1 ABAKORINTO 7

Obokong’u bw’okonyuomana, na ogotanyuomana, na ogotigana

1Gaki ase amang’ana aya mwandikerete, mbuya omosacha takuna omokungu. 2Korende ase engencho y’amateemwa ay’ogokora obotomani kera omosacha abe na mokaye omonyene, na kera omokungu abe nomosacha oye omonyene. 3Omosacha ae omokungu oye ekemogwenerete; naboigo nomokungu ae omosacha oye ekemogwenerete. 4Omokungu tari nokobua igoro ase omobere oye, korende nomosacha oye; naboigo nomosacha tari nokobua igoro ase omobere oye, korende nomokungu oye. 5Timorinana otatiga mwancheranire ase egeka egeke, erinde monyare kwerua ase ogosaba; naende mobe amo, Saitani tacha kobateema ekiagera motanyare gwetanga. 6Aya nigo nkobatebia buna ndoche; tindi korua ogochika. 7Ayanyanchete naro aya, ng’a abanto bonsi babe buna inche omonyene inde. Korende kera omonto nare nekeegwa kiaye omonyene gekorwa ase Nyasae, oyomo iga, na oyonde iga.

8Bono nkobatebia nde baria bataranyuoma, na ababoraka, mbuya babe buna inche inde. 9Korende onye tibakonyara gwetanga, tiga banyuome, ekiagera mbuya konyuoma kobua gosambwa nokogania.

10Korende baria baikire konyuomana nabachikire, gose tari inche, korende Omonene, ng’a omokungu tatiga omosacha oye, 11(korende, karabe otiganire nere, atige tanyuomwa gose abwatane nomosacha oye naende), na omosacha tatiga mokaye.

12Abwo bande nkobatebia inche, gose tari Omonene, ng’a onye onde ominto ore nomokungu otegeneti na omokungu oyio bwanchire komenya nere, tamotiga. 13Na omokungu ore nomosacha otegeneti, na omosacha oyo bwanchire komenya nere, tamotiga. 14Naki omosacha oria otegeneti ochenirwe ase engencho ya mokaye, na omokungu oria otegeneti ochenirwe ase engencho y’omosacha oye. Onye taibo, abana baino anga tibaba abachenu; korende buna ere bono, babeire abachenu. 15Korende oria otegeneti karaganie gotigana, tiga atigane. Oyominto omosacha gose oyominto omokungu tasibiri ase amang’ana buna ayio, korende Nyasae obarangeirie ase omorembe. 16Aye omokungu, ng’ai oramanyere gose notoorie omosacha oo? Gose aye omosacha, ng’ai oramanyere gose notoorie omokungu oo?

17Kera omonto agenderere ase obogima obwo Omonene amogabeire na ase obwo Nyasae amorangereirie. Naboigo nachigete ase chikanisa chionsi. 18Monto onde bwensi orangerigwe na Nyasae ekero aikire kwaroka, tekora buna tarogeti, na monto onde bwensi orangerigwe otarogeti, taroka. 19Okwaroka tai gento, na ogotaroka tai gento, korende nokobwata amachiko a Nyasae. 20Kera omonto tiga abe buna arenge ekero arangeretigwe. 21Inee! Igo kwarangeretigwe kore omosomba? Torora ng’a mbobe; korende koranyare gosiborwa, mbuya obe bo. 22Naki oyorangeretigwe ase Omonene kare omosomba, nomosibore ase Omonene. Naboigo noyorangeretigwe osiboire, nomosomba o Kristo. 23Mokagorwa ase rigori, timoba abasomba b’abanto. 24Kera omonto, baminto, buna arenge ekero arangeretigwe, tiga aikaranse boigo ase Nyasae.

25Ase amang’ana ’abaiseke abekungi, tindi nogochika korwa ase Omonene, korende nabatebirie buna ndoche inche, buna oyonyorire amabera korwa ase Omonene koba omwegenwa. 26Narorire ng’a ring’ana eri nerigiya ase engencho y’emechando eye tore nero, ng’a mbuya omonto abe buna are. 27Inee! Gwasibirwe ase omokungu? Torigia gosiborwa. Nosiboire? Torigia omokungu. 28Korende koranyuome, tari ebibe gwakora; na omoiseke omwekungi karanyuomwe, tari ebibe akora. Korende abanto abwo nababe nemechando y’ense eye, na inche ninyanchete ng’a timosoa ase emechando eyio. 29Korende baminto, nigo ngoteba iga: Ekero getigarete negeke; gaki korwa bono baria bare nabakungu, tiga babe buna tibabwati; 30na baria bakorera babe buna tibari korera; na baria bagogete babe buna tibagogeti: na baria bakogora babe buna tibari na gento; 31na baria bagokorera ense eye babe buna tibari koyekorera, ekiagera ense buna ere bono ngoeta ere.

32Korende nindigetie ng’a timoba nogwechanda. Oyotaranyuoma nigo arengereretie amang’ana ’Omonene, buna aragwenere Omonene: 33korende oyonyuomire nigo akorengereria amang’ana ’ense eye, buna aragwenere mokaye; 34igo obeire nogwatananekana. Omoiseke omwekungi nigo akorengereria amang’ana ’Omonene, buna aranyare koba omochenu ase omobere na ase omoika, korende oyonyuomirwe nigo akorengereria amang’ana ’ense, buna aragwenere omosacha oye. 35Natebire aya ase okobakonya; tari ng’a nkobabekera nde egetango, korende ase engencho y’ayio abagwenerete, erinde monyare gokorera Omonene motang’usiri namang’ana ande.

36Korende monto onde bwensi kararore ng’a takorereti omoiseke oye omwekungi ayamogwenerete, na onye omoiseke oyio oeteire obuya bw’obosae bwaye, onye negwenerete, tiga omonto oyio akore buna arigetie; tari ebibe akora, amotige anyuomwe. 37Korende oyotenenire noboremu ase enkoro yaye, na tari nokorigia, korende anyare kogambera okogania kwaye, naende orengereirie enkoro yaye ime amotige buna omoiseke oye omwekungi, nakore buya. 38Gaki oyorasokie omoiseke oye omwekungi nakore buya; na oyotamosogeti okorire buya kobua.

39Omokungu nigo asibire ase omosacha oye ekero omosacha oye are moyo, korende omosacha oye karakwe, rirorio osiboirwe; nanyare konyuomwa na monto onde bwensi oyo aranche, korende nase Omonene oka. 40Korende anga mbuya kobua karabe buna are. Nigo ndoche inche; na inche narengereirie ng’a ninde n’Omoika o Nyasae.

Currently Selected:

1 ABAKORINTO 7: EKEGUSIIBBLE

Highlight

Copy