2 SAMWELI 6
6
Esanduku ya Nyasae ekorentwa Yerusalemu
(1 Am ’Eb 13:1–14; 15:25—16:6,43)
1Naende Daudi agasangereria abanto bonsi abachoretwe korwa ase Abaisraeli, chilifu emerongo etato (30,000). 2Ere na abanto abwo bonsi barenge komo bakagenda Baala‐Yuda kwoyia Esanduku ya Nyasae, eyio ekorokwa ase erieta ri’Omonene bw’Emeganda, oyomenyete nobonene igoro y’abakerubi. 3Korwa ase enyomba y’Abinadabu, agwo ekegoro igoro, bakarusia Esanduku eria, bakayebeka igoro ase egari enyia. Usa na Ahiyo, basinto b’Abinadabu, bakaba bakoraa Esanduku eyio ya Nyasae. 4Kobayerusirie korwa ase enyomba y’Abinadabu agwo ekegoro igoro, Ahiyo nere oyetang’aine. 5Daudi na Abaisraeli bonsi bakaba bagochenga na gotera ase ogotogia Omonene; bakabugia amakano, na ebibangarara, ne chindege, na ebinto binde bi’ogochengera.
6Ekero barabwo baikire ase ekeooreri kia Nakoni, chiombe chiarenge kong’usa egari eria chikarichanigwa. Ase igo Usa akarambora okoboko kwaye gosiira Esanduku eyio ya Nyasae. 7Erio Omonene akaba nendamwamu enene ase Usa, akamoaka, ekiagera akunete Esanduku eria ya Nyasae, na Usa agakwera agwo agwo. 8Daudi akagechigwa mono, ekiagera Omonene aitete Usa, na igo akaroka aase aria Peresi‐Usa; naboigo akorokwa nonya ngoika rero iga.
9Ase rituko riria Daudi akoboa Omonene, akaboria, “Naki rende ndakore imbe noboremu ndete Esanduku y’Omonene bwone?” 10Ase igo Daudi tancha koira Esanduku eria y’Omonene ase omochie okorokwa Omochie o Daudi, korende akayebogoria na koyebeka nyomba mwa’Obedi‐Edomu o Gati. 11Ekabeera ase enyomba y’Obedi‐Edomu ase engaki y’emetienyi etato, na Omonene agasesenia Obedi‐Edomu na abanto bonsi b’enyomba yaye.
12Daudi agatebigwa ng’a, ase engencho y’Esanduku eria ya Nyasae Omonene osesenirie abanto b’enyomba y’Obedi‐Edomu, amo nebinto bionsi abwate. Erio akagenda akoyia Esanduku eria korwa ase enyomba y’Obedi‐Edomu, akayerenta ase omochie oye ore nomochengo omonene. 13Ekero abanto abwo babogoretie Esanduku eria y’Omonene bagendire ebitambokero bitano na ekemo, Daudi akanyenya eng’ombe eyemo, na emori eyemo enoru, chikaba ebing’wanso. 14Daudi akaba ogotenga ne chinguru chiaye chionsi ase obosio bw’Omonene, obegete egesibao kiaroisirie korwa ase egatani. 15Naboigo Daudi na Abaisraeli bonsi bakarenta Esanduku y’Omonene, bakaba bagoaka amariogi ’omogoko na kobugia egetureri.
16Ekaba ekero Esanduku eria y’Omonene yare korentwa ase Omochie o Daudi, Mikali, mosubati o Saulo, akarigereria korwa ase ekebao, akarora Daudi omoruoti ogocharoka‐charoka na gotenga ase obosio bw’Omonene, akamochaya ase omoyo oye ime. 17Abanto baria baare korenta Esanduku eria y’Omonene, bakayebeka aase aye eema ime, eema eria Daudi ayeteneneretie. Erio Daudi akarua ebing’wanso bi’ogosambwa na ebi’omorembe agwo ase obosio bw’Omonene. 18Na ekero Daudi akoorire korua ebing’wanso biria, agasesenia abanto ase erieta ri’Omonene bw’Emeganda. 19Erio akagaba endagera ase omoganda bwonsi bw’Abaisraeli, abasacha na abakungu; kera oyomo akaegwa omogati oyomo, na akanyama gake, na amasabibu amomo. Erio kera omonto akarua agwo, akagenda bwoye.
20Ekero Daudi airanete inka bwoye gosesenia abanto baye, Mikali, mosubati o Saulo, agasoka korotota Daudi, akabora, “Mbonene ki omoruoti bw’Abaisraeli akwenyorera rero ekero aorokirie obogetirianda bwaye ase abaiseke b’abasomba baye buna omonto omoriri.”
21Daudi akairaneria Mikali, “Nigo narenge gotenga na kogoka ase obosio bw’Omonene, oyo onchorete inche ribaga ria iso, na enyomba yaye yonsi, nkaba omogambi igoro y’Abaisraeli, abanto baye. Ase ayio, goika ngenderere gochenga ase Omonene. 22Naende ninganetie nyekeyie goetania buna nakora aiga rero, imbe omoitongo. Nonya aye kogonchaya, abaiseke abwo b’abasomba gwakwana, barawo mbansike mono.”
23Na Mikali, mosubati o Saulo, taiborete mwana nonya noyomo goika ogokwa kwaye.
Currently Selected:
2 SAMWELI 6: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
