ISAYA 32
32
Omoruoti bw’oboronge
1Rora, omoruoti naoroke oragambe ase oboronge, na abagambi b’obogambi mbagambe bakore ay’ekeene. 2Kera oyomo obo nabe buna obwebiso ekero omwaga okogusa, na buna ekeigamero ekero embura y’omoubera egotwa; boigo mbabe buna chindooche chire ase ense enyomo, na buna ekiriri ki’egetare ekenene ase ense etari namache. 3Erio amaiso ’abanto abwo bakorora tagoukora, na amato ’abanto abwo bakoigwa naigwe. 4Erio abanto abwo batarenge ne chinkoro chi’oboremereria mbabe nebirengererio bi’okomanya, na abwo barenge gotutura mbamanye gokwana buya na koigugwa buya. 5Ase engaki eyio omonto omoriri takorokwa omosike, gose omong’ainereria takorokwa omonto omwegenwa. 6Omonto omoriri nigo agokwana amang’ana ’oboriri; ebirengererio biaye nigo bigokora emeroberio y’ogokora ebibe; nigo akwenaria gokora aya atari e chingencho chinchenu; nigo agokwana bobe igoro y’Omonene, na otiga korageria abare nenchara, na orina abare nerang’o amache. 7Ebirwanero bi’omong’ainereria nigo bire ebi’obobe; ere nigo agokora emeroberio y’obosooku gosiria abachandegete ase okobatebera oborimo, nonya nekero barabwo bagokwana ay’oboronge bwabo. 8Korende omonto omosike nigo akoroberia ay’obosike, na nigo agotenena ase ay’obosike.
Ekina na ogokorwa oboyia
9Inwe abakungu mweisanegetie, imoka, montegerere! Inwe abaiseke motechandereti kende, tegerera, moigwe amang’ana ngokwana! 10Inwe abakungu motechandereti kende, ekero amatuko aetanetie omwaka aerire mobe mogochandeka, ekiagera emesabibu tekwama, ne rigesa rie chindagera tirikoba. 11Ase ayio inwe abakungu motechandereti kende, iguswa, mwechabore chianga chiaino mobe getirianda, erio mweboyie chigunia. 12Moake‐ake ebikuba biaino, ekiagera emegondo yaino emiya, na emesabibu yaino ekwama mono, yasarigwe, 13na ekiagera amagwa na amageri biamerire ase ense y’abanto baane, mweake‐ake ase engencho ye chinyomba chi’emegoko chire ase omochie oyio oichire nomochengo. 14Chinyomba chi’oboruoti nchitigwe chire bosa, omochie oichire nabanto nong’anywe, eburi na emerobiri y’obotengerero mbibe amakuruma kare na kare; agwo nao chitigere chi’orosana chiregokerie, na omochie oyio obe oborisia bw’amaicho e ching’iti.
15Nyuma y’ayio ntoitererwe Omoika korwa igoro, na aase arenge erooro abe omogondo okwama chindagera chinyinge, na omogondo okwama chindagera chinyinge noonchorwe obe rinani. 16Erio ekeene ngekorwe ase ense y’erooro, na oboronge bokorwe ase omogondo okwama chindagera chinyinge. 17Ayaratoke korwa ase oboronge nomorembe, na okwama kw’oboronge nobotoereru na ogosemeria kwa botambe. 18Abanto baane mbamenye ase chinyomba chire nomorembe babe barendire buya, mbabe batimogete ase obotoereru. 19Ekero embura y’amagena erabe egotwa neiyerie emete ye rinani, na omochie oino noiranigwe inse mono. 20Imosesenirie inwe aba mogosimeka chimbusuro mbarabare ase amache onsi, mogotiga chiombe ne chitigere chiagenda aande onsi.
Currently Selected:
ISAYA 32: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
