1 SAMWELI 15
15
Saulo okobua Abaameleki
1Samweli agatebia Saulo, “Ninche oria Omonene atomete kogoaka amaguta okaba omoruoti igoro ase Abaisraeli, abanto baye. Ase ayio, tegerera bono oigwe amang’ana ’Omonene. 2Omonene bw’Emeganda nigo agoteba iga: Ngochia inde korua egesusuro ase Abaameleki, ekiagera barabwo batangete Abaisraeli, ekero barenge ase orogendo rwabo korwa Misiri. 3Ase ayio, genda oite Abaameleki, obasirie kegima, osirie nebinto bionsi babwate. Tobaisa kobatiga babe moyo, korende oite bonsi, abasacha na abakungu, abana na ebing’werere; oite ne chiombe, ne ching’ondi, ne chingamia ne chitigere.”
4Erio Saulo akarangeria abanto, akabaroberia agwo Telaimu. Abarwani b’esegi abarenge gotaara namagoro nigo baare chilifu amagana abere (200,000), amo nabwo korwa ase Abayuda chilifu ikomi (10,000). 5Saulo akagenda ase omochie bw’Abaameleki, akababoera agwo ase rigoko. 6Erio agatebia Abakeni, “Eongore, morue ase Abaameleki timbaisa kobasiria amo nabarabwo. Inwe nigo mwabete abaya ase Abaisraeli, ekero baare korua Misiri.” Ase ayio Abakeni bakeongora, bakarua ase Abaameleki.
7Saulo akarwania Abaameleki akababua, gochakera Havila goikera Suri, moocha ya Misiri. 8Akabwata Agagi, omoruoti bw’Abaameleki, akamotiga ore moyo, korende abande bonsi pi akabaita nemioro. 9Saulo amo nabanto baye bagatiga Agagi ore moyo; boigo bagatiga ching’ondi chingiya, ne chiombe, ne chimori chinoru, ne chimanwa chie ching’ondi, na echi chionsi chiarenge chingiya. Echio chionsi tibanchete gochisiria, korende bagasiria chionsi echio chiarenge chindeu ne chimbe.
Saulo okwangwa taba omoruoti
10Erio ring’ana ri’Omonene rigacha ase Samweli, rikamotebia, 11“Naichanire ekiagera nabegete Saulo koba omoruoti, ere oonchokire, otigire konyigwera na tabwateti amachiko aane.” Ayio akamoichania Samweli, erinde akaba okorera ase Omonene obotuko obogima ng’a akonywe. 12Rituko ria kabere Samweli akaimoka mambia chuni, agachia konyorana na Saulo, agateberigwa agwo ng’a Saulo nachicha Karimeli ase okweroiseria ekeinyorio, naende ogendire Giligali. 13Erio Samweli akagenda ase Saulo, na Saulo akamokwania, akamotebia, “Omonene agosesenie. Naikeranirie aya Omonene anchigete.”
14Samweli akamoboria, “Inee! Eriogi eri ri’okwana gwe ching’ondi na ogwe chiombe inyigwete namato aane, neriaki?”
15Saulo akamoiraneria, “Abanto mbarenta ching’ondi ne chiombe korwa ase Abaameleki; nigo batiga echio chingiya mono chire moyo, erinde bachirue chibe ekeng’wanso ase Omonene, Nyasae oo, korende echinde chionsi nigo twachisiria kegima.”
16Erio Samweli akamotebia, “Kirakiri! Ngotebie aya Omonene antebetie ase obotuko obo bwaetete.”
Saulo agateba, “Kwana aye!”
17Samweli akamotebia, “Nonya kwaroche aye omonyene ng’a toisaini gento, Inee, aye tori omotang’ani ase ebisaku bi’Abaisraeli? Omonene igo akoagete amaguta obe omoruoti ase Abaisraeli. 18Omonene nigo agotomete, akagochika ogende, osirie kegima Abaameleki, abanto abwo ababe, obarwanie goika obaite obakoore. 19Nase ki rende otaigwerete aya Omonene agochigete? Nase ki kwarindokerete na koumokera ebisakorwa, ogakora ayare amabe ase obosio bw’Omonene?”
20Saulo akairaneria Samweli, “Ee, naigwera aya Omonene antebetie; nagenda aase antomete, nkarenta Agagi, omoruoti bw’Abaameleki, nigo naita kegima Abaameleki bande bonsi. 21Korende abanto mbarenta korwa ase ebisakorwa ching’ondi ne chiombe, echio chingiya mono chiaatananetwe ase ogosirigwa; mbachirenta, erinde bachirue chibe ekeng’wanso agwo Giligali ase Omonene, Nyasae oo.” 22Erio Samweli akamotebia, “Inee! Igo okorengereria ng’a Omonene nagokerete ebing’wanso bi’ogosambwa na ebing’wanso binde kobua okomoigwera? Naama! Okoigwera nokuya kobua ebing’wanso, na ogotegerera nokuya kobua ebitinya bie chimingichi. 23Ogosaria kw’ogotaigwera nigo konga buna ebibe bi’oborogi, na oboenenu nigo bonga buna ebibe bi’ogosasima emegwekano. Ekiagera kwangire ring’ana ri’Omonene, nere boigo okwangire, tokogenderera koba omoruoti.”
24Erio Saulo agatebia Samweli, “Nakorire ebibe, ekiagera nasaririe ogochika kw’Omonene na amang’ana ao gwantebetie. Nigo nairogete abanto, nkaba nkoigwera okogania kwabo. 25Gaki bono nagosabire, onyabere ebibe biane, oirane amo nainche, erinde inyare gosasima Omonene.”
26Samweli agakania Saulo, akamotebia, “Tinkonyara koirana amo naye, ekiagera kwangire ring’ana ri’Omonene, na Omonene okwangire, toba omoruoti igoro ase Abaisraeli.”
27Ekero Samweli arenge kweonchora kogenda, Saulo akabwata omokoba bw’eanga yaye y’okwambara, nero egatandoka. 28Erio Samweli akamotebia, “Rituko ria rero Omonene otandoire oboruoti bw’Abaisraeli, naborobwo bwarure asore, oboeire omonto omoao ore omuya gokobua. 29Nyasae, oyore Obonene bw’Abaisraeli, tagokwana oborimo, gose takweitia. Ere tari mwanyabanto erinde eitie.”
30Saulo agateba, “Inche nakorire ebibe, korende bono insike ase amaiso ’abagaaka b’abanto baane, na ase Abaisraeli; irana amo nainche, erio ngende gosasima Omonene, Nyasae oo.” 31Erio Samweli akairana, akabwatia Saulo, na Saulo agasasima Omonene.
Samweli ogoita Agagi, na gotigana na Saulo
32Samweli akabora, “Ndetera Agagi, omoruoti bw’Abaameleki, aiga.” Agagi agacha asare, ore nomogoko agakwana, “Ekeene, obororo bw’amakweri bwaerire.” 33Korende Samweli akamotebia, “Buna omoro oo otigire abakungu bare bosa batari nabana, naboigo nyoko agochia gotigwa bosa atari nomwana ase egati y’abakungu bande.” Na aroro agwo Samweli akanachana Agagi ebing’ese ase obosio bw’Omonene.
34Erio Samweli akagenda Rama, na Saulo akagenda bwoye agwo Gibea o Saulo. 35Korwa ase engaki eyio Samweli tagendete korora Saulo naende nonya ng’ake, korende akagenderera koba nomoichano ase engencho yaye. Na Omonene agaichana, ekiagera konya abekire Saulo koba omoruoti igoro ase Abaisraeli.
Currently Selected:
1 SAMWELI 15: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
