मत्ती 27
27
पिलातुसा हाकमा रे साम्हणें यीसू
(मरकु. 15:1; लूक. 23:1,2; यहू. 18:28-32)
1भ्यागा तड़के ही सारे मुख्य याजक होर लोका रे यहूदी मुखिये यीसू जो मारणे री सलाह बनाणे रे कठे कठ्ठा हुए 2तिन्हें से बान्ह्या होर लई जाई किन्हें पिलातुस हाकमा रे हाथा मन्झ सौंपी दितेया।
यहूदा री आत्महत्या
(चुणिरे चेले 1:18-19)
3जेबे यीसू जो पकड़वाणे वाल़े यहूदा इस्करयोति जो पता लगया कि यीसू जो मारे जाणे रा फैसला हुई चुकिरा ता यहूदा इस्करयोति पछताया होर तिन्हें स्यों चांदी रे तीह सिक्के मुख्य याजका होर यहूदी मुखिये जो वापस करी दिते। 4होर तिन्हें बोल्या, “मैं एक बेकसूर माह्णुं जो मारणे रे कठे पकड़वाई किन्हें पाप कितेया।” एता पर तिन्हें लोके बोल्या, “आस्सा जो क्या? तू ई जाण।” 5तेबे से तिन्हा सिक्के जो मन्दरा रे आंघणा मन्झ सट्टी किन्हें चली गया, होर तिन्हें जाई किन्हें आपणे आपा जो फांसी लगाई।
6मुख्य याजके स्यों सिक्के लई किन्हें बोल्या, “ये सिक्के भण्डारा मन्झ रखणा व्यवस्था रे बरखलाफ आ, क्यूंकि इन्हा पैसे रा इस्तेमाल केसी रा खून कुराणे रे कठे कितेया गईरा।” 7फेरी तिन्हें सलाह करी किन्हें तिन्हा सिक्के किन्हें परदेसिया जो दफनाणे रे कठे कुम्हारा रा खेत मूल्ले लई लया। 8एस वजहा ले तेस खेता जो आजा तक खूना रा खेत बोल्या जाहाँ। 9ये इधी कठे हुआ कि जो बचन यिर्मयाह नबी रे ज्रीए बोल्या गईरा था से पूरा हो। यिर्मयाह नबिये एह्ड़ा बोल्या कि: “तिन्हें स्यों तीह चांदी रे सिक्के, से तय कितिरी कीमत लई ली। जो इस्राएल देसा रे लोक मन्झा ले कईऐ तय कितिरा था। 10होर प्रभु रे हुक्मा रे मताबक तेता किन्हें कुम्हारा रा खेत मुल्ले लई लया।”
पिलातुसा हाकमा रा यीसू किन्हें सुआल
(मरकु. 15:2-5; यहू. 18:33-38)
11जेबे यीसू हाकमा रे साम्हणें खड़ीरा था ता हाकमे तेस ले पूछेया कि, “क्या तू यहूदी लोका रा राजा आ?” यीसूए तेस किन्हें बोल्या, “तू आप्हुए बोल्या करहा।” 12जेबे मुख्य याजक होर यहूदी मुखिये तेस पर दोस ल्गाया करहा ऐं थे, ता तिन्हें कोई जवाब नी दितेया। 13एता पर पिलातुस हाकमे तेस किन्हें बोल्या, “क्या तू नी सुणदा कि, ये तेरे व्रोधा मन्झ कई गुआहिया देआ करहा ऐं?” 14पर यीसूए तेस जो एक भी गल्ला रा जवाब नी दितेया, एथी तक कि पिलातुस हाकमा जो बड़ी हरानी हुई।
मौता री सजा रा हुक्म
(मरकु. 15:6-15; लूक. 23:13-25; यहू. 18:39; 19:16)
