1 TIMETHEO 6
6
1Bonsi abare inse y’obosibwa bw’obosomba babare abanene babo ng’a mbagwenerete ogosika gwonsi, erinde erieta ria Nyasae tiriramwa, gose okworokereria gwaito. 2Na baria bare nabanene abegeni tibabachaya ekiagera nabamwabo bare, korende babakorere buya kobua, ekiagera abwo bakoreirwe emeremo emiya nigo bare abegeni na abanchwa.
Bworokererie amang’ana aya, na gokurera.
Chingencho chi’obonyasae amo nogoisaneka
3Onye omonto okworokereria okworokereria konde okoao, na tabwataini namang’ana ’Omonene oito Yeso Kristo, ayare ay’obogima, na okworokereria kobwataine ne chingencho chi’obonyasae, 4ere oenenire, na tamanyeti ing’ana rinde rionsi. Ere nigo are omonto ore noborwaire bw’omoyo ase amaborio na okoamererania kw’amang’ana. Ase amang’ana aya nigo bikorwao emoko, na eriomana, na oborami, na ogokagera okobe, 5na okoamererania gotari konucha ase egati y’abanto abasarekire ase ebirengererio biabo, na baurirwe ekeene. Baria bagokaga ng’a okoba ne chingencho chi’obonyasae nenchera y’okonyora. 6Ekeene, okoba ne chingencho chi’obonyasae amo nogoisaneka nokonyora okonene, 7inaki titwachete na gento ase ense, naende titokoira gento korwa ase ense. 8Gaki, onye tore nendagera ne chianga, inatoisaneke nebinto ebio. 9Korende abwo barigetie koba abanda nigo bakogwa ase ogoteemwa na omoeto, na okogania okonge gotari nengencho, kore okw’ogosaria, okwo gokorimeria mwanyabanto bachie gosira na gosareka. 10Naki omochakano bw’amabe onsi nogwancha chibesa. Abande kobakogania ayio, nigo bakweatanana korwa ase okwegena, na kwebeka abanyene ase obororo obonge.
Esegi engiya y’okwegena
11Korende aye, omonto o Nyasae, tama ayio onsi, rigia oboronge, ne chingencho chi’obonyasae, na okwegena, na obwanchani, na oboremereria na obwororo. 12Rwana esegi ere engiya y’okwegena, bwata obogima bwa kare na kare, obo kwarangereretigwe konyora, na kwaorogetie ase okoorokia okuya ase obosio bw’abarori abange. 13Nagochikire ase obosio bwa Nyasae, oyokoa ebinto bionsi obogima, na ase Kristo Yeso, oyoruete oborori obuya ase Pontio Pilato, 14ng’a obwate ogochika oko, obe otari na kemoa, gose na komocha, goika Omonene oito Yeso Kristo aorokigwe. 15Oyosesenirie, oyore nokobua ere bweka, Omoruoti bw’abaruoti, Omonene bw’abanene, orache gotwo rokia okoorokigwa okwo ase ekero kiaye. 16Nere bweka otari konyorekana namakweri, nigo amenyete ase omobaso otanyare goikwa ang’e, na onde tari ase mwanyabanto omoroche gose oranyare komorora. Asare ere ogosika na okobua kare na kare. Amina.
17Obachike abwo bare abanda ase ense eye ya bono tibaenena, gose gosemeria obonda boria bogosira, korende bamosemerie Nyasae, oyogotoa ebinto bionsi ase obonge, tobikorere ase omogoko. 18Obachike naende bakore amaya, babe abanda ase ogokora okuya, babe ang’e korua chinibo chiabo, na gwatanera abande ase emioyo emiya, 19begacheire abanyene oboroso obuya ase ekero kegochigocha erinde babwate obogima obore obogima bw’ekeene.
20Aye Timotheo, renda aya abekirwe asore. Bweatanane korwa ase amang’ana atari ne chingencho chi’obonyasae, na korwa ase okoamererania ase aya akorokwa chisemi, korende nay’oborimo. 21Naki abande babwatirie ayio, na basirire korwa ase okwegena.
Obuya bobe amo nainwe mwensi.
Currently Selected:
1 TIMETHEO 6: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
