लूका 2

बैतलैहम गांऊँआं मन्झ यीसू रा जन्म

(मत्ती 1:18-25)

1तिन्हा ध्याड़े रोम देसा रे सम्राट औगुस्तुस महाराजे री तरफा ले हुक्म निकल्या कि, सारे रोम देसा रे लोका रे नांऊँ लिखे जाए। 2ये पैहली नांऊँ लिखाई तेस टैम हुई, जेबे क्विरिनयुस सीरिया ईलाके रा हाकम था। 3होर सभ लोक नांऊँ लिखवाणे रे कठे आपणे-आपणे बापदादेया रे गांऊँआं जो चली गये। 4एता कठे कि युसुफ भी राजा दाऊदा रे खानदाना होर बंसा ले था, से भी गलील जिल्ले रे नासरत गांऊँआं ले यहूदिया ईलाके मन्झ दाऊदा रे गांऊँआं बैतलैहम जो चली गया। 5ताकि से आपणी बरेड़ गर्भवती मरियमा साउगी तेथी आपणा नांऊँ लिखवाए। 6जेबे स्यों बैतलैहम गांऊँआं मन्झ आये होर तिन्हारे रैहणे रे कठे तेथी जगहा नी मिली। इधी कठे स्यों गुआणिया मन्झ रहे, होर जेबे तेथी रेह्न्दे मरियमा रा सुधगणे रा टैम आया। 7होर तेस्से आपणा पैहलोठा मह्ठा जणेया होर तेस जो कपड़े मन्झ लपेटी किन्हें खुरली मन्झ रख्या।

स्वर्गदूता रे ज्रीए पुहाला जो खबर

8होर तेस ईलाके मन्झ कुछ पुहाल थे, जो राती मदाना मन्झ रही किन्हें आपणे झुंडा री पैहरेदारी करेया करहा ऐं थे। 9होर प्रभु रा एक स्वर्गदूत तिन्हा वाले आई किन्हें खड़ा हुआ, होर प्रभु रा तेज प्रयासा तिन्हारे चारो तरफ चमक्या, होर स्यों बौह्त डरी गये। 10तेबे स्वर्गदूते तिन्हा किन्हें बोल्या, “मत डरा; क्यूंकि देखा हांऊँ बड़ी खुसी री खबर सुणाहां; जो सभ लोका रे कठे खुसी री गल हूणीं। 11होर से खबर येई कि आज राजा दाऊदा रे गांऊँआं बैतलैहम मन्झ एक उद्धारकर्ता तुस्सा रे कठे जम्मिरा, होर येई मसीह प्रभु आ। 12होर एस गल्ला रा तुस्सा रे कठे ये चिन्ह हूंणां कि, तुस्सा एक बच्चे जो कपड़े मन्झ लपेटिरा होर खुरली मन्झ लेटीरा देखणा।” 13तेबे अचानक तेस स्वर्गदूता साउगी होर बौह्त सारे स्वर्गदूता रा एक दल परमेसरा री बड़ाई करदे होर ये बोल्दे हुए सुझ्या,

14“स्वर्गा मन्झ परमेसरा री महिमा

होर धरती पर तिन्हा माह्णुं मन्झ जिन्हा ले से खुस आ, सांति हो।”

पुहाला रा बैतलैहम गांऊँआं मन्झ जाणा

15जेबे स्वर्गदूत तिन्हा वाले ले स्वर्गा जो चली गये, ता पुहाले आपु मन्झ बोल्या, “आऊआ आस्से बैतलैहम गांऊँआं जाई किन्हें तिन्हा सभी गल्ला जो देख्हा ऐं जो प्रभुऐ आपणे स्वर्गदूता रे ज्रीए आस्सा जो दसीरी।” 16होर तिन्हें झटपट जाई किन्हें मरियम होर युसुफा जो होर खुरली मन्झ तेस बच्चे जो लेटिरा देख्या। 17होर पुहाले तेस बच्चे जो देखणे रे बाद तेस बच्चे रे बारे स्वर्गदूते तिन्हा किन्हें बोलिरा था, तेता रे बारे मन्झ तिन्हें सभी जो दसी दितेया। 18होर जेस केसिए भी पुहाला री गल्ला सुणी, तिन्हा जो हरानी हुई। 19पर मरियम ये सभ गल्ला आपणे मना मन्झ रखी किन्हें सोच्दी रही। 20होर पुहाल जेह्ड़ा तिन्हा किन्हें स्वर्गदूते बोलिरा था, तेह्ड़ा ई सभ सुणी होर देखी किन्हें स्यों परमेसरा री बड़ाई करदे हुए वापस चली गये।

