लूका 3

यहून्ना बपतिस्मा देणे वाल़े रा प्रचार

(मत्ती 3:1-12; मरकु. 1:1-8; यहू. 1:19-28)

1रोम देसा रा सम्राट तिबिरियुस महाराजे रे राजा रे पन्ध्रुए साला मन्झ पुन्तियुस पिलातुस यहूदिया ईलाके रा हाकम था। तेस टैमा मन्झ हेरोदेस राजा गलील जिल्ले पर राज करहा था। राजा हेरोदेस राजे रा भाई फिलिप्पुस इतूरैया होर त्रखोनितिस जिल्ले पर राज करहा था। होर अबिलेने जिल्ले पर लिसानियास राज करहा था। 2होर तेबे हन्ना होर कैफा बडे याजक थे। तेस टैम परमेसरा रा बचन बियाबान जगहा मन्झ जकरयाह रे मह्ठे यहून्ना बपतिस्मा देणे वाल़े पुज्हेया। 3होर यहून्ना बपतिस्मा देणे वाल़ा यरदन दराऊआ रे ओरले परले सारे ईलाके मन्झ आई किन्हें पापा री माफी रा प्रचार करदा लग्या कि, “पाप करणा छाडी देआ, होर बपतिस्मा लउआ होर परमेसरा तुस्सा रे पाप माफ करणे।” 4यसायाह नबिये यहून्ना बपतिस्मा देणे वाल़े रे मन्झ बोलिरा था जेबे तिन्हें आपणे कताबा मन्झ लिखिरा कि;

“बियाबान जगहा मन्झ हाका पाणे वाल़े री अवाज सुणह्या करहा ई कि,

‘प्रभु रे कठे आपणे मन त्यार करा, तेसरी सड़का सीधी करा।

5हर एक घाटी भर्ही जाणी,

हर एक पाहड़ होर टीला बराबर कितेया जाणा,

जो टेढ़ा आ से सीधा,

होर जो ऊँचा आ से नीचा,

जो उबड़ खाबड़ आ से चौरस पैंडा बणी जाणा।

6होर हर लोका परमेसरा रा उद्धार देखणा।’”#3:6 यसा. 40:3-5

7जेबे भीड़ा री भीड़ तेस ले बपतिस्मा लेणे रे कठे आया करहा ई थी, यहून्ने तिन्हें किन्हें बोल्हा था, “तुस्से लोक जैहर्ले कीड़े रे बच्चे साहीं ऐं, तुस्सा जो कुने दसेया कि परमेसरा रे आऊणें वाल़े गुस्से ले भगा। 8इधी कठे एह्ड़ा काम करा कि जेता ले पता लगी सके कि तुस्से पाप करणा छाडी दितेया। होर फेरी आपणे-आपणे मना मन्झ एह्ड़ा मत सोचा कि, आस्सा रा बापू अब्राहम आ; क्यूंकि हांऊँ तुस्सा किन्हें बोल्हा कि, परमेसर इन्हा पात्थरा ले भी तुस्सा रे बदले अब्राहम रे कठे बच्चे पैदा करी सक्हा। 9होर ऐबे ता छहू डाला री जड़ा पर रखी दितिरा, इधी कठे जो-जो डाल खरा फल नी देंदा तेस जो काटी किन्हें आगी मन्झ पाई किन्हें फुकी देहां ऐं।” 10होर लोके तेस ले पूछदे रहे, “ता परमेसरा रे गुस्से ले बचणे रे कठे आस्से क्या करिए?” 11यहून्ना बपतिस्मा देणे वाल़े तिन्हा जो जवाब दितेया कि, “जेस वाले जे दो कुरते हो से तेस जो देई दे, जेस वाले जे नी हाऐ, होर जेस वाले जे खाणा हो, से भी एह्ड़ा ई करहे।” 12होर चुंगी लैणे वाल़े भी बपतिस्मा लैणे रे कठे आये, होर तेस ले पूछेया कि, “हे गुरु, आस्से क्या करिए?” 13यीसूए तिन्हा किन्हें बोल्या, “जितना कर कठ्ठा करणे जो बोलिरा, तेता ले ज्यादा कर नी लैणा।” 14होर स्पहिए भी तेस ले ये पूछेया, “आस्से क्या करिए?” तिन्हें तिन्हा किन्हें बोल्या, “केसी पर अत्याचार नी करणा, होर ना झूठा दोस ल्गाणा, होर आपणी कमाई पर सन्तुस्ट रैंह्णां।”

15जेबे लोके मसीहा रे जल्दी आऊणें री आस ल्गाईरी थी, इधी कठे सभ आपणे-आपणे मना मन्झ यहून्ना बपतिस्मा देणे वाल़े रे बारे मन्झ विचार करेया करहा ऐं थे कि, क्या येई मसीह ता नी ई आ? 16ता यहून्ना बपतिस्मा देणे वाल़े तिन्हा सभी जो जवाब दितेया कि, “हांऊँ ता तुस्सा जो पाणी किन्हें बपतिस्मा देहां, पर से जे आऊणें वाल़ा आ, जो मेरे ले सक्तिसाली आ; हांऊँ ता एस लायक भी नी आ कि, तेसरे बूटा रे तस्मे खोल्ही सकूं, तेस तुस्सा जो पवित्र आत्मा होर आगी किन्हें बपतिस्मा देणा। 17से आपणा सूप हाथा मन्झ लई किन्हें त्यार आ, होर तेस आपणा खेत या डोर्ही ठीक ढंगा किन्हें साफ करणी, होर आपणी गाही री कणक ता तेस आपणे गोदामा मन्झ कठी करणी, पर भूह तेस आगी मन्झ फूकी देणा; जो आग कधी बूझणे वाली नी ई।”

