रोमियो 1
1
नमस्कार
1हांऊँ पौलुस ये चिट्ठी लिख्या करहा। हांऊँ यीसू मसीहा रा सेऊआदार आ। परमेसरे एक चुणिरा चेले रे रूपा मन्झ मेरा चुणाव कितेया, होर परमेसरे हांऊँ खुसी री खबर सुनाणे रे कठे नियुक्त कितिरा। 2प्रभु यीसू रे एस दुनिया मन्झ आऊणें ले बौह्त पैहले ई परमेसरे पवित्र सास्त्रा मन्झ आपणे नबिया रे ज्रीए एस खुसी री खबरा जो जाहिर करणे रा वादा कितिरा था। 3ये खुसी री खबर परमेसरा रे मह्ठे रे बारे मन्झ ई, जो आस्सा रा प्रभु यीसू मसीह आ। से माह्णुं रे रूपा मन्झ राजा दाऊदा रे घराने मन्झ जम्मेया।
4होर यीसू पवित्र आत्मा रे सामर्था ज्रीए मरिरे मन्झा ले जी उठणे री वजहा ले परमेसरा रा मह्ठा ठैहर्या। 5मसीह रे ज्रीए परमेसरे आस्सा जो चुणिरे चेले हूंणे रा सौभाग्य होर हक दितिरा कि आस्से मसीह रे कठे सारे जातिया रे लोका जो ये दसी सके कि परमेसरे तिन्हारे कठे क्या कितिरा। जेसरे ज्रीए स्यों मसीह पर विस्वास करी किन्हें तेसरे हुक्मा जो मने। 6परमेसरे बौह्त लोका जो यीसू मसीह रे लोक हूंणे रे कठे चुणिरा, होर तुस्से जो रोम सैहरा मन्झ रैहणे वाले विस्वासी लोक ऐं, तुस्से भी तिन्हा लोका मन्झ ले।
7ये चिठ्ठी रोम सैहरा रे लोका रे कठे ई, जिन्हा किन्हें परमेसर प्यार करहा होर आपणे पवित्र लोक हूंणे रे कठे चुणिरे। आस्से प्रार्थना करहे कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।
पौलूस री रोम देसा जो जाणे री इच्छा
8सभी ले पैहले हांऊँ तुस्सा सभी रे कठे यीसू मसीहा रे ज्रीए आपणे परमेसरा रा धन्यावाद करहा, क्यूंकि संसारा रे कई जगहा मन्झ लोक एस गल्ला रे बारे मन्झ गलांण करेया करहा ऐं कि कियां तुस्से यीसू मसीह पर विस्वास कितिरा। 9परमेसर मेरा गुआह आ कि, कियां हांऊँ तुस्सा सभी जो आपणी प्रार्थना मन्झ लगातार याद करदा रैंहयां। से परमेसर, जेसरे मह्ठे री खुसी री खबरा जो हांऊँ पुरे मना किन्हें प्रचार करहा। 10होर हमेसा हांऊँ आपणी प्रार्थना मन्झ अर्ज करहा कि, परमेसरा री इच्छा ले केसी ना केसी तरीके मुंजो तुस्सा वाले आऊणें रा मौका मिले।
11क्यूंकि हांऊँ तुस्सा किन्हें मिलणे री इच्छा करहा ताकि हांऊँ तुस्सा जो कोई आत्मिक आसरीवाद देऊँ, जेस ले तुस्से आपणे विस्वासा मन्झ मजबूत हुई जाओ। 12जेबे आस्सा एक दूजे किन्हें मिलणा, ता हांऊँ तुस्सा जो तुस्सा रे विस्वासा मन्झ मजबूत करणा चांहा, पर हांऊँ ये भी चांहा कि तुस्से मुंजो भी मेरे विस्वासा मन्झ मजबूत करो।
13होर हे भाईयो होर बैहणो, हांऊँ चाहां कि, तुस्से एस गल्ला जो जाणे कि, मैं बार-बार तुस्सा वाले आऊंणा चाहेया पर हली तक रुकावट आउंदी रही। क्यूंकि जिहां मैं गैर-यहूदी लोका रे बीचा मन्झ चेले त्यार किते, तिहां ईं तुस्सा रे बीचा मन्झ भी चेले त्यार हो। 14हांऊँ तिन्हा लोका रा जो यूनानी भासा होर सभ्यता जाणांहे, होर तिन्हारा भी जो नी जाणदे, होर बुद्धिमान होर नर्क्कले लोका रा भी कर्जदार आ कि हांऊँ सब लोका जो खुसी री खबरा रा प्रचार करूं। 15इधी कठे, हांऊँ दिला किन्हें बौह्त इच्छा करहा कि हांऊँ रोम सैहरा मन्झ आई किन्हें तुस्सा सभी जो भी खुसी री खबर सुणाऊं।
धर्मी माह्णुंआं विस्वासा ले जीणा
16क्यूंकि हांऊँ खुसी री खबर सुनाणे ले नी सरमान्दा। इधी कठे कि खुसी री खबर परमेसरा री सामर्थ ई जो सब विस्वास करणे वाले रा उद्धार करहा ई, सभी ले पैहले ता यहूदी लोका रा, फेरी गैर-यहूदी लोका रा। 17क्यूंकि खुसी री खबरा एस गल्ला जो जाहिर करी कि परमेसरे आस्से आपणी नजरा मन्झ धर्मी माह्णुं बणाये, जो सुर्हू ले लेई किन्हें आखरी तक विस्वासा पर टिकीरी; जिहां पवित्र सास्त्रा मन्झ भी लिखिरा कि, “परमेसरे जेस जो आपणी नजरा मन्झ धर्मी माह्णुं बणाया, तेस विस्वासा ले ही जिउंदे रैंह्णां।”#1:17 हब. 2:4, गला. 3:11
