OMORANDIA 12
12
1Inyora Omotongi oo ekero ore omosae, ekero amatuko amabe ataracha, na emiaka eyio emebe etaraika ang’e ekero oratebe, “Tindi nomogoko koba moyo ase engaki buna eye!” 2Omoinyore ekero erioba, na omobaso, na omotienyi, ne ching’enang’eni, bitarabekwa omosunte, gose amare atarairanerana embura koyature. 3Engaki eyio abarendi b’enyomba mbaiguswe, na abasacha bare ne chinguru bekumbe, na abagosia batige gosia ekiagera bare abake ase omobaro, na abwo batengerete korwa ase ebibao, batubwe norotutu. 4Ebisieri birochie ase chinchera mbisiekwe, na amariogi ay’ogosia nakee; amariogi e chinyoni natabobore omonto korwa ase chitoro, na amariogi ’abaiseke bagotera nakee. 5Abanto nigo barabe nobwoba ase ebitiiro, na okogoswa kobe ase chinchera. Emelozi nesiche, na ebisase bibe bikwagura ng’ora ng’ora, na okogania gwonsi ngosire.
Eyio nengaki mwanyabanto aragende ase obomenyo bwaye bwa kare na kare; abakona‐korera mbabe bakomochiera ekero ase ekero. 6Engori eroisirie korwa ase efeta nebutorwe, na egetaabo keroisirie korwa ase etahabu ngiatwe, na enyongo yatwe agwo ase ensoko y’amache, na ekebara‐bara nkebunwe agwo ase egesima ki’amache. 7Erio orotu ndoirane, ase riroba buna rwarenge, na omoika oirane gochia ase Nyasae oria oyoruete.
8Ase ayio omorandia nigo agoteba. Aya mbosa, bosa; onsi mbosa kegima.
Okobekwa amo kw’amang’ana
9Ekiagera omorandia oria arenge omong’aini, akagenderera kworokereria abanto chisemi na korua ogosemia okuya. Agasangereria na gotuka, naende akaroisia emereng’anio emenge. 10Akarigia konyora amang’ana arenge kogokia, akarika amang’ana ’ekeene ase oboronge. 11Amang’ana abanto abang’aini bagokwana nigo anga buna chimbambo chinyoge, na aya basangereirie anga buna emesumari eakeire bokong’u. Ayio onsi nebiegwa korwa ase Omorisia oyomo.
12Aye omwana one, kobua ase aya onsi, igwera ogokurerwa oko. Okorika ebitabu ebinge tikori nomoerio; ogosoma okonge nigo gokorosia omobere.
13Amang’ana onsi aigurwe, Omoerio bw’amang’ana onsi noyo: Omoiroke Nyasae na obwate amachiko aye, ekiagera ayio naro abanto bonsi bagwenerete bakore. 14Nyasae narente kera ogokora ase ekina ekero aranachere obobisi bwonsi ekina, karabe amaya gose amabe.
Currently Selected:
OMORANDIA 12: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