15होर हाकमा रा ये रूआज था कि, तेस साजे मन्झ लोका रे कठे केसी एक कैदी जो जेस जो स्यों चाहें थे, छाडी देहां था। 16तेस टैम तिन्हा मन्झ एक बरअब्बा नांऊँआं रा नामी कैदी था। 17इधी कठे जेबे स्यों कठे हुए ता पिलातुस हाकमे तिन्हा किन्हें बोल्या, “तुस्से केस जो चाहें कि हांऊँ तुस्सा रे कठे छाडी देऊं? बरअब्बा जो, या यीसू जो, जेस जो मसीह बोल्या जाहाँ?” 18क्यूंकि से जाणहां था कि तिन्हें से जलन रखणे री वजहा ले से पकड़वाईरा था। 19जेबे से न्याया री गद्दी पर बैठीरा था ता तेसरी लाड़िए तेस वाले एक खबर भेजी कि, “तू तेस धर्मी रे मामले मन्झ हाथ देख्या पांदा; क्यूंकि मैं आज सुपणे मन्झ तेसरी वजहा ले बौह्त दुःख सैहन कितेया।”
20मुख्य याजके होर यहूदी मुखिये लोक भड़काए, ताकि स्यों बरअब्बा जो मांगी ले, होर यीसू री मौत कुराये। 21हाकमे तिन्हा ले पूछेया कि, “इन्हा दुंहीं मन्झा ले तुस्से केस जो चाहें कि हांऊँ तुस्सा रे कठे छाडी देऊं?” तिन्हें बोल्या, “बरअब्बा जो।” 22पिलातुस हाकमे तिन्हा ले पूछेया, “फेरी यीसू जो, जेस जो मसीह बोल्या जाहाँ, तेसरा हांऊँ क्या करूं?” सभीए तेस किन्हें बोल्या, “एस जो क्रूसा प्रयाल्हे चढ़ाई देआ।” 23हाकमे बोल्या, “किधियो, तिन्हें क्या बुराई कितिरी?” पर स्यों होर भी चिंगी-चिंगी किन्हें बोलदे लगे, “एस जो क्रूसा प्रयाल्हे चढ़ाई देआ।” 24जेबे पिलातुस हाकमे देख्या कि कुछ नी लगीरा बणदा पर उल्टा हुल्लड़ हुएआ करहा। ता तिन्हें पाणी लई किन्हें भीड़ा रे साम्हणें आपणे हाथ धोये होर बोल्या, “हांऊँ एस धर्मी रे खूना ले बेकसूर आ; तुस्से ई जाणां।” 25सभ लोके जवाब दितेया, “एसरे खूना रा दोस आस्सा पर होर आस्सा रे बंसा पर हो!” 26तेबे तिन्हें तिन्हारे कठे बरअब्बा छाडी दितेया, होर यीसू जो कोड़े ल्गाई किन्हें सौंपी दितेया, ताकि तेस जो क्रूसा प्रयाल्हे चढ़ाई दितेया जाए।
स्पाहीया रे ज्रीए यीसू रा मजाक डुआणा
(मरकु. 15:16-20; यहू. 19:2,3)
27तेबे हाकमा रे स्पाहिये यीसू जो किले मन्झ लई जाई किन्हें सारी पलटन तेसरे चहुँ वखा जो कट्ठा करी दिती। 28होर तेसरा मजाक डुआणे रे कठे तेसरे कपड़े तुआरी किन्हें तेस जो चमकीले लाल रंगा रे कपड़े पन्ह्याये। 29होर काण्डे रा ताज गुन्धी किन्हें तेसरे मूंडा पर रख्या; होर तेसरे दायें हाथा मन्झ सरकंडा पकड़ाई दितेया होर तेसरे अगे घुटणे टेकी किन्हें बोल्या, “हे यहूदी लोका रे राजे, नमस्कार।” 30होर स्यों तेसरे मूंडा पर सरकंडे मारदे, होर तेस पर थुकदे लगे। 31जेबे स्यों तेसरा मजाक डूआई बैठे ता तिन्हें से चोगा तेस प्रयाल्हे ले तुआरी किन्हें कपड़े पन्हयाई दिते, होर तेबे तेस जो क्रूसा प्रयाल्हे चढ़ाणे रे कठे यरुस्लेम सैहरा ले बाहर लई गये।
यीसू रा क्रूसा प्रयाल्हे चढ़ाया जाणा
(मरकु. 15:21-32; लूक. 23:26-43; यहू. 19:17-27)
