1 SAMWELI 16
16
Daudi ogoakwa amaguta koba omoruoti
1Omonene agatebia Samweli, “Ngoika ririri oragenderere koba nomoichano ase engencho ya Saulo. Inche namwangire, takogenderera koba omoruoti, bw’Abaisraeli. Ichoria orogunchara rwao amaguta, ngotome ogende o Yese, omonto o Bethlehemu, ekiagera nechoreire oyomo bw’abamura baye abe omoruoti.”
2Erio Samweli akamoboria, “Naki ndakore ngende? Saulo aise koigwa amang’ana ayio, nigo arang’ite.”
Omonene akamoiraneria, “Bwata ritororo, oriire, otebe ng’a: Nekeng’wanso nachire komoruera Omonene. 3Orangerie Yese ache ase ekeng’wanso, nainche ninkworokie aya orakore, erio oake omonto oyo ndagotebie amaguta.”
4Samweli agakora ayio Omonene amochigete, akagenda Bethlehemu. Abagaaka b’omochie oria bagacha komorotota bakoiguswa bakamoboria, “Inee! Ngwachire namang’ana ’omorembe?”
5Samweli akabairaneria, “Ee, nachire nomorembe. Nigo nachire imoruere Omonene ekeng’wanso. Echene inwe abanyene, moche amo nainche ase ekeng’wanso ekio.” Erio agachena Yese amo nabamura baye na akabarangeria bache ase ekeng’wanso ekio.
6Ekero bachete agwo, Samweli akarigereria Eliabu, erio akarengereria, “Ekeene, omonto oyo oteneine aiga ase obosio bw’Omonene, nere omoakwa amaguta oye.” 7Korende Omonene agatebia Samweli, “Torigereria ekieni kiaye, gose obotambe na obuya bw’ogokina kwaye; oyio namwangire, ekiagera tindi korigereria buna mwanyabanto akorigereria. Mwanyabanto nigo akorora ekieni gia isiko, korende inche Omonene nigo nkorora ime y’enkoro.”
8Erio Yese akarangeria Aminadabu, akamoetia ase obosio bwa Samweli. Samweli agateba, “Nonya noyo, Omonene tamochoreti.” 9Yese akarenta Sama. Boigo Samweli agateba, “Omonene tamochoreti oyo.” 10Yese akarenta abamura baye batano na babere bagaeta ase obosio bwa Samweli, korende Samweli akamotebia, “Omonene tachoreti onde omo ase aba.” 11Naende akaboria Yese, “Inee! Abamura bao bonsi nabwo aba?”
Yese akamoiraneria, “Omoke omwabo nagatigarete korisia ching’ondi.”
Erio Samweli agatebia Yese, “Toma omonto achie komorenta, titogoikaransa koragera ere ataracha aiga.” 12Erio Yese agatoma omonto korenta omwana oria omoke, Omwana oria nigo arenge omobariri, obwate amaiso amaya, naende orenge omonyakieni. Omonene agatebia Samweli. “Omomura oria nere oyio, moake amaguta.” 13Ase ayio Samweli akaimokia orogunchara rore namaguta, na agwo ase amasio ’abamura bamwabo agaaka Daudi amaguta. Omoika bw’Omonene ogacha igoro ase Daudi, na korwa rituko riria okabeera asare kogenderera. Erio Samweli akarua agwo, akairana Rama.
Daudi ase enyomba ya Saulo
14Omoika bw’Omonene konya orure ase Saulo, omotigire, na omoika omobe okorwa ase Omonene okaba okomochanda. 15Abasomba baye bakamotebia, “Rigereria bono, Omoika omobe okorwa ase Nyasae nkogochanda ore. 16Gaki, omonene oito, tochike intwe abasomba bao, tokorigerie omonto omanyete kobugia obokano buya, na ekero omoika oyio omobe okorwa ase Nyasae ogocha igoro asore, omonto oyio nabe okobugia obokano, erinde aye obe buya naende.”
17Saulo akabatebia, “Mbuya, mondigerie omonto omanyete kobugia obokano buya momondetere aiga asende.”
18Erio oyomo bw’abasomba baye akamotebia, “Yese, omonto o Bethlehemu, nabwate omomura omanyete kobugia obokano buya. Ere nigo are omonto omoremu, omanyete korwana esegi; amo nayio nigo are omonyakieni, omanyete gokwana buya, na Omonene nigo are amo nere.”
19Ase ayio Saulo agatoma abanto gotebia Yese, “Ntomere Daudi, omwana oo omomura, oyio okorisia ching’ondi.” 20Yese akaimokia etigere, akayeberekia emegati na ekerandi kerosirie korwa ase amasankwa kere nedivai, akaimokia nemanwa y’embori, akaa Daudi, omwana oye ebinto ebio, akamotoma gochia ase Saulo. 21Daudi agacha o Saulo, agachaka komokorera. Saulo akaba omwanchete mono, goika Daudi akaba okomobogoreria ebirwanero. 22Erio Saulo agatoma amang’ana ase Yese, akamotebia, “Tiga Daudi abeere aiga abe ogonkorera, ekiagera namwanchire mono.” 23Ase engaki ende yonsi omoika oria omobe okorwa ase Nyasae ore gocha igoro ase Saulo, Daudi igo are okobugia obokano. Erio omoika oria omobe oba okorua ase Saulo, nere oba ogokanyeka na kweigwa buya naende.
Currently Selected:
1 SAMWELI 16: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
