1 ABAKORINTO 3

Omoika bw’ogwatananekana okwangwa

1Na inche, baminto, tinare konyara gokwana nainwe buna nabanto bare n’Omoika, korende buna abanto b’engencho ya kare, buna abana ebing’werere ase Kristo. 2Nabasiibirie amabeere, timbaragereti endagera; ekiagera konya timoraisana; ee, nonya mbono timoraisana, 3ekiagera nonya mbono nigo more abanto b’engencho y’ebibe. Naki onye more ne ribero na eriomana ase egati yaino, Inee, timori abanto b’engencho y’ebibe, naende nigo mogendererete buna banto bande bonsi? 4Ekiagera ekero omonto oyomo akobora, “Inche noyo o Paulo,” na oyonde, “Inche noyo bw’Apolo.” Inee, inwe timori mwanyabanto?

5Gaki Apolo inki aisaine? Na Paulo inki aisaine? Intwe nabakori emeremo, ababorokereirie komwegena Omonene, kera oyomo buna Omonene amoeire. 6Inche ngasimeka, Apolo akabeka amache, korende Nyasae nere ogokinia. 7Onye nabo, oyogosimeka tai gento, nonya noyokobeka amache, korende Nyasae bweka oyogokinia. 8Naboigo oyogosimeka, na oyokobeka amache nigo bareng’anetie; na kera omonto nanyore eng’eria yaye koreng’ana buna emeremo yaye ere. 9Naki intwe nabakori emeremo amo na Nyasae; inwe nomogondo o Nyasae, na oboagacho bwa Nyasae.

Oboteneneri bw’aborokia

10Koreng’ana nobuya bwa Nyasae naetwe inche, buna omonene bw’abaagachi, oyore ne chisemi, nabekire oboroso, na omonto onde nkoagacha are igoro yaye. Korende kera omonto tiga arigererie buna akoagacha igoro yaye. 11Naki boroso bonde tibori omonto aranyare kobeka, otatiga boria bwaikire kobekwa, nabwo Yeso Kristo. 12Korende omonto karaagache igoro ase oboroso obwo netahabu, gose efeta, gose amagena e rigori rinene, gose emete, gose obonyansi, gose chinsiaga- 13emeremo ya kera omonto ing’eorokigwe maiso marore. Naki Rituko erio inariyeorokie, ekiagera narioroke nomorero; na omorero oyio noteeme emeremo ya kera omonto ng’a naki ere. 14Emeremo y’omonto aagachete igoro ase oboroso kerabue, omonto oyio nanyore eng’eria. 15Emeremo y’omonto kerayie, takonyora eng’eria, korende ere omonyene natoorigwe, korende buna oyo ogotaborigwa korwa ase omorero.

16Timomanyeti ng’a inwe ne Hekalu ya Nyasae, na Omoika o Nyasae nigo omenyete ime yaino? 17Onye omonto ogosaria Hekalu ya Nyasae, Nyasae nasarie omonto oyio; naki Hekalu ya Nyasae nenchenu, nero ninwe.

18Omonto tabaisa kweng’aina ere omonyene. Onye omonto ase egati yaino bwerorire ng’a nomonyasemi are ase ense eye, tiga ekore omoriri, erinde anyare koba omonyasemi. 19Naki obong’aini bw’ense eye noboriri ase Nyasae, ekiagera nerikire, “Ere okobwata abare nobong’aini ase obong’ainereria bwabo”, 20naende, “Omonene nigo amanyete okorengereria kw’abare nobong’aini ng’a nokwa bosa.” 21Ase ayio omonto tetogia ase mwanyabanto. Naki bionsi nebiaino; 22onye Paulo, gose Apolo, gose Kefa, gose ense, gose obogima, gose amakweri, gose biria bire bono, gose ebio birache koba; bionsi nebiaino; 23na inwe naba Kristo, na Kristo noyo o Nyasae.

Currently Selected:

1 ABAKORINTO 3: EKEGUSIIBBLE

Highlight

Copy