1 ABAKORINTO 6

Ekina ki’Abakristo bosio bw’ekegambero

1Omonto onde oino karabe ne ring’ana ase oyomwabo, Inee, nare noboremu amosoere ase abwo batari abaronge? Inki rende atari komosoera ase obosio bw’abachenu? 2Gose timomanyeti ng’a abachenu inabagambie ense? Na onye ense egocha kogambigwa nainwe, Inee, timoisaini kogamba ebina ebire ebike? 3Timomanyeti ng’a ntogambie abamalaika? Tari kobua mono amang’ana ’obogima obo? 4Gaki komorabe mogosoerana ase amang’ana buna ayio, naki rende mokoyarenta ase abwo batabariri buna ngento ase ekanisa? 5Natebire aya ase okobasookia. Inee! Onde tari ase egati yaino ore ne chisemi chiisaine oranyare konacha amang’ana are ase egati y’abamwabo? 6Korende oyomwabo nigo agosoera oyomwabo, na ayio nase obosio bw’abwo bategeneti.

7Amang’ana aya ng’a ngosoerana more inwe ase inwe nigo are ase okobugwa kwaino. Inki motanchereti gokorerwa bobe? Inki motanchereti kourwa ebi mobwate? 8Korende inwe abanyene mwakoreire abanto bobe, na kobaura ebi babwate, ee nonya nase abamino.

9Gose timomanyeti ng’a abatari noboronge tibakoira omwando bw’oboruoti bwa Nyasae? Timong’aineka; abanyaka tibakoira omwando bw’oboruoti bwa Nyasae, nonya nabasasimi emegwekano, gose abatomani, gose abakwerua ase okogania kw’omobere, gose abasacha abagwesaria nabasacha, 10gose abaibi, gose abegimeria, gose abagotinda, gose abarami, gose abauri. 11Abande asemore nigo mwarenge abanto buna aba, korende mogasibigwa na mogachenwa, mwanyorire oboronge ase erieta ri’Omonene Yeso Kristo, na ase Omoika o Nyasae oito.

Ebibe tibigwenereti ase obogima bw’obokristo

12“Ninde nobosibore gokora kende gionsi”, korende tari bionsi birankonye. “Ninde nobosibore gokora kende gionsi”, korende tingwancha koba omosomba o gento kende gionsi. 13“Endagera ney’enda na enda ney’endagera”, korende Nyasae nasarie bionsi bibere, enda na endagera. Omobere tori ase obotomani, korende nase Omonene, na Omonene ase omobere. 14Nyasae nabogetie Omonene, naintwe natobokie ase okobua kwaye. 15Timomanyeti ng’a emebere yaino nebiimo bia Kristo? Inee! Nimbogorie ebiimo bia Kirsto na kobikora bibe ebiimo bi’omokungu omotayayi? Yaya, nonya ng’ake! 16Timomanyeti ng’a ere oyobwatanigwe nomokungu omotayayi obeire omobere oyomo nere? Naki buna erikire, “Baria babere nababe omobere oyomo.” 17Korende ere oyobwatanigwe n’Omonene igo obeire omoika oyomo nere. 18Tama obotomani! Kera ebibe binde bigokorwa namwanyabanto nigo bire isiko y’omobere; korende ere oyogokora obotomani igo okorire ebibe ase omobere oye omonyene. 19Gose timomanyeti ng’a emebere yaino ne Hekalu y’Omoika Omochenu ore ime yaino, oyo mwaeirwe na Nyasae? Na inwe timori abaino abanyene, 20ekiagera mwagoretwe ase rigori rinene. Ase ayio, motogie Nyasae ase emebere yaino.

Currently Selected:

1 ABAKORINTO 6: EKEGUSIIBBLE

Highlight

Copy