यीसू रा नामकरण

21जेबे तेस बच्चे रे जम्मिरे रे आठ ध्याड़े पुरे हुई गये, ता तेसरा खतना कितेया। होर तेसरा नांऊँ यीसू रख्या, तेसा जो ये नांऊँ तेसरे गर्भा मन्झ आऊणें ले पैहले ई स्वर्गदूता रे ज्रीए देई दितिरा था।

मन्दरा मन्झ यीसू रा अर्पण

22-24जेबे मूसा री व्यवस्था रे मताबक मरियम होर युसूफा रे सुद्ध हूंणे रे ध्याड़े पुरे हुए, ता स्यों यरुस्लेम सैहरा रे मंदरा मन्झ आये। स्यों तेथी मूसा री व्यवस्था रे मताबक घुघ्ही रा एक जोड़ा, या कबूतरा रे दो बच्चे रा बलिदान करणे रे कठे आईरे थे। तिन्हें यीसू भी आपणे साउगी यरुस्लेम सैहरा मन्झ ल्यान्देया कि तेस जो प्रभु रे साम्हणें अर्पण करी सके, क्यूंकि मूसा री व्यवस्था मन्झ लिखिरा कि: “हर एक पैहला बच्चा प्रभु रे कठे पवित्र ठैहरणा।”#2:22-24 निर्ग. 13:2-12

समौना री भविस्यवाणी

25होर तेस टैमा यरुस्लेम सैहरा मन्झ समौन नांऊँआं रा एक माह्णुं था, होर से माह्णुं धर्मी होर भक्त था; होर से मसीहा रा इंतजार करेया करहा था कि से आई किन्हें इस्राएल देसा मन्झ सुख चैन दे, होर पवित्र आत्मा तेस पर था। 26पवित्र आत्मा तेस जो दसिरा था कि, जेबे तक से प्रभु रे मसीहा रा दरसन नी करी लैंघा, तेबे तक तेस नी मरणा। 27तेस ध्याड़े समौन पवित्र आत्मा ले प्रेरणा पाई किन्हें मन्दरा मन्झ आया। होर माऊ बापू तेस बच्चे जो मन्दरा मन्झ अंदर लई आये कि, तेसरे कठे मूसा री व्यवस्था रे रूआजा रे मताबक करहे। 28तेबे तिन्हें से आपणी गोदा मन्झ चक्या होर परमेसरा रा धन्यावाद करी किन्हें बोल्या:

29“हे प्रभु, ऐबे तू आपणे सेऊआदारा जो

वादा कितरा था तेसरे मताबक सांति किन्हें मरणे दे।

30क्यूंकि मैं से उद्धारकर्ता देखी लया, जेह्ड़ा तैं सभ लोका रे उद्धारा कठे भेजीरा।

31जेस जो तैं सभ देसा रे लोका रे साम्हणें त्यार कितिरा।

32कि से अन्यजाति लोका रे कठे परमेसरा जो देखणे री ज्योति ई,

होर तेरे आपणे लोक इस्राएल देसा रे कठे महिमा आ।”#2:32 यसा. 42:6, यसा. 49:6

33होर यीसू रे माऊ-बापू समौन री इन्हा गल्ला ले जो यीसू रे बारे मन्झ बोलिरी थी, हरान हुंहाँ ऐं थे। 34तेबे समौने तिन्हा जो आसरीवाद देई किन्हें, तेसरी माऊ मरियमा किन्हें बोल्या, “सुण, एस बच्चे रे बारे मन्झ पैहले ले ई तय करी दितिरा कि एसरे ज्रीए कई इस्राएल देसा रे लोका परमेसरा ले दूर हुई जाणा। होर कईया परमेसरा वाले वापस आई जाणा, होर एस लोका जो चतन्न करणे वाल़े साहीं हूंणां होर कई एसरे बरखलाफ हूणें। 35होर तेरा प्राण भी तलवारा रे साहीं बड़े दुःखा किन्हें छिदी जाणा, एता ले कई लोका रे दिला रे विचार जाहिर हुई जाणे।”

