2 SAMWELI 7
7
Nathani okorentera Daudi amang’ana ’Omonene
(1 Am ’Eb 17:1–15)
1Bono omoruoti Daudi nigo amenyete ase enyomba yaye, na Omonene konya omoeire obotoereru korwa ase ababisa baye bonsi, abwo bamoetanaine. 2Erio agatebia Nathani, omobani, “Rora, inche nigo imenyete ase enyomba eagachire nemecharake korende Esanduku ya Nyasae ero nigo emenyete ime ase eema.”
3Nathani agatebia omoruoti, “Genda okore ande onsi ayare ase ebirengererio biao, ekiagera Omonene nigo are amo naye.”
4Korende ase obotuko obwo, ring’ana ri’Omonene rigacha ase Nathani, rikamotebia, 5“Genda otebie Daudi, omosomba one, ng’a inche Omonene nigo ngoteba iga: Inee! Nong’agachere enyomba ndamenye imeo? 6Korwa engaki eria nang’anyetie Abaisraeli korwa Misiri goika rituko ria rero inche tinana komenya ime ase enyomba, korende nabeire nkogenda aande onsi imenyete ase eema. 7Aase aande onsi nabeire nkona‐kogenda amo n’Abaisraeli, tinana koboria mogambi onde bw’Abaisraeli, oyo nabegete akaba omorisia bw’abanto baane, nase ki otang’agachereti obomenyo bw’emecharake.
8“Gaki bono naende kwana nomosomba one Daudi, omotebie amang’ana aya: Omonene bw’Emeganda nigo agoteba iga: Nigo nakorusetie korwa ase oborisia aase kware gotunyana ching’ondi, ngakobeka okaba omogambi bw’abanto baane Abaisraeli. 9Nigo nare kogenda amo naye aande onsi ase kware kogenda na kobaseria gochia aare ababisa bao korwa ase obosio bwao. Ninkore erieta riao ribe rinene, buna amarieta ’abanto bande bare abanene ase ense. 10Ninyorere abanto baane Abaisraeli aase ndababeke bamenye ase obotoereru. Abanto ababe tibakobachanda naende, buna babachandete kare. 11Korwa engaki eria nachorete abagambi bagambere abanto baane Abaisraeli. Ninkoe obotoereru korwa ase ababisa bao bonsi. Kobua ayio onsi, inche Omonene nigo nkogotebia ng’a ninkoroiserie enyomba. 12Ekero amatuko ao ay’ogokwa araike, na orare ase chisokoro chiao, nimbeke oyomo bw’oroiboro rwao abe omoruoti, ninkore oboruoti bwaye bobe ne chinguru. 13Ere naagachere erieta riane enyomba, nainche ninkong’ie oboruoti bwaye bobe ne chinguru kogenderera botambe. 14Inche nimbe ise, nere nabe omwana one. Ekero arakore ebibe nimoe egesusuro nenyimbo na amaakwa aya mwanyabanto bakoegwa. 15Korende obwanchani bwane botari koera tinkoborusia asare buna naborusetie ase Saulo oyio natigeretie korwa ase obosio bwao. 16Enyomba yao na oboruoti bwao nigo birakong’igwe bibe ne chinguru ase obosio bwane kare na kare, na ekerogo kiao ki’oboruoti nigo keratenene bokong’u kare na kare.”
17Nathani agatebia Daudi amang’ana ayio onsi buna ayaigwete na koyarora.
Ogoaka ng’a mbuya mono gwa Daudi, na ogosaba kwaye
(1 Am ’Eb 17:16–27)
18Erio Daudi omoruoti agasoa akabeera ase obosio bw’Omonene, akabora, “Aye Omonene Nyasae, inche inki ng’isaine, na eamate yane inki eisaine, ng’a aye gwankoreire amang’ana amaya iga? 19Naende ring’ana eri tiriisaini kende asore, aye Omonene Nyasae. Boigo gwakwanire igoro y’ororeria rwane, inche omosomba oo, na igoro y’ebiaare bigochi‐gocha. Ee, aye Omonene Nyasae, amang’ana ayio igo kwayakwanire ase mwanyabanto. 20Inche Daudi, inki ndagotebie naende kobua ayio? Aye Omonene Nyasae, nigo omanyete inche, omosomba oo. 21Ase engencho y’eira yao na koreng’ana nogwancha kwao, aye Omonene, gwakorire amanene ayio onsi, naende kwayamanyekanirie asende, inche omosomba oo. 22Ase ayio, igo ore omonene, aye Omonene Nyasae! Onde tari onga buna aye, gose Nyasae onde tari, otatiga aye bweka, koreng’ana buna ayio konya twaigure namato aito. 23Naende mbanto ba gesaku ki bare ase ense bare buna Abaisraeli bao, abwo aye Nyasae kwabooretie babe abanto bao, na igo gwakorire erieta riao rimanyekane. Ogakorera abanto bao abwo kwebooreretie korwa Misiri amang’ana amanene, na ay’ogokumia, ekiagera nigo gwaseretie korwa asebare abanto b’ebisaku amo ne chinyasae chiabo. 24Aye gwekoreire abanto bao Abaisraeli babe abanto bao kare na kare, naye Omonene kwabeire Nyasae obo.
25“Gaki bono, Omonene Nyasae, ikerania onsi aya kwariete eira igoro yane na ase ororeria rwane, na okore aya gwatebete ng’a nokore, 26erinde erieta riao ritogigwe kare na kare. Erio abanto bariatore botambe, bagoteba: Omonene bw’Emeganda, nere Nyasae bw’Abaisraeli. Ase enchera eyio enyomba y’omosomba oo, inche Daudi, ekong’igwe ase obosio bwao. 27Aye Omonene bw’Emeganda, Nyasae bw’Abaisraeli, kwang’orokeirie inche, omosomba oo, aya onsi, kogoteba: Ninkoagachere enyomba. Ase ayio inche, omosomba oo, nabeire noboremu ase enkoro yane kogosaba ogosaba oko.
28“Na bono, aye Omonene, aye naye Nyasae, na amang’ana ao naro ekeene, na kwandiereire inche, omosomba oo, eira ng’a onkorere ring’ana eri rigiya. 29Gaki bono, koranche osesenie enyomba yane, inche omosomba oo, erinde egenderere kare na kare ase obosio bwao. Aye Omonene Nyasae, kwariete eira eyio. Ase igo enyomba yane, inche omosomba oo, esesenigwe kare na kare nogosesenigwa kwao.”
Currently Selected:
2 SAMWELI 7: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