18एता कठे यहून्ना बौह्त सारी खरी उपदेस देई किन्हें लोका जो खुसी री खबर सुणांदा रैंहयां। 19पर जेबे यहून्ना बपतिस्मा देणे वाल़े गलील जिल्ले के हेरोदेस राजे जो तेसरे भाई फिलिप्पुसा री लाड़ी हेरोदियासा साउगी बुरे सबंध रखणे रे कठे से प्रुआचेया। 20इधी कठे हेरोदेस राजे यहून्ना बपतिस्मा देणे वाल़े जो जेल्हा मन्झ पाई किन्हें जितने बुरे काम तिन्हें कितरे थे, तेता मन्झ तिन्हें एक होर जोड़ी लया।

यीसू रा बपतिस्मा होर परखणी

(मत्ती 3:13-17; मरकु. 1:9-11)

21पर एता ले पैहले कि यहून्ना बपतिस्मा देणे वाल़े जो जेहला मन्झ पाई दितेया जांदा, सब लोका रा बपतिस्मा हुआ, तेबे यीसू रा भी बपतिस्मा हुआ, तेता ले बाद, जेबे यीसू प्रार्थना करेया करहा था, ता आसमान खुल्ही गया। 22होर पवित्र आत्मा जो कबूतरा रे रूपा मन्झ आपणे गास उतरदे देख्या। होर परमेसरे स्वर्गा ले बोल्या कि, “तू मेरा लाडला मह्ठा आ, हांऊँ तुध किन्हें बौह्त खुस आ।”

यीसू रे बापदादेया रे नांऊँ री सूची

(मत्ती 1:17)

23जेबे यीसू आपु खुद उपदेस देंदा लग्या, से लगभग तीह साला रा था होर जेह्ड़ा लोक समझ्हा ऐं थे, यीसू युसुफा रा मह्ठा था। यीसू मसीह रे बापदादेया रे नांऊँ री सूची इंहां ई: यीसू रा बापू युसूफ ऐली रा मह्ठा था। 24होर ऐली मत्ताता रा, होर मत्तात लेवी रा, होर लेवी मलकी रा, होर मलकी यन्ना रा, होर यन्ना युसुफा रा। 25होर युसूफ मत्तियाह रा मह्ठा था, होर मत्तियाह आमोसा रा, होर आमोस नहूमा रा, होर नहूम असल्याहा रा, होर असल्याह नोग्हा रा। 26होर नोग्ह माता रा, होर मात मत्तियाहा रा, होर मत्तियाह सिमी रा, होर सिमी योसेखा रा, होर योसेख योदाहा रा। 27होर योदाह यूहन्ना रा मह्ठा था, होर यूहन्ना रेसा रा, होर रेसा जरूब्बाबेला रा, होर जरुब्बाबिल सलतियेला रा, होर सलतियेल नेरी रा। 28होर नेरी मलकी रा, होर मलकी अद्दी रा, होर अद्दी कोसमा रा, होर कोसम एल्मदाम रा, होर एल्मदाम एरा रा। 29होर एरा येसू रा, होर येसू एलिएजरा रा, होर एलिएजर योरिमा रा, होर योरिम मत्ताता रा, होर मत्तात लेवी रा। 30होर लेवी समौना रा मह्ठा था, होर समौन यहुदाहा रा, होर यहुदाह यूसुफा रा, होर युसुफ योनाना रा, होर योनान एलयाकीम रा। 31होर इलयाकीम मलेयाहा रा, होर मलेयाह मिन्नांहा रा, होर मिन्नांह मत्तता रा, होर मत्तत नाताना रा, होर नातान राजा दाऊदा रा। 32होर राजा दाऊदा यिसै रा, होर यिसै ओबेदा रा, होर ओबेद बोअजा रा, होर बोअज सलमोना रा, होर सलमोन नहसोना रा। 33होर नहसोन अम्मीनादाबा रा मह्ठा था, होर अम्मीनादाब आदमीना रा होर आदमीन अरनी रा, होर अरनी हिस्रोना रा, होर हिस्रोन फिरिसा रा, होर पेरेस यहूदा रा। 34होर यहूदा याकूबा रा, होर याकूब इसहाका रा, होर इसहाक अब्राहमा रा, होर अब्राहम तेरहा रा, होर तेरह नाहोरा रा। 35होर नाहोर सरूगा रा, होर सरूग रेऊआ रा, होर रेऊ पेलेग रा, होर पेलेग एबिरा रा, होर एबिर सिलहा रा। 36होर सिलहा केनाना रा मह्ठा था, होर केनान अरफक्सदा रा, होर अरफक्सद सेम रा, होर सेम नुहा रा, नूह लामेखा रा। 37होर लामेख मथुसिल्हा रा, होर मथुसिल्हा हनोका रा, होर हनोक यिरीदा रा, होर यिरीद महललेला रा, होर महललेल केनाना रा। 38होर केनान एनोसा रा, होर एनोस सेत रा, होर सेत आदमा रा, होर आदम परमेसरा रा मह्ठा था।

Currently Selected:

लूका 3: MJLNT

Highlight

Copy

Compare