32बाहर जांदे हुए तिन्हा जो समौन नांऊँआं रा एक कुरेनी सैहरा रा माह्णुं मिल्या, तिन्हें से बगारी मन्झ पकड़ेया ताकि से यीसू रा क्रूस चकी किन्हें लई चले। 33तेबे स्यों गुलगुता नांऊँआं री जगहा पुज्हे, “जेस जगहा जो खोपड़ी री जगहा” बोल्या जाहाँ था। 34तिन्हें यीसू जो सिरका मिलाईरा अंगूरा रा रस पीणे जो दितेया, पर तिन्हें से सुआदेया पर पितेया नी। 35तेबे तिन्हें यीसू क्रूसा प्रयाल्हे चढ़ाई दितेया, होर चिट्ठिया पाई किन्हें तेसरे कपड़े आपु मन्झ बांडी लये। 36होर तेथी बैठी किन्हें तेसरा पैहरा देंदे लगे। 37होर तिन्हें यीसू रे मूंडा ले थोड़े जे गास तेसरे क्रूसा प्रयाल्हे एक दोष पत्र लगाया कि, “ये यहूदी लोका रा राजा यीसू आ।”
38तेबे तेस साउगी क्रूसा प्रयाल्हे दो डाकू भी चढ़ाये गये एक ओरली वखो होर दूजे जो परली वखा जो। 39होर आऊणें जाणे वाल़े मूंड हिल्लाई-हिल्लाई किन्हें ये बोली किन्हें तेसरी निंदा करहा ऐं थे, 40होर ये बोल्हा थे कि, “हे मन्दरा जो ढाणे वाल़े होर तीन ध्याड़े मन्झ बनाणे वाल़े, आपणे आपा जो बचा, अगर तू परमेसरा रा मह्ठा आ, ता क्रूसा प्रयाल्हे ले उतरी जा।” 41इंहां ईं मुख्य याजक व्यवस्था स्खाणे वाल़े होर यहूदी मुखिये ये बोली किन्हें मजाक डूआया करहा ऐं थे, 42“इन्हें होर बचाए, होर आपणे आपा जो नी बचाई सक्दा। इस्राएल देसा रे राजा मसीह ऐबे क्रूसा प्रयाल्हे ले उतरी किन्हें आई जा कि, आस्से देखी किन्हें विस्वास करिए।” 43इन्हें परमेसरा पर भरोसा रखिरा, अगर से एस जो चाहां, ता ऐबे एस जो छुड़ाई ले, क्यूंकि इन्हें बोलिरा था कि, “हांऊँ परमेसरा रा मह्ठा आ।” 44इंहां ईं डाकू भी जो तेसरे साउगी क्रूसा प्रयाल्हे चढ़ाए गईरे थे स्यों भी तेसरा मजाक डूआदें लगे।
यीसू रा मरणा
(मरकु. 15:33-41; लूक. 23:44-49; यहू. 19:28-30)
45दोपहरा ले लई किन्हें तीन बजे तक सारे देसा मन्झ न्हयारा हुई गया। 46लगभग तीन बजे रे टैमा पर यीसूए जोरा किन्हें बोल्या, “एली, एली, लमा सबक्तनी? हे मेरे परमेसर, हे मेरे परमेसर, तुस्से हांऊँ किधियो छाडी दितेया?” 47जो तेथी खड़ीरे थे, तिन्हा मन्झा ले कई लोका जो गलतफैह्मी हुई; की से एलिय्याह नबी जो सादेया करहा। 48तिन्हा मन्झा ले एक झटपट दोड़ेया, होर स्पंज लई किन्हें सिरके मन्झ डूबोया, होर सरकंडे पर रखी किन्हें तेस जो चुसणे जो दितेया, 49होरिये बोल्या, “रुकी जाऊआ; देख्हा ऐं, एलिय्याह नबी तेस जो बचाणे रे कठे आहूँआं कि नी।” 50तेबे यीसूए फेरी जोरा किन्हें चिंगी किन्हें आपणे प्राण छाडी दिते। 51होर देखा मन्दरा रा पर्दा ऊपरा ले लई किन्हें हेठा तक फटी किन्हें दो टुकड़े हुई गया। होर धरती हिली गई होर चट्टाना मन्झ दरार पई गई। 