1 ABAKORINTO 2

Chisemi na okomaanorerwa

1Inche, ekero nachete asemore, baminto, tinachete kobaranderia oborori bwa Nyasae ase enchera y’obuya bwe chinkwana, gose ase obong’aini. 2Naki nigo narengereretie ng’a timanya ing’ana rinde rionsi asemore otatiga Yeso Kristo, na nere obambetwe. 3Na inche nigo narenge amo nainwe ase oboreu na okoiroka, na okoiguswa okonge. 4Enkwana yane na okorandia kwane tibiarenge amang’ana ay’okoebereria obong’aini bwa mwanyabanto, korende ase ekiorokererio ki’Omoika ne chinguru, 5erinde okwegena kwaino tikoba ase obong’aini bwa mwanyabanto korende ase chinguru chia Nyasae.

6Korende obong’aini mbore togoteba ase egati y’abaikeranu, na borobwo tibori obong’aini bw’ense eye, gose obw’abagambi b’ense eye abagendererete gochia gosira, 7korende nigo togokwana obong’aini bw’obobisi bwa Nyasae, obwo bwabisetwe, obwo Nyasae aroberetie korwa omochakano, erinde atoeire bobe obonene bwaito. 8Abagambi b’ense eye tibabomanyete, nonya noyomo obo; naki onye mbabomanyete, anga tibabambete Omonene bw’obonene; 9korende buna erikire,

“Aya eriso ritaroche, gose ogoto gotaigwete,

gose aya atarengereirie ase enkoro y’omonto,

ayio Nyasae aroiseretie abamwanchete.”

10Korende Nyasae otoyaorokeirie ase Omoika oye, naki Omoika nigo okorigia onsi, nonya nobobisi bwa Nyasae. 11Naki ning’o ore ase mwanyabanto omanyete ebirengererio bi’omonto, otatiga omoika bw’omonto ore ime yaye? Naboigo nonde tari omanyete ebirengererio bia Nyasae otatiga Omoika o Nyasae. 12Na intwe titwanyorete omoika bw’ense eye, korende Omoika orwete ase Nyasae, erinde tonyare komanya ebiegwa ebitwaeirwe na Nyasae. 13Naro nigo tokoyakwana, tari ase amang’ana tworokererigwe ne chisemi chia mwanyabanto, korende aya tworokererigwe n’Omoika; igo togokwana amang’ana ’Omoika ase abare n’Omoika.

14Nabo mwanyabanto ore ne chingencho chia kare, takonyora ebiegwa bi’Omoika o Nyasae, naki asare ere ebi nebiriri, gose takonyara kobimanya, ekiagera nigo bikomanyekana ase chinguru chi’Omoika. 15Omonto ore n’Omoika nigo akomanya onsi, korende ere takomanyigwa na monto onde. 16“Naki ning’o omanyete ebirengererio bi’Omonene, erinde amworokererie?” Korende intwe ntore nebirengererio bia Kristo.

Currently Selected:

1 ABAKORINTO 2: EKEGUSIIBBLE

Highlight

Copy