2 SAMWELI 18
18
Abisalomu okobugwa na goitwa
1Omoruoti Daudi akaroberia abanto baye, akabaatanana ase ebiombe bi’elifu elifu, na ebie rigana rigana, akababekera abatang’ani 2Erio agatoma abarwani bagende korwana esegi, bare ebiombe bitato, ekemo inse y’oboraai bwa Yoabu, ne egia kabere inse y’oboraai bw’Abisai, omomura bw’omokungu Seruya, oyorenge ng’ina Yoabu boigo, na egia gatato inse y’oboraai bwa Itai korwa Gati. Omoruoti agatebia abanto baye, “Nigo nkogenda amo nainwe inche omonyene.”
3Korende abanto bakamoiraneria, “Aye tobaisa kogenda amo naintwe. Naki gatoratame, barabwo tibagotoraara. Nonya abanto baito nabaisa goitwa ekeng’ese ki’omobaro, tobagotoraara. Aye nigo ore bw’engencho enene asetore kobua abanto baito chilifu ikomi. Ase ayio igo erabe buya obeere ase omochie na gotokonya korwa aroro.”
4Omoruoti akabairaneria, “Aya mwarora ng’a namaya naro ngokora.” Ase ayio omoruoti agatenena geita ensemo ekero abarwani baare gosoka gochia isiko ase ebiombe bi’amagana ne chilifu. 5Omoruoti agachika Yoabu, na Abisai, na Itai, akabatebia, “Ase engencho yane timokorera omosae oyio Abisalomu bobe.” Na abanto bonsi mbaigwete ekero omoruoti akoa abatang’ani abwo ogochika okwo igoro y’Abisalomu.
6Abarwani ba Daudi bakagenda orosana korwania Abaisraeli, na esegi ekarwanerwa ase rinani ri’Efraimu. 7Abaisraeli bakabugwa nabarwani ba Daudi. Ogoitwa okwo gokaba okonene, na ase rituko riria abanto chilifu emerongo ebere bagaitwa. 8Esegi nigo yesiarerete ase orosana rwonsi rw’aase aria, na ase rituko riria abanto abange bagakwera ase rinani ime kobua abwo baitetwe nemioro.
9Abisalomu akaumerana nabasomba ba Daudi mobosokano. Nigo ariinete eyombo yaye, nero egaeta inse y’omote onga buna omotontera ore ne chinsagia chinetu, na omotwe bw’Abisalomu okaaga ase omote oria igoro, nere agatigara osung’unaneteo, na eyombo yaye egaeta akaminyoka. 10Omonto gete akamorora, akagenda ase Yoabu akamotebia, “Narora Abisalomu osung’unaine agwo moino ase omote onga buna omotontera.”
11Yoabu akamoiraneria, “Onye kwamorora, ninki kiaba tikwamoita ara rimo? Inche anga naba nomogoko inkoe chibesa chisekeli chie chifeta ikomi, amo norokini.”
12Omonto oria agatebia Yoabu, “Nonya kware kong’a chisekeli chie chifeta elifu eyemo, tinare korambora okoboko kwane igoro y’omwana bw’omoruoti, naki twensi ntwaigwete ekero omoruoti agochigete aye, na Abisai, na Itai, ogoteba: Ase engencho yane orende omosae oyio Abisalomu. 13Onye nanga tinyigwera omoruoti, korende ing’ite omwana oye, ere anga naigwa amang’ana ayio, ekiagera nigo are komanya kera ring’ana. Inee! Aye omonyene ngonkengera kware?”
14Erio Yoabu akabora, “Tinkora gosaria chingaki gokwana naye boire.” Akaimokia amatimo atato, akabeta Abisalomu egekuba igoro, agachia konacha enkoro, ekero Abisalomu asung’unanete ase omote igoro ore moyo. 15Erio abamura ikomi ababogoreretie Yoabu ebirwanero, bagaetanana Abisalomu, bakamoaka na komoita.
16Nyuma y’ayio Yoabu akabugia egetureri ase ogotanga esegi, na abanto bakairana bagatiga kobwatia Abaisraeli. 17Abanto bakaimokia omobere bw’Abisalomu, bakayoruta ase engoro entambe, agwo ase rinani, bakayotuba amagena akaba etui enene, na Abaisraeli bonsi bagatama kera omonto gochia bwoye.
