मत्ती 26
26
यीसू जो पकड़ने री योजना
(मरकु. 14:1-2; लूक. 22:1-2; यहू. 11:45-53)
1जेबे यीसू ये सभ गल्ला बोली बैठ्या, ता से आपणे चेले किन्हें बोल्दा लग्या। 2“तुस्से जाणहां ऐं कि दो ध्याड़े ले बाद फसहा रा साजा आ; होर हांऊँ माह्णुं रा मह्ठा क्रूसा प्रयाल्हे चढ़ाणे रे कठे पकड़ाया जाणा।”
3तेबे मुख्य याजक होर प्रजा रे यहूदी मुखिये कैफा बडे याजका रे दरबारा मन्झ कठा हुए। 4होर स्यों आपु मन्झ सोच विचार करदे लगे कि यीसू जो धोखे किन्हें पकड़े होर मारी दे। 5पर स्यों बोल्हा ऐं थे कि, “साजे रे ध्याड़े नी पकड़णा; केते एह्ड़ा नी हो कि लोका मन्झ हाल्ला पई जाए।”
यीसू पर कीमती खुस्बूदार इत्रा रा दलणा
(मरकु. 4:3-9; यहू. 12:1-8)
6जेबे यीसू बैतनिय्याह गांऊँआं मन्झ समौन कोढ़ी रे घरा मन्झ था। 7तेबे एक ज्नाने संगमरमरा रे भांडे मन्झ कीमती खुस्बूदार इत्र लई किन्हें तेस वाले आई, होर जेबे से खाणा खांदे बैठीरा था, ता तेस्से से कीमती खुस्बूदार इत्र तेसरे मूंडा पर दली दितेया। 8ये देखी किन्हें, यीसू रे चेले जल्ही किन्हें बोल्दे लगे, “एस इत्रा री इतनी बरबादी किधियो किती? 9ये कीमती खुस्बूदार इत्र ता खरी कीमता मन्झ बेची किन्हें गरीबा जो बांडी सक्हा ऐं थे।” 10ये जाणी किन्हें यीसूए तिन्हा किन्हें बोल्या, “तुस्से एस्सा ज्नानिया जो किधियो परेसान करहा ऐं? तेस्से मेरे किन्हें भलाई किती। 11गरीब ता तुस्सा साउगी हमेसा रैंहयां ऐं, पर मां तुस्सा साउगी हमेसा नी रैहणां। 12तेस्से मेरे मरणे ले पैहले ई मेरे सरीरा पर इत्र मली दितेया होर मेरे दफनाणे री त्यारी करी दिती। 13हांऊँ तुस्सा किन्हें सच्च बोल्हा कि, सारे संसारा मन्झ जेथी केथी ये खुसी री खबर प्रचार किती जाणी, तेथी तेस्सा रे एस कामा रा ब्खान भी तेस्सा री यादा मन्झ कितेया जाणा।”
यहूदा इस्करयोति रा धोखा देणा
(मरकु. 14:10-11; लूक. 22:3-6)
14तेबे यहूदा इस्करयोति जो बारा चेलेया मन्झा ले एक था, तिन्हें मुख्य याजका वाले जाई किन्हें बोल्या, 15“अगर हांऊँ यीसू जो तुस्सा रे हाथा मन्झ पकड़वाई देऊँ, ता तुस्सा मुंजो क्या देणा?” तिन्हें तेस जो तीह चांदी रे सिक्के तोली किन्हें देई दिते। 16होर से तेस ई टैमा ले तेस जो पकड़वाणे रा मौका तोप्दा लग्या।
चेले साउगी फसहा रे साजे री आखरी खाणा
(मरकु. 14:12-21; लूक. 22:7-13,21-23; यहू. 13:21-30)
17अस्जेह्ड़ी रोटी रे साजे रे पैहले ध्याड़े चेले यीसू वाले आई किन्हें पुछदे लगे, “आस्से फसहा रे साजे रा खाणा केथी त्यार करहे?” 18तिन्हें बोल्या, “गांऊँआं मन्झ फ्लाणे माह्णुं वाले जाई किन्हें तेस किन्हें बोला कि, गुरु बोल्हा कि, मेरा टैम नेडे आ, मां तेरे घरा आपणे चेले साउगी फसहा रा साजा मनाणा।”