हन्नाह री गुआही

36होर हन्नाह नांऊँआं री एक नबण मंदरा मन्झ थी। से असेरा रे गोत्रा मन्झा ले फनूएला नांऊँआ रे आदमी री मह्ठी थी। से बौह्त स्याणी थी, होर ब्याह हूंणे ले बाद सात साला तक आपणे लाड़े साउगी रही थी। 37हन्नाह चुरासी साला ले एक विधवा री जिन्दगी जिया करहा ई थी; होर तेस्से हमेसा मन्दरा मन्झ रही किन्हें परमेसरा री राती ध्याड़ी अराधना किती, होर से हमेसा ब्रत होर प्रार्थना करदी रैंहयां थी। 38होर हन्नाह तेस ई टैम मंदरा मन्झ युसूफ, मरियम होर बच्चे वाले आई किन्हें परमेसरा रा धन्यावाद करदी लगी। होर से सभी जो यीसू रे बारे मन्झ दसदी लगी, जो परमेसर रे भेजीरे मसीहा रा इंतजार करहा ऐं थे जो आई किन्हें यरुस्लेम सैहरा रे लोका जो छुटकारा देणा।

नासरत गांऊँआं जो वापस आऊंणा

39होर जेबे यीसू रे माऊ-बापू मूसा री व्यवस्था रे मताबक सभ कुछ निपटाई चुके ता स्यों गलील जिल्ले मन्झ आपणे नासरत गांऊँआं जो दबारा वापस चली गये। 40होर से बच्चा यीसू बढ़दा, होर ताकतवर हुन्दा, होर बुद्धि किन्हें परिपूर्ण हुन्दा गया; होर परमेसरा रा अनुग्रह तेस पर था।

बालक यीसू मन्दरा मन्झ

41यीसू रे माऊ बापू हर साल फसहा रा साजे मन्झ यरुस्लेम सैहरा जो जांदे रैंहे थे। 42जेबे यीसू बारा साला रा हुआ, ता स्यों साजे रे रूआजा रे मताबक यरूस्लेम सैहरा जो चली गये। 43होर जेबे युसूफ होर मरियम तिन्हा ध्याड़े जो पूरा करी किन्हें वापस घरा जांदे लगे। यीसू यरुस्लेम सैहरा मन्झ ई रुकी गया; होर ये गल तेसरे माऊ बापू नी जाणदे थे। 44तिन्हें ये समझ्या कि, से बच्चा बाकि होर यात्रिया साउगी हूंघा। एक ध्याड़े रा सफर खत्म हुआ, होर स्यों यीसू जो आपणे टब्बरा होर जाण पैहचाण वाल़े लोका मन्झ तोप्दे लगे। 45पर जेबे से नी मिल्या, ता तेस जो तोप्दे-तोप्दे स्यों यरुस्लेम सैहरा जो वापस आई गये। 46होर तीन ध्याड़े ले बाद तिन्हा जो से मन्दरा रे आंघणा मन्झ गुरूआ रे बीचो बीच बैठिरे, तिन्हारी सुणदे होर तिन्हा ले सुआल करदे मिल्या। 47होर जितने तेसरी सुणेया करहा ऐं थे, स्यों सभ तेसरी समझ होर तेसरे जवाबा ले हरान थे। 48तेबे यीसू रे माऊ बापूए से देखेया ता स्यों हरान हुए, होर तेसरी माऊऐ तेस किन्हें बोल्या, “हे मह्ठा, तैं आस्सा किन्हें एह्ड़ा किधियो कितेया? देख, तेरा बापू होर हांऊँ तुजो तोप्दे-तोप्दे परेसान हुई गईरे थे।”

49यीसूए तिन्हा किन्हें बोल्या, “तुस्से मुंजो किधियो तोपेया करहा ऐं थे? क्या तुस्से नी जाणदे थे कि, मुंजो आपणे बापू रे घरा मन्झ हूंणां जरूरी आ।” 50पर जो गल यीसूए तिन्हा किन्हें बोली, स्यों तिन्हा जो नी समझी सके। 51तेबे से तिन्हा साउगी गया, होर नासरत गांऊँआं मन्झ आया, होर से आपणे माऊ-बापू रा केहणा मना था। होर तेसरी माऊऐ ये सभ गल्ला आपणे मना मन्झ रखी। 52होर यीसू बुद्धि होर कद काठी मन्झ होर परमेसर होर माह्णुंआं रे अनुग्रहा मन्झ बढ़दा गया।

Currently Selected:

लूका 2: MJLNT

Highlight

Copy

Compare