रोमियो 3
3
परमेसरा रे न्याय रा इंतजार
1कोई बोली सका कि अगर खतना कुराणे ले परमेसर आस्सा यहूदी लोका जो ग्रैहण नी करदा, ता गैर-यहूदी नी हुई किन्हें यहूदी हूणे ले आस्सो कोई फायदा नी आ। 2पर हां, यहूदी हूंणे रा बौह्त फायदा। सभी ले बड़ी गल ये कि परमेसरा रे बचन आस्सा जो सौंपे गये।
3अगर यहूदी लोका मन्झा ले कुछ परमेसरा रे प्रति धोखा देणे वाले भी निकले ता क्या हुआ? क्या एता रा मतलब ये आ कि परमेसर धोखा देणे वाल़ा आ, होर तिन्हें तिन्हा किन्हें आपणे कितिरे वादे जो पूरा नी करणा? 4नी, कधी नी! सिर्फ परमेसर ई हमेसा आपणे वादे रे प्रति पर सच्चा आ, पर हर एक माह्णुं झूठा आ, जिहां पवित्र सास्त्रा मन्झ परमेसरा रे बारे मन्झ लिखिरा,
“ताकि तू आपणी सभ गल्ला मन्झ सच्चा निकले,
होर जेबे न्याय हूंणा तेबे तू जीती जाये।”
5अगर आस्सा रे बुरे काम परमेसरा री धार्मिकता जो दसे, ता आस्से क्या बोलिए? कि परमेसर जो आस्सा पर गुस्सा करहा होर आस्सा जो सजा देआ, ता क्या ये गलत आ? (ये ता सिर्फ हांऊँ एक एह्ड़े ही आम माह्णुं हूणें रे नाते बोल्या करहा।) 6नी, कधी नी, अगर परमेसर आस्सा यहूदी लोका रा न्याय नी करदा, ता परमेसर संसारा रे लोका रा भी न्याय नी करी सकदा।
7“कुछ लोक एह्ड़ा बोली सके कि अगर मेरे झूठा री वजहा ले परमेसरा री सच्चाई जाहिर हुई, होर तेस्जो महिमा मिली, ता क्या परमेसर मुंजो पापी साहीं सजा देई सका या मेरा न्याय करी सका?” 8कुछ लोक आस्सा पर इल्जाम ल्गाहें कि आस्से लोका जो ये ही स्खाये कि “आऊआ आस्से बुराई करहे ताकि खूब भलाई हो” होर एह्ड़े इल्जाम लगाणे बाले लोका जो सजा मिलणी चहिए।
सभीए पाप कितेया
9ता इन्हा सभीरा क्या मतलब आ? क्या एता रा मतलब ये आ कि आस्से यहूदी लोक गैर-यहूदी लोका ले बड़ी किन्हें खरे ऐं? नी, कधी नी; क्यूंकि आस्से यहूदी लोको होर गैर-यहूदी लोको दुंहीं पर इल्जाम ल्गाई गईरा कि आस्से सभ पापा रे कब्जे मन्झ ऐं। 10जिहां पवित्र सास्त्रा मन्झ लिखिरा,
“परमेसरा री नजरा मन्झ कोई धर्मी माह्णुं नी आ,
एक भी धर्मी माह्णुं नी आ।
11कोई माह्णुं समझ्दार नी आ,
होर कोई भी माह्णुं परमेसरा जो जाणना नी चाहन्दा।
12सब माह्णुं परमेसरा ले दूर हुई गईरे,
सभी रे सभ निकम्मे हुई गईरे,
कोई भी खरे काम करणे वाल़ा नी आ, एक भी नी आ।”
13“तिन्हारा मुंह मुस्का आऊणें वाली कब्रा साहीं जो खुलीरी,
क्यूंकि स्यों जो बोले, गन्दा ही बोल्हा ऐं,
स्यों दूजेया जो धोखा देणे वाली गल्ला बोले,”
“तिन्हारी गल्ला जैहरले सांपा साहीं खतरनाक ई।”
14“होर तिन्हारी गल्ला स्राप होर कड़वाहटा किन्हें भर्ही गया।”
15“स्यों चोट पौहुन्चाणे होर खून करणे रे कठे तेज ऐं।
16स्यों जेथी केथी जाहें, तेथी बुरे काम होर अत्याचार करहे।
17तिन्हा जो लोका किन्हें बगैर लड़ाई झगड़ा कितरे नी रेहणा आऊंदा।”
18“तिन्हा लोका जो परमेसरा रा बिल्कुल डर नी आ।”