19होर चेले यीसू रा हुक्म मन्या होर तिन्हें फसहा रे साजे रे खाणे री त्यारी किती। 20जेबे सांझ हुई, ता यीसू आपणे बारा चेलेया साउगी खाणा खांदे बैठ्या। 21जेबे स्यों खाणा खाया करहा ऐं थे, तेबे यीसूए बोल्या, “हांऊँ तुस्सा किन्हें सच्च बोल्हा कि, तुस्सा मन्झा ले ऐकीया हांऊँ पकड़वाणा।” 22होर एता पर स्यों दुःखी हुई गये होर एक-एक करी किन्हें यीसू ले पूछदे लगे, “हे गुरु, क्या से हांऊँ आं?” 23यीसूए जवाब दितेया कि, “जिन्हें मेरे साउगी थाली मन्झ हाथ पाईरा। 24क्यूंकि हांऊँ माह्णुं रे मह्ठे रा मरणा ता पक्का आ, जेह्ड़ा नबिये मेरे बारे पवित्र सास्त्रा मन्झ लिखिरा आ। पर जेस हांऊँ पकड़वाणा तेस कठे ये कितना ड्राऊणा हुणा! होर अगर तेस माह्णुं रा जन्म नी हुन्दा ता तेसरे कठे खरा हुन्दा।” 25तेबे तेसरे पकड़वाणे वाल़े यहूदा इस्करयोतिए बोल्या, “हे गुरु, क्या से हांऊँ आं?” यीसूए तेस किन्हें बोल्या, “तैं आप्हुए मन्नी लया।”
प्रभु-भोज
(मरकु. 14:22-26; लूक. 22:14-20; 2 कुरि. 11:23-25)
26जेबे स्यों खाया करहा ऐं थे तेबे यीसूए रोटी लई, होर परमेसरा रा धन्यावाद करी किन्हें तोड़ी, होर चेले जो देई किन्हें बोल्या, “लऊआ, खाऊआ; ये मेरा सरीर आ।” 27फेरी तिन्हें अंगूरा रे रसा रा डोंगा लई किन्हें परमेसरा रा धन्यावाद कितेया, होर तिन्हा जो देई किन्हें बोल्या, “होर तिन्हें सभिऐ तेता मन्झा ले पितेया। 28क्यूंकि ये वाचा रा मेरा से खून आ, जो सभी रे पापा री माफी रे कठे बहाया जाहाँ। 29हांऊँ तुस्सा किन्हें बोल्हा कि, ऐबे ये अंगूरा रा रस मां तेस ध्याड़े तक कधी नी पीणा, जेबे तक तुस्सा साउगी आपणे बापू रे राजा मन्झ नंऊँआं नी पिंऊँ।” 30फेरी स्यों भजन गाई किन्हें जैतूना रे प्हाड़ा पर गये।
पतरसा रे इनकारा रे बारे मन्झ भविस्यवाणी
(मरकु. 14:27-31; लूक. 22:31-34; यहू. 13:36-38)
31तेबे यीसूए तिन्हा किन्हें बोल्या, “जो मेरे साउगी हूंणे वाल़ा तेस वजहा ले आज राती ही तुस्सा हाऊँ छाडी देणा; क्यूंकि लिखिरा कि, पुहाल मारी दितेया जाणा; होर झुंडा री भेडा तितर-बितर हुई जाणी। 32पर मां आपणे जी उठणे ले बाद तुस्सा ले पैहले गलील जिल्ले जो जाणा।” 33एता पर पतरसे तेस किन्हें बोल्या, “अगर सभ तुस्सा जो छाडी देह्ंगे तेबे भी मां तुस्से नी छाडणे।” 34यीसूए तेस किन्हें बोल्या, “हांऊँ तेरे किन्हें सच्च बोल्हा कि, आज राती ई कुकड़ा रे बांग देणे ले पैहले, तुध त्राय बारी मुखरी जाणा।” 35पतरसे तेस किन्हें बोल्या, “अगर मुंजो तेरे साउगी मरणा भी पई जाए, तेबे भी, मां कधी नी मुखरणा।” होर सभी चेले भी एह्ड़ा बोल्या।
गतसमनी बगीचे मन्झ प्रार्थना
(मरकु. 14:32-42; लूक. 22:39-46)
36तेबे यीसू आपणे चेले साउगी गतसमनी बगीचे मन्झ आये होर आपणे चेले किन्हें बोल्दा लग्या, “एथी बैठी रैहया, जेबे तक कि हांऊँ तेथी जाई किन्हें प्रार्थना करूं।” 37होर से पतरस होर जब्दी रे दुंहें मह्ठे जो आपणे साउगी लई गया, होर दुआस होर परेसान हुँदा लग्या। 38होर यीसूए तिन्हा किन्हें बोल्या, “मेरा मन बौह्त दुआस आ, एथी तक कि हांऊँ मरणे वाल़ा आ: तुस्से एथी रूका, होर मेरे साउगी जागदे रहूआ।” 39फेरी से थोह्ड़ा जे अगे जाई किन्हें मुंहा रे भारे झुकी गया, होर ये प्रार्थना करदा लग्या कि, “कि अगर हुई सके ता दुःखा रा ये टैम मेरे वाले ले हट्टाई दे। तेबे भी जेह्ड़ा हांऊँ चाहां तेह्ड़ा नी, पर जेह्ड़ा तू चाहां तेह्ड़ा ई हो।”