पापी लोका पर परमेसरा रा गुस्सा
18पर परमेसर स्वर्गा ले आपणे गुस्से जो सारे पापी लोका पर होर दुस्ट लोका रे विरुद्ध दसा, जो आपणी दुस्टता ले परमेसरा री सच्चाई री गल्ला जो दबाई रखायें। 19इधी कठे संसारा रे सारे लोक पूरी तरह जाणहां ऐं कि परमेसर कुणहां, क्यूंकि परमेसरे ही ये गल तिन्हा पर जाहिर कितिरी।
20हकीकता मन्झ लोक आपणी हाखिया किन्हें नी देखी पांदे कि से परमेसर कुणहां। पर जेबे ले परमेसरे ये संसार बणाया, होर संसारा री हर रचना तेस सामर्थी परमेसरा रा ब्खान करहा ई। क्यूंकि संसारा री रचना देखी किन्हें ये पता चल्हा कि इन्हारा बनाणे वाल़ा परमेसर आ, इधी कठे लोका वाले परमेसरा जो नी जाणने रा ऐबे कोई भाना नी आ। 21जेब्की संसारा रे लोक ये जाणी भी गये कि सच्चा परमेसर कुणहां, फेरी भी तिन्हें तेस जो परमेसर जाणी किन्हें आदर होर धन्यावाद नी कितेया, तिन्हारी सोच नर्क्कले साहीं थी, होर स्यों इतने नासमझ बणी गये कि स्यों ये नी समझी सके कि परमेसर तिन्हा लोका ले आपणे बारे मन्झ क्या चाहां कि स्यों समझी जाये।
22स्यों आपणे आपा जो समझदार समझायें थे पर नर्क्कले बणी गये। 23हमेसा जिउंदे रैहणे वाले महिमामय परमेसरा री अराधना करणे रे बजाय तिन्हें माह्णुंआं री, जो जल्दी मरी जाये, होर चिड़ुआ री, पेटा रे भारे चलणे फिरणे वाले जीव जन्तु, होर जानवरा साहीं दुसणे वाली मूर्तिया री पूजा करदे लगे।
24एस वजहा ले परमेसरे स्यों तिन्हारी मना री इच्छा रे मताबक आपणे सरीरा जो गलत कामा रे कठे छाडी दितेया, ताकि स्यों आपु मन्झ बुरे कामा जो करदे हुए आपणे सरीरा रा अनादर करहे। 25क्यूंकि परमेसरा रे बारे मन्झ सच्चाई री गल्ला जो मनणे रे बजाय तिन्हें झूठे ईस्वरा री अराधना किती। होर तिन्हें परमेसरा री अराधना करणे रे बजाय जिन्हें जे सभ कुछ रच्या, तिन्हें रचीरी चीजा री अराधना किती। परमेसरा री बड़ाई हमेसा सारी सृस्टी जो करणी चहिए! आमीन।
26इधी कठे परमेसरे स्यों नीच काम करणे रे कठे छाडी दिते, एथी तक कि तिन्हारी ज्नानिया भी मर्धा साउगी जायज रिस्ते रे बजाय एक दूजे साउगी ही जिस्मानी रिस्ते रखदी लगी। 27तिहां ईं मर्ध भी ज्नानिया साउगी जायज रिस्ते छाडी किन्हें एक दूजे साउगी जिस्मानी रिस्ते बणान्दे लगे। होर एक मर्ध दूजे मर्धा साउगी नीच काम करी किन्हें आपणी बुराई री ठीक सजा पाई।
28होर जेबे तिन्हो परमेसरा जो जाणना नर्क्कला लगेया, तेबे परमेसरे भी स्यों तिन्हारे नर्क्कले मना रे वसा मन्झ छाडी दिते, ताकि स्यों बुरे काम करहे। 29होर स्यों सभ किस्मा रे अधर्मा रे काम, होर दुस्टता, होर लालच, होर बैर-भाव किन्हें भर्ही गये। होर हिर्ख, होर हत्या, होर झगड़े, होर धोखा, होर बुरे बिचारा किन्हें बर्ताव करणे वाले, होर चुगलखोर बणी गईरे। 30स्यों बदनाम करणे वाले, परमेसरा किन्हें नफरत करणे वाले, दूजे री बेज्जती करणे वाले, बडयाई करणे वाले, बडी-बडी गल्ला करणे वाले, बुरी-बुरी गल्ला करणे वाले, माऊ बापू रा हुक्म नी मनणे वाले ऐ। 31स्यों नासमझ, दूजेया जो धोखा देणे वाले, प्यार नी करणे वाले होर निर्दयी हुई गईरे।
32स्यों ता परमेसरा रे ये बिधि जाणहां ऐं कि, एह्ड़े-एह्ड़े काम करणे वाले मौता री सजा रे लायक ऐं, तेबे भी ना सिर्फ तुस्से आपु एह्ड़े काम करहा ऐं, पर करणे वाले किन्हें खुस भी हुंहाँ ऐं।
Currently Selected:
रोमियो 1: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