19आस्से जाणहां ऐं कि, मूसा री व्यवस्था जो कुछ बोल्हा ई, से व्यवस्था रे अधीन रैहणे वाले किन्हें बोली ई, ताकि कोई भी माह्णुं भाने नी मारी सके होर परमेसर सारे संसारा रे लोका जो दोसी ठैहराए होर तिन्हो सजा दे। 20क्यूंकि मूसा री व्यवस्था जो मनणे रे ज्रीए कोई भी माह्णुं परमेसरा री नजरा मन्झ धर्मी माह्णुं नी बणी सकदा, इधी कठे कि व्यवस्था आस्सो दसी कि आस्से पापी ऐं।
विस्वासा रे ज्रीए परमेसरा री नजरा मन्झ धर्मी बणना
21पर ऐबे मूसा री व्यवस्था जो मनणे बगैर परमेसरे आस्से आपणी नजरा मन्झ धर्मी माह्णुं बणाईरे। होर ये व्यवस्था होर नबिया री कताबा मन्झ बौह्त पैहले लिखिरा कि केस तरीके किन्हें परमेसरे आस्से आपणी नजरा मन्झ धर्मी माह्णुं बणा। 22मतलब जेबे आस्से यीसू मसीह पर विस्वास करहे ता परमेसर आस्सो आपणी नजरा मन्झ धर्मी माह्णुं बणा। होर ये यीसू मसीह पर विस्वास करणे वाले सभी लोका रे कठे ई। क्यूंकि परमेसर सभी लोका साउगी एक साहीं बर्ताव करहा।
23होर सभीए पाप कितेया होर परमेसरा री महिमा रे ले दूर हुई गये। 24पर परमेसरे आपणे अनुग्रह रे ज्रीए आस्सा जो आपणी नजरा मन्झ धर्मी माह्णुं बणा, होर तिन्हें आस्सा जो मसीह यीसू रे ज्रीए आस्सा रे पापा री सजा ले मुफ्ता मन्झ अजाद कितेया।
25-26परमेसरे मसीह यीसू जो आस्सा रे पापा रे प्रायस्चित रे कठे भेजेया, होर तिन्हें आपणा खून बहाई किन्हें आपणी जान देई दिति ताकि मसीह यीसू पर विस्वास करणे रे ज्रीए आस्से परमेसरा वाले आये। होर परमेसरे ये इधी कठे कितेया ताकि से एस गल्ला जो जाहिर करी सके कि पैह्ल्के जमाने मन्झ से पापी लोका साउगी सबर रखणे मन्झ होर तिन्हारे पाप माफ करणे मन्झ धार्मिक थे। पर एस टैम परमेसरा री धार्मिकता जाहिर हुन्दी लगिरी कि जेस ले से आपु ई धर्मी ठैहरे, होर जो यीसू पर विस्वास करहे, तिन्हो भी आपणी नजरा मन्झ धर्मी माह्णुं बणाए।
बडयाई करणे रे व्रोधा मन्झ
27ता आस्सा री धार्मिकता पर बडयाई करणा पुरे तरीके ले नामुमकिन आ, क्यूंकि परमेसर आस्सा रे पापा रा लेख जोखा इधी कठे नी मटांदा कि आस्से कुछ बिधिया जो होर मूसा री व्यवस्था जो मन्ने, पर इधी कठे कि मसीह यीसू पर विस्वास करहे। 28इधी कठे ये गल साफ ई कि परमेसर हर एक माह्णुं जो मूसा री व्यवस्था जो मनणे रे कठे नी पर यीसू मसीह पर विस्वास करणे रे ज्रीए आपणी नजरा मन्झ धर्मी माह्णुं बणा।
29परमेसर सिर्फ यहूदी लोका रा परमेसर नी आ, पर से गैर-यहूदी लोका रा भी परमेसर आ।
30क्यूंकि परमेसर एक ई आ, होर से जिन्हें खतना कितिरे लोका जो होर बगैर खतना कितिरे लोका जो भी मसीह यीसू पर विस्वास करणे रे ज्रीए ही आपणी नजरा मन्झ धर्मी माह्णुं बणा। 31ता क्या आस्सा रा विस्वास मूसा री व्यवस्था जो रद्द करहा ऐं? नी कधी नी, पर मसीह रे विस्वासा रे ज्रीए आस्से व्यवस्था जो पूरा करहा ऐं।
Currently Selected:
रोमियो 3: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
