Popular Bible Verses from रोमियो 1

Share

क्यूंकि हांऊँ खुसी री खबर सुनाणे ले नी सरमान्दा। इधी कठे कि खुसी री खबर परमेसरा री सामर्थ ई जो सब विस्वास करणे वाले रा उद्धार करहा ई, सभी ले पैहले ता यहूदी लोका रा, फेरी गैर-यहूदी लोका रा।

क्यूंकि खुसी री खबरा एस गल्ला जो जाहिर करी कि परमेसरे आस्से आपणी नजरा मन्झ धर्मी माह्णुं बणाये, जो सुर्हू ले लेई किन्हें आखरी तक विस्वासा पर टिकीरी; जिहां पवित्र सास्त्रा मन्झ भी लिखिरा कि, “परमेसरे जेस जो आपणी नजरा मन्झ धर्मी माह्णुं बणाया, तेस विस्वासा ले ही जिउंदे रैंह्णां।”

हकीकता मन्झ लोक आपणी हाखिया किन्हें नी देखी पांदे कि से परमेसर कुणहां। पर जेबे ले परमेसरे ये संसार बणाया, होर संसारा री हर रचना तेस सामर्थी परमेसरा रा ब्खान करहा ई। क्यूंकि संसारा री रचना देखी किन्हें ये पता चल्हा कि इन्हारा बनाणे वाल़ा परमेसर आ, इधी कठे लोका वाले परमेसरा जो नी जाणने रा ऐबे कोई भाना नी आ।

जेब्की संसारा रे लोक ये जाणी भी गये कि सच्चा परमेसर कुणहां, फेरी भी तिन्हें तेस जो परमेसर जाणी किन्हें आदर होर धन्यावाद नी कितेया, तिन्हारी सोच नर्क्कले साहीं थी, होर स्यों इतने नासमझ बणी गये कि स्यों ये नी समझी सके कि परमेसर तिन्हा लोका ले आपणे बारे मन्झ क्या चाहां कि स्यों समझी जाये।

क्यूंकि परमेसरा रे बारे मन्झ सच्चाई री गल्ला जो मनणे रे बजाय तिन्हें झूठे ईस्वरा री अराधना किती। होर तिन्हें परमेसरा री अराधना करणे रे बजाय जिन्हें जे सभ कुछ रच्या, तिन्हें रचीरी चीजा री अराधना किती। परमेसरा री बड़ाई हमेसा सारी सृस्टी जो करणी चहिए! आमीन।

पर परमेसर स्वर्गा ले आपणे गुस्से जो सारे पापी लोका पर होर दुस्ट लोका रे विरुद्ध दसा, जो आपणी दुस्टता ले परमेसरा री सच्चाई री गल्ला जो दबाई रखायें।

इधी कठे परमेसरे स्यों नीच काम करणे रे कठे छाडी दिते, एथी तक कि तिन्हारी ज्नानिया भी मर्धा साउगी जायज रिस्ते रे बजाय एक दूजे साउगी ही जिस्मानी रिस्ते रखदी लगी। तिहां ईं मर्ध भी ज्नानिया साउगी जायज रिस्ते छाडी किन्हें एक दूजे साउगी जिस्मानी रिस्ते बणान्दे लगे। होर एक मर्ध दूजे मर्धा साउगी नीच काम करी किन्हें आपणी बुराई री ठीक सजा पाई। होर जेबे तिन्हो परमेसरा जो जाणना नर्क्कला लगेया, तेबे परमेसरे भी स्यों तिन्हारे नर्क्कले मना रे वसा मन्झ छाडी दिते, ताकि स्यों बुरे काम करहे।

स्यों आपणे आपा जो समझदार समझायें थे पर नर्क्कले बणी गये। हमेसा जिउंदे रैहणे वाले महिमामय परमेसरा री अराधना करणे रे बजाय तिन्हें माह्णुंआं री, जो जल्दी मरी जाये, होर चिड़ुआ री, पेटा रे भारे चलणे फिरणे वाले जीव जन्तु, होर जानवरा साहीं दुसणे वाली मूर्तिया री पूजा करदे लगे।