagateba,
“Omochenu, Omochenu, Omochenu,
nere Omonene bw’Emeganda;
obonene bwaye bwaichoire ase ense engima.”
4Amariogi ay’okorangerania koria agatengechia oboroso bw’emetobwa ya inse y’ebisieri bie Hekalu, na erioki rigaichora ime ase enyomba eria.
5Erio ngateba, “Obobe nobwane, ekiagera nasirire! Inche nigo mbwate ebikoba bitachenegeti, na nigo imenyete ase egati y’abanto babwate ebikoba bitachenegeti; naende amaiso aane arorire Omoruoti, oyore Omonene bw’Emeganda.”
6Erio omoserafi oyomo akairuruka gocha asende, obogoretie ase okoboko kwaye rikara rire nomorero, erio arusetie ne rigami korwa ase egesasimero. 7Erio agakuna omonwa one ne rikara riria, agateba, “Rora, rikara eri ri’omorero riakunire ebikoba biao; ogosaria kwao kwarusigweo, na ebibe biao biaabeirwe.”
8Nyuma y’ayio nkaigwa Omonene okoboria, “Ning’o ngotoma, na ning’o oranyare koba omotomwa oito?”
Nkairaneria ngateba, “Nao inde aa, ntome.”
9Omonene agantebia, “Genda otebie abanto aba: Okoigwa, nkoigwa more, korende timori komanya gento, na okorora, nkorora more, korende timori korengereria. 10Okore chinkoro chi’abanto aba chibe chinkong’u, na amato abo abe amarito ase okoigwa, na amaiso abo aukore, erinde tibabaisa korora namaiso abo, gose koigwa namato abo, gose komanya ne chinkoro chiabo, baonchoke, bagwenigwe.”
11Erio nkaboria, “Aye Omonene, ngoika ririri amang’ana ayio arabe igo?”
Nere akairaneria, agantebia, “Ngoika ekero emechie erabe yasarigwe etamenyiri nabanto, ne chinyomba chiatigirwe bosa, na ense ebe yasarigwe kegima na yabeire amatongo. 12Inche Omonene ning’anyie abanto abwo korwa ase ense eyio bagende aare, na aase agwo aratigwe are bosa, nabe aange mono ase ense eyio. 13Nebe ng’a ensemo eyemo ya ikomi yatigaire ere aroro, barabwo boigo mbasirigwe, buna koreng’ana omote onga omotontera otemirwe, egesike giatigaireo.”
Egesike ekio nigo kerabe embusuro enchenu.
Currently Selected:
ISAYA 6: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