40फेरी यीसू चेले वाले आया होर तिन्हें स्यों सुतिरे देखे, होर तिन्हें पतरसा किन्हें बोल्या, “क्या तुस्से मेरे साउगी एक घड़ी भी जागी नी सके? 41जागदे होर प्रार्थना करदे रैहया ताकि जेबे तुस्सा री परखणी हो तेबे तुस्से परखणी रा मुकाबला करी सको। तुस्सा रा मन ता परखणी रा मुकाबला करणे कठे त्यार आ, पर सरीर कमजोर आ।” 42फेरी तिन्हें दूजी बारी जाई किन्हें ये प्रार्थना किती, “हे मेरे बापू, अगर ये दुःख मेरे सहे बिना नी हटी सकदा ता तेरी इच्छा पूरी हो।” 43होर यीसूए दबारा वापस आई किन्हें स्यों तीनो चेले सुत्तिरे देखे, क्यूंकि स्यों बौह्त निंद्रा मन्झ थे कि स्यों आपणी हाखिया नी घुआड़ी सके; 44होर से तिन्हा जो छाडी किन्हें दबारा चली गया, होर सेई गल बोली किन्हें, तिन्हें त्रीजी बारी प्रार्थना किती। 45तेबे से चेले वाले आया होर तिन्हा किन्हें बोल्या, “तुस्से हल्ली भी सौंदे होर अराम करदे लगिरे, सुणा से टैम आई गईरा होर हांऊँ माह्णुं रा मह्ठा पापिया रे हाथा पकड़वाया जाहाँ। 46ऊठा, चला! देखा, मेरा पकड़वाणे वाल़ा नेडे आई गईरा।”
यीसू रा धोखे किन्हें पकड़वाया जाणा
(मरकु. 14:43-50; लूक. 22:47-53; यहू. 18:3-12)
47यीसू एह्ड़ा बोल्या ई करहा था कि, यहूदा इस्करयोति, जो बारा चेले मन्झा ले एक था, आया, होर आपणे साउगी मुख्य याजक होर लोका रे यहूदी मुखिये री तरफा ले एक बडी भीड़ तलवारा होर डंडे लई किन्हें आई। 48तेसरे पकड़वाणे वाल़े तिन्हा जो ये चिन्ह दस्सीरा था कि, जेस जो हांऊँ चूमी लू, सेई यीसू हूंणां, तेस जो तुस्से पकड़ी लया। 49होर तिन्हें झटपट यीसू वाले आई किन्हें बोल्या, “हे गुरु नमस्ते!” होर यहूदे यीसू गले ल्गाई किन्हें चूमी लया।
50यीसूए तिन्हा किन्हें बोल्या, “हे दोस्त, जेस कामा रे कठे तू आईरा, तेता जो करी ले।” तेबे तिन्हें तेस वाले आई किन्हें यीसू जो पकड़ी किन्हें गिरफ्तार करी लया। 51तेबे यीसू रे चेलेया मन्झा ले एकिये तलवार काढी होर बडे याजका रे नौकरा पर चलाई, होर तेसरा कान टुकी दितेया। 52तेबे यीसूए तेस किन्हें बोल्या, “आपणी तलवार म्याना मन्झ रखी ले क्यूंकि जो तलवार चलाहें, स्यों सभ तलवारा किन्हें नास किते जाणे। 53क्या तू नी समझ्दा कि, हांऊँ आपणे बापू ले बिनती करी सक्हा, होर तेस स्वर्गदूता री बारा पलटना ले भी ज्यादा मेरे वाले ऐबे हाजर करी देणे? 54पर पवित्र सास्त्रा री गल्ला किहाँ पूरी हूणीं, जिहां इन्हारा हूंणां जरूरी आ?” 55तेस टैम यीसूए भीड़ा किन्हें बोल्या, “क्या तुस्से डाकू समझी किन्हें मुंजो पकड़णे रे कठे तलवारा होर डंडे लई किन्हें निकली रे? हांऊँ हर ध्याड़े हर रोज मन्दरा मन्झ बैठी किन्हें उपदेस देहां था, तेबे तुस्से हांऊँ नी पकड़ेया। 56पर ये सभ इधी कठे हुआ ताकि नबिया रे ज्रीए पवित्र सास्त्रा री मन्झ लिखीरी गल्ला पूरी हुई जाए।” तेबे सभ चेले यीसू जो छाडी किन्हें भगी गये।
माहसभा रे साम्हणें यीसू
(मरकु. 14:53-65; लूक. 22:54,55,63-71; यहू. 18:13,14,19-24)
