ABAFESO 1

Ogokwania

1Inche Paulo, omotomwa o Kristo Yeso ase ogwancha kwa Nyasae, nkobarikera nde inwe abachenu abamomenyete Efeso, abegeni ba Kristo Yeso:

2Obuya bobe asemore na omorembe bikorwa ase Nyasae Tata oito, na ase Omonene Yeso Kristo.

Ogosesenigwa kw’omoika ase Kristo

3Nyasae, Ise Omonene oito Yeso Kristo, atogigwe, ere oyotosesenetie ase Kristo nogosesenigwa gwonsi kw’omoika aase aaria igoro, 4buna atochorete asere ritang’ani ense etarabekwa oboroso, erinde tobe abachenu, totari na komocha ase obosio bwaye. 5Ase obwanchani bwaye Nyasae atochorete korwa kare, erinde tokorwe koba abana baye ase enchera ya Yeso Kristo, koreng’ana nokogania kw’ogwancha kwaye, 6erinde obonene bw’obuya bwaye botogigwe, obo atoeire buna ekeegwa ase Omwanchwa oye. 7Asare ere ntore nokoboorigwa ase amanyinga aye, na okwaberwa kw’ebibe biaito ase obonge bw’obuya bwaye, 8obo ere akabomenta asetore ase chisemi na obong’aini bwonsi. 9Nyasae agatomanyia obobisi bw’ogwancha kwaye, koreng’ana nokogania kwaye buna aroberetie ase Kristo, 10ng’a ase ekero ki’ogoikeranigwa kw’engaki nabekeranie ebinto bionsi bibe nobomo ase Kristo, ebinto bire igoro, na ebire ase ense, asere oyio.

11Ime yaye twanyorire omwando, koreng’ana buna twachoretwe korwa kare ase okorigia kwaye ere oyokorete onsi koreng’ana nogwancha kwaye, 12erinde intwe abatwatang’anete komosemeria Kristo togere obonene bwaye botogigwe. 13Asere oyio, inwe abamwaigure ring’ana ri’ekeene, enchili y’ogotooreka kwaino, na komwaikire komwegena ere, mokabekwa ekemanyererio n’Omoika Omochenu, oria mwarieretwe eira. 14Oyo noro ore intenenera ase omwando oito, goika okoboorigwa kw’abare aba Nyasae, ase ogotogigwa kw’obonene bwaye.

Ogosaba ng’a abanto bamomanye Nyasae

15Ase engencho eyio, ekero naigwete amang’ana ’okwegena kwaino more nakorokwo ase Omonene Yeso, na obwanchani bwaino ase abachenu bonsi, 16tintigeti koiraneria ng’a mbuya mono ase engencho yaino, na kobainyora ase ogosaba kwane. 17Nasabire ng’a Nyasae bw’Omonene oito Yeso Kristo, Tata bw’obonene, abae omoika bw’obong’aini na bw’okomaanorerwa, erinde momomanye; 18naende ng’a amaiso e chinkoro chiaino abekwe omobaso, erinde momanye ogosemeria koria abarangereretie monyore, na komanya obonda bw’obonene bw’omwando oye buna bore, obo abachenu baeirwe. 19Nasabire ng’a momanye obonene bw’okobua kwaye botari nekerengo, obo bwatoikeire intwe abatwegenire koreng’ana nogokora gw’okobua kwaye okonene.

Okobua kwa Nyasae kworokigwe ase okobokigwa gwa Kristo

20Ere nigo akorete emeremo eyio ase Kristo ekero amobogetie korwa ase abakure, akamoikaransia ensemo y’okoboko kwaye gw’okorio aaria igoro, 21igoro mono kobua okogamba gwonsi, na okobua, ne chinguru, na oboruoti, na igoro ya kera erieta rigwatorwa, tari ase ense eye yoka, korende neria egochi‐gocha boigo. 22Naende akabeka ebinto bionsi inse y’amagoro aye, akamobeka abe omotwe igoro y’ebinto bionsi ase ekanisa, 23eyere omobere oye, ogoikerania kwaye ere oyogoikerania ebinto bionsi ase bonsi.

Currently Selected:

ABAFESO 1: EKEGUSIIBBLE

Highlight

Copy