1 SAMWELI 30
30
Daudi okorwania Abaameleki
1Ase rituko ria gatato Daudi na abanto baye bagaika Sikilagi. Abaameleki konya bachakire esegi agwo Negebu na Sikilagi. Na bono konya babuire Sikilagi na koyosamba nomorero, 2boosire abakungu na bonsi abarengeo, abake na abanene. Tibaitete monto onde, korende nigo babairete, bakagenda nabarabwo. 3Ekero Daudi na abanto baye bachete ase omochie oyio, bakanyora ng’a osambirwe, na abakungu babo amo nabamura na abaiseke babo bairirwe ase obosomba. 4Erio Daudi na abanto baria barenge komo bagaaka amariogi abo, bakarera mono goika chinguru chikabaerera. 5Abakungu ba Daudi bonsi babere, Ahinoamu korwa Yesireeli, na Abigaeli, oyotigetwe omoboraka orenge moka Nabali o Karimeli, konya bairirwe ase obosomba nabarabwo.
6Daudi akaba nemechando emenene, ekiagera abanto nigo barengereretie komoaka amagena bamoite. Barabwo nigo barenge nobororo obonge ase engencho y’abana babo abamura na abaiseke. Korende Daudi akanyora chinguru korwa ase Omonene Nyasae oye. 7Daudi agatebia Abiatari omokuani, mosinto bw’Ahimeleki, “Ndetere egesibao ki’obokuani.” Abiatari akarentera Daudi egesibao keria. 8Daudi akaboria Omonene, akabora, “Inee! Ndabwatia omoganda oyo bw’abauri? Nimbaikere gose?”
Omonene akamoiraneria, “Babwatie! Nobatoorie abanto boosirwe.”
9Erio Daudi amo nabanto baye amagana atano na rimo bakagenda, bagaika ase akarooche ka Besori. Agwo abanto bande bagatigara nyuma. 10Daudi amo nabanto amagana ane bakagenderera kobwatia ababisa baria. Abanto baria bande amagana abere bakarosa mono, bagasinywa kwamboka; ase igo bagatigara ase akarooche karia Besori. 11Abanto baria ba Daudi bakanyora omomura omosae bw’Abamisiri agwo ase arenge aarabu, bakamorenta ase Daudi, bakamoa omogati akaria, na amache akanywa, 12naende bakamoa amako amomo, na amabomba abere ay’amasabibu amomo, na ekero arire, akanyora chinguru. Ase engaki y’amatuko atato konya atana koria gento, gose konywa. 13Daudi akamoboria, “Noyo ng’o ore? Seino ng’ai?”
Omosae oria akairaneria, “Inche nigo inde omomura bw’Abamisiri na omosomba bw’omonto oyomo Omoameleki. Bono amatuko atato aerire korwa ekero omonene one antigete, ekiagera nabete omorwaire. 14Intwe nigo twasanyorera Negebu aase Abakereti bamenyete, na ensemo ere ey’Abayuda na ey’abanto ba Kalebu. Boigo togasamba Sikilagi nomorero.”
15Daudi akamoboria, “Inee! Nonyare kong’ira na konyorokia aase abauri abwo bare?”
Omomura oria akairaneria, “Tiana ase Nyasae ng’a tokong’ita, gose tokombeka ase okoboko kw’omonene one; rirorio ninkoire nkwoorokie aase omoganda oria ore.” 16Erio akaraa Daudi gochiao.
Abauri abwo nigo baserebekanete aande onsi bakoria, bakonywa na kwegokia, ekiagera konya banyorire ebisakorwa ebinge korwa ase ense y’Abafilisti na ense ya Yuda. 17Daudi akabarwania korwa mogoroba kobokomura‐mura goika mogoroba rituko ria kabere. Agaita abanto bonsi otatiga abamura amagana ane abariinete chingamia batamete. 18Daudi akairania ebinto bionsi, na abanto bonsi, aba Abaameleki konya bairire, amo nabakungu baye babere. 19Onde tasirete nonya noyomo, omoke gose omonene. Kera omwana, omomura gose omoiseke, o kera omonto nigo atooretigwe, na ebinto bionsi boigo. Daudi akairania abanto bonsi, na ebinto bionsi pi. 20Boigo Daudi akairania ching’ondi, ne chimbori, ne chiombe. Abanto baye bagachitang’ania bosio bwaye, bagateba, “Ebi nebisakorwa bia Daudi.”
21Erio Daudi akairana gochia ase abanto baria amagana abere konya barosire batigarete agwo ase akarooche ka Besori. Ekero aigete ang’e, barabwo bagacha komorotota, ere na abanto baria barenge komo. Daudi akabachiera, akabakwania. 22Korende abanto bande ababe abatagwenerete ase abwo bagendete na Daudi bakabora, “Ekiagera abanto aba tibagendete amo naintwe, titokobaa gento kende gionsi ase ebi twasakoire, otatiga kera omonto araegwe mokaye na abana baye, aire bwoye.”
23Korende Daudi akabatebia, “Abaminto, timobaisa gokora igo nebinto ebi Omonene atoiraneirie. Ere ototooririe, obekire ase amaboko aito abanto baria abauri abwo batoumokerete. 24Ning’o oranyare kobaigwera ase amang’ana buna ayio? Yaya, buna abanto abwo bagendete korwana esegi bakoegwa ebisakorwa, naboigo nabwo batigarete nyuma korenda ebinto baraegwe. Nigo baragaberwe bareng’anie.” 25Korwa ase rituko erio Daudi agakora ring’ana erio rikaba ogochika ase Abaisraeli. Naboigo rire nonya ngoika rero iga.
26Ekero Daudi aigete Sikilagi, agatoma ebiegwa ase abagaaka b’Abayuda abwo barenge abasani baye, akabora, “Ebiegwa ebi nebisakorwa korwa ase ababisa b’Omonene.” 27Naboigo abitomerete abagaaka ba Beteli na Ramoti agwo Negebu, na abwo b’emechie ya Yatiri, 28na Aroeri, na Sifamoti, na Esitemoa, 29na Rakali; abwo b’emechie y’Abayerameli, na Abakeni, 30abwo ba Horima, na Bori‐Asani, na Ataki, 31na Heburoni. Agatoma ebiegwa ase chinsemo echio chionsi ase arenge kona‐gotaarera amo nabanto baye.
Currently Selected:
1 SAMWELI 30: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