18Ekero Abisalomu arenge moyo konya bweagacheire egento buna esiiro, agakebeka agwo ase Ense Omweya y’Omoruoti gekaba ekeinyorio ki’erieta riaye; akarengereria ng’a tari na monyamwando. Akayeroka ase erieta riaye omonyene; na goika rero iga nigo ekorokwa Ekeinyorio ki’Abisalomu.
Daudi ogotebigwa igoro y’ogokwa kw’Abisalomu
19Ahimasi, mosinto o Zadoki, agatebia Yoabu, “Tiga iminyoke ntebie omoruoti amang’ana, buna Omonene amotooririe korwa ase ababisa baye.”
20Yoabu akamokania, akamotebia, “Yaya, rero tokonyara koba omonto okoira amang’ana amaya. Rituko rinde nonyare koira amang’ana amaya, korende tari rero, ekiagera omwana bw’omoruoti okure.” 21Erio Yoabu agatebia Omoetiopia oyomo, “Genda otebie omoruoti aya kwarora.” Na Omoetiopia oria agekumba inse ase obosio bwa Yoabu, akaminyoka kogenda.
22Ahimasi, mosinto o Zadoki, agatebia Yoabu eria kabere. “Ande onsi arabe, koranche ong’e ribaga iminyoke korwa nyuma y’Omoetiopia oria ng’irere omoruoti amang’ana.”
Yoabu akamoboria, “Omwana one, gokominyoka, ninki orachie konyora? Ayio tari amang’ana amaya airwa.”
23Ahimasi akamoiraneria, “Ayio tari mang’ana, ing’a ribaga ngende.”
Yoabu akamoiraneria, “Minyoka rende.” Erio Ahimasi akaminyoka agaetania Omoetiopia oria agwo ase ense omweya ya Yorodan.
24Bono Daudi nigo aikaransete egati y’ebiita bibere bi’omochie, egia isiko na ekia ime. Omorendi akariina gochia kerama igoro y’ebiita, ang’e norwaki. Na ekero arigereretie akarora omonto oyomo okominyoka gocha ore bweka. 25Omorendi akarangeria gochia inse, agatebia omoruoti amang’ana ayio. Na omoruoti akamotebia, “Onye ore bweka nigo abwate amang’ana amaya.” Omonto oria akaba ogoika ang’e kobua.
26Naende omorendi akarora omonto onde okominyoka gocha ore bweka. Erio akarangeria omorendi bw’egesieri, akamotebia, “Omonto onde oyio gocha ore bweka!”
Omoruoti agateba, “Nere boigo namang’ana amaya abwate.”
27Omorendi agateba, “Nigo ndoche ng’a omominyoki oria bwe ritang’ani nigo anga buna Ahimasi, mosinto o Zadoki.”
Erio omoruoti agateba, “Ere nomonto omuya, nigo akorenta amang’ana amaya.”
28Ahimasi agaaka eriogi, agatebia omoruoti, “Nomorembe!” Naende agatung’ama inse, akaumama ase obosio bw’omoruoti, akabora, “Omonene, Nyasae oo, atogigwe, oyo obarusirieo abanto aba konya baimokirie amaboko abo igoro yao, aye omoruoti, omonene one.”
29Omoruoti akamoboria, “Inee! Omosae oria Abisalomu mbuya are?”
Ahimasi akamoiraneria, “Ekero Yoabu antoma, inche, omosomba oo, nigo naigwa egetitiro ekenene, korende tinamanya engencho yaye.”
30Omoruoti akamotebia, “Tigera, otenene agwo ensemo,” na Ahimasi agatigera, agatenena ensemo.
31Omoetiopia nere agacha, agatebia omoruoti, “Nakorenteire amang’ana amaya, aye omonene one. Rero Omonene okoruseirie egesiomba ase baria bakoimokera gokorwania.”
32Omoruoti akaboria Omoetiopia oria, “Inee! Omosae oria Abisalomu mbuya are?”
Omoetiopia oria akamoiraneria, “Nigo nare kogania ng’a aya amonyora omosae oria, abanyore nababisa bao bonsi; boigo anyore nabaria bagokoimokera kogokorera bobe.”
33Omoruoti agachandeka mono, akariina gochia akanyomba karenge ase egeita igoro, akarera nobororo, akaba ogotaara‐taara na goteba, “Abisalomu, omwana one! Obee! Omwana one! Abisalomu, ntare gokwa ribaga riao! Abisalomu, omwana one!”
Currently Selected:
2 SAMWELI 18: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