52होर कब्रा खुल्ही गई, होर मरिरे परमेसरा रे पवित्र लोका री कई ल्हासा जिउंदी हुई गई। 53होर तेसरे मरिरे मन्झा ले जी उठणा ले बाद स्यों कब्रा मन्झा ले निकली किन्हें पवित्र गांऊँआं मन्झ गये, होर कईया जो सुज्हे। 54तेबे सूबेदार होर जो तेस साउगी यीसू रा पैहरा देंदे लगिरे थे, हिलण होर जो कुछ हुआ था, तेता जो देखी किन्हें स्यों बौह्त ज्यादा डरी गये, होर बोल्या, “सच्चे ये ता परमेसरा रा मह्ठा था!” 55तेथी बौह्त सारी ज्नाने जो गलील जिल्ले ले यीसू री सेऊआ करदी हुई तेस साउगी आईरी थी, स्यों दूरा ले देख्या करहा ई थी। 56तिन्हा मन्झ मगदल गांऊँआं री मरियम #27:56 ये मरियम मगदल गांऊँआं री थी होर याकूब होर योसेसा री माऊ मरियम, होर जब्दी रे मह्ठे री माऊ थी।
यीसू रा दफ्नाया जाणा
(मरकु. 15:42-47; लूक. 23:50-56; यहू. 19:38-42)
57जेबे सांझ हुई ता अरिमतियाह सैहरा रा रैहणे वाल़ा युसुफ आया जो एक सेठ माह्णुं था होर आपु भी से यीसू रा चेला था। 58तिन्हें पिलातुस हाकमा वाले जाई किन्हें यीसू री ल्हास मांगी तेबे पिलातुस हाकमे हुक्म दितेया कि, ल्हास तेस जो देई देआ। 59युसुफे यीसू री ल्हास लई होर साफ चादरा मन्झ लपेटी लई। 60होर तिन्हें से ल्हास आपणे नंऊँऐं डुआरा मन्झ रखी, जो तिन्हें चटाना रे बीचा मन्झ खणीरी थी, तेबे से डुआरा रे दुराजे पर बड्डा पात्थर धकेली किन्हें चली गया। 61मगदल गांऊँआं री मरियम होर दूजी मरियम तेथी डुआरा रे साम्हणें बैठीरी थी।
कब्रा पर पैहरा
62अगले ध्याड़े अरामा रे ध्याड़े था, जो त्यारी रे ध्याड़े रे बादका ध्याड़ा था, तेस ध्याड़े मुख्य याजके होर फरीसी लोके पिलातुस हाकमे वाले आई किन्हें बोल्या, 63“हे माहराज, आस्सा जो याद आ कि तिन्हें धोखे देणे वाल़े आपणे जिन्दे जी बोलिरा था कि, मेरे मरणे रे तीन ध्याड़े ले बाद मां जी उठणा। 64इधी कठे हुक्म दे कि त्रीजे ध्याड़े तक डुआरा री रखवाली किती जाए। एह्ड़ा नी हो कि तेसरे चेले आई किन्हें तेसरी ल्हासा जो चोरी किन्हें लई जाए, होर लोका किन्हें बोल्दे लगे कि, यीसू मरिरे मन्झा ले जीउन्दा हुई गया। तेबे ये जी उठणे रा धोखा पैह्ल्के धोखे ले भी बुरा हूंणां जेथी यीसू आपणे आपा जो मसीहा बोलिरा था।” 65पिलातुस हाकमे तिन्हा किन्हें बोल्या, “तुस्सा वाले स्पाही ता हाए, जाउआ आपणी समझा रे मताबक रखवाली करा।” 66इधी कठे स्यों स्पाहीया जो आपणे साउगी लई गये, होर पात्थर पर मोहर ल्गाई किन्हें डुआरा री रखवाली किती।
Currently Selected:
मत्ती 27: MJLNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.