57तेबे यीसू रे पकड़ने वाल़े तेस जो कैफा बडे याजका वाले लई गये, जेथी व्यवस्था स्खाणे वाल़े होर यहूदी मुखिये कठे हुईरे थे। 58पतरस दूरा-दूरा ले ई तेसरे पीछे-पीछे बडे याजका रे आंघणा रे अंदर तक गया, होर जाई किन्हें यीसू रा अंत देखणे रे कठे पैहरेदारा किन्हें बैठी गया। 59ऐबे मुख्य याजक होर सारी माहसभा यीसू जो मारणे रे कठे झूठी गुआहा रे तोप्हा मन्झ थे। 60पर तिन्हो से मिलेया, होर कई झूठे गुआहे अगे आई किन्हें झूठ बोल्या। 61आखरी मन्झ दो जण आये, होर बोल्दे लगे कि, “इन्हें बोलिरा कि, हांऊँ परमेसरा रा मन्दर तीन ध्याड़े मन्झ ढाई सक्हा होर एस जो तीन ध्याड़े मन्झ बणाई सक्हा।”
62तेबे बडे याजके खड़े हुई किन्हें तेस किन्हें बोल्या, “तू कोई जवाब नी देंदा? ये लोक तेरे बरखलाफ गुआही देआ करहा ऐं?” 63पर यीसू चुप रैहया। तेबे बडे याजके तेस किन्हें बोल्या, “हांऊँ तुजो जिन्दे परमेसरा री कसम देहां कि, अगर तू परमेसरा रा मह्ठा मसीह आ ता तू आस्सा किन्हें बोली दे।” 64यीसूए तेस किन्हें बोल्या, “तैं आप्हुए बोली दितेया; पर हांऊँ तुस्सा किन्हें ये भी बोल्हा कि, ऐबे ले तुस्सा हांऊँ माह्णुं रा मह्ठा सर्वसक्तिमान परमेसरा रे सीधी वखा जो बैठिरे, होर आसमाना रे बादला पर आऊंदे देखणा।” 65यीसू जेबे एह्ड़ा बोल्दा लगीरा था ता ये सुणी किन्हें तेबे बडे याजके आपणा चोगा छेकी किन्हें बोल्या, “ऐबे आस्सा जो होर गुआहा रा क्या काम आ? तुस्से सभ एस जो परमेसरा री निंदा करदे हुए सुणी करहा ऐं, 66तुस्से क्या सोच्हा ऐं?” तिन्हें जवाब दितेया, “ये मौता री सजा रे लायक आ।” 67तेबे तिन्हें तेसरे मुंहा पर थुक्या, होर तेस जो मुक्के मारे, होरिये थप्पड़ मारी किन्हें बोल्या। 68“हे मसीह, भविस्यवाणी करी किन्हें बोल कि, तू कुने मारेया?”
पतरसा रा इनकार
(मरकु. 14:66-72; लूक. 22:56-62; यहू. 18:15-18,25-27)
69होर पतरस बाहर आंघणा मन्झ था, ता बडे याजका री नौकराणिया मन्झा ले एक तेथी आई होर बोल्या, “तू भी यीसू साउगी था जेहड़ा गलील जिल्ले रा आ।” 70तिन्हें सभी रे साम्हणें से मुखरी गया “होर बोल्या, हांऊँ नी जाणदा तू क्या लगरी बोल्दी।” 71जेबे से डेहली ले बाहर चली गया, ता दूजी नौकराणिये तेस जो देखी किन्हें तिन्हा किन्हें जो तेथी थे बोल्या, “ये भी ता नासरता रे यीसू साउगी था।” 72पतरसे कसम खाधी होर दबारा मुखरी गया कि, “हांऊँ तेस आदमी जो नी जाणदा।” 73थोह्ड़ी देरा ले बाद, जो तेथी खड़ीरे थे, तिन्हें पतरसा वाले आई किन्हें बोल्या, “पक्का तू यीसू रे साउगी रैह्णे वाल़ेया मन्झा ले एक आ; क्यूंकि तेरी बोली ले लग्या करहा कि तू गलील जिल्ले रा।” 74पतरसे बोल्या हांऊँ कसम खाई किन्हें बोल्हा कि, “हांऊँ तेस माह्णुं जो नी जाणदा।” होर तेभे कुकड़े बांग दिती। 75तेबे पतरसा जो यीसू री बोलिरी ये गल याद आई कि, “कुकड़ा रे बांग देणे ले पैहले तुध त्राय बारी मेरी नांह करणी।” होर से बाहर जाई किन्हें जोरा-जोरा किन्हें बड़ा भारी रोंदा लग्या।
Currently Selected:
मत्ती 26: MJLNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.