रोमियो 9

परमेशर कने तिसरे चुणीरे लोक

1हऊँ मसीह रा, कने मेरा दिल कने पवित्र आत्मा ये पक्का कराँ ये भई हऊँ सच्च बोलां कने हऊँ झूठ नीं बोलीराँ 2ताहली जे हऊँ बोलां भई मेरा दुख कितना बड्डा, कने मेरे अपणे लोकां यनि मेरे यहूदी भाई भैणां रे खातर मेरे दिला च कितना दर्द आ। 3तिन्हां रिया भलाईया रे खातर हऊँ ये चाँह था भई हऊँ खुद परमेशरा रे श्रापा रे अधीन हुईने मसीह ते लग हुई जान्दा। 4सै इस्राएली लोक ये, तिन्हांजो जे परमेशरे गोद लेईरा कने पुत्र हुणे रा अधिकार दित्तिरा, सै जे परमेशरा रिया महिमा रा दर्शण करी बैठिरे, सै जे परमेशरा रे करारा रे भागीदार ये, तिन्हांजो जे मूसा री व्यवस्था दित्ति गईरी कने सच्ची अराधना कने परमेशरा रे वायदे तिन्हांरे इ हाये। 5अब्राहम, इसहाक कने याकूब तिन्हांरे पूर्वज ये, कने सै जे यीशु मसीह रे बी पूर्वज थे, सै जे परमेशर आ कने सै जे सब्बीं रे ऊपर राज कराँ, तिसरी हमेशा प्रशंसा ओ! आमीन।

6पर येढ़ा निआं भई परमेशरे अपणा वायदा पूरा नीं कित्या, काँह्भई सै जे इस्राएल रे बंशज ये, हकीकत च सै सारे इस्राएली नींये; 7कने नांई अब्राहम रे वंशज हुणे रिया वजह ने सै सारे तिसरे सच्चे बच्चे बणी जान्दे, काँह्भई परमेशरे अब्राहम जो बोल्या था, “सै जे इसहाक रे वंशा ते जन्म लें सैई तेरे बंशज मन्ने जाणे।” 8यनिके इसरा मतलब ये निआं भई सारे अब्राहम रे बच्चे परमेशरा रे बच्चे मन्ने जाणे, पर सिर्फ वायदे रे बच्चे इ अब्राहम रे वंशज मन्ने जाणे। 9काँह्भई परमेशरे इस तरिके ने वायदा कित्या था, “मांह अगले साल इस वगत दोबारा औणा, कने सारा ते इक पुत्र हूणा।”

10इतणा इ नीं पर रिबका रे जुड़वा बच्चयां रा इक इ पिता था, सै जे अहांरा पूर्वज इसहाक था। 11-12जुड़वा बच्चयां रे जमणे ते पैहले कने सै किछ बी भला बुरा करने ते पैहले परमेशरे रिबका जो बोल्या, भई “तेरे बड्डे बेटे छोट्टे री सेवा करनी।” परमेशरे ये दसणे खातर ये बोल्या भई सै अपणा चुनाब खुद कराँ कने इसरी वजह ये नीं थी भई तिन्हां चते किन्हिये किछ कित्या था। 13तियां जे पवित्रशास्त्रा च लिखिरा, “पर मैं याकूब जो चुणया कने एसाव रा इन्कार कित्या।”

14इस खातर अहें क्या बोलिये? क्या परमेशर अन्यायी आ? कदीं मनी। 15काँह्भई परमेशर मूसा ने बोलां,

“हऊँ जिस किसी पर बी दया करना चाऊँ तिस पर दया करगा,

कने जिस किसी पर किरपा करना चाऊँ तिस पर बी किरपा करगा।”

16इस खातर ये नांत किसी माहणुये रिया इच्छा पर निर्भर कराँ कने नां किसी रे कोशिश करने पर वल्कि दया करने औल़े परमेशरा पर निर्भर कराँ।

17काँह्भई पवित्रशास्त्रा च परमेशरे मिस्र देशा रे राजे (फिरौन) जो गलाया था, “मैं तिज्जो इस खातर राजा बणाया था भई तेरा इस्तेमाल करीने हऊँ सब्बीं जो अपणी सामर्थ दस्सी सक्कूं, कने मेरा नौं हर जगह तित्थी जे लोक ये तिन्हौं प्रचार कित्या जाओ।” 18इस खातर परमेशर जिस पर चाँह तिस पर दया कराँ कने तिस्सो जे चाँह तिस्सो कठोर बणाई देआं।

परमेशरा रा कोप कने तिसरी दया

19तां तुहां चते कोई मिन्जो ये पुछगे, “जे ये येढ़ा, तां परमेशर काँह अहांजो दोष लगां? काँह्भई कोई बी परमेशरा जो उसते रोकी नीं सकता तिसजो जे सै करना चाँह।” 20मेरे मित्र, परमेशरा ने बैहस करने औल़ा तू कुण हुआं? क्या कोई रचना अपणे रचणे औल़े ते पुछी सक्कां इ, “तैं मिन्जो येढ़ा कजो बणाया?” 21क्या किसी कम्हारा जो मिट्टिया पर ये अधिकार निआं भई मिट्टिया रे इक्की पेड़े ते इक भान्डा आदर करने खातर कने दुज्जे जो बेकदरिया रे खातर बणाओ?

22तां इसच कुण जेई हैरानिया री गल्ल इ? हलाँकि परमेशरा जो अपणा गुस्सा कने अपणी शक्ति दिखाणे रा अधिकार आ, पर सै तिन्हां लोकां सौगी बौहत धैर्य रखां तिन्हांरे ऊपर जे तिसरा गुस्सा पौआं कने सै जे विनाशा रे खातर तैह आ। 23कने परमेशरे बी अपणी जादा महिमा परगट करने खातर अहांजो तिसते भरीत्या सै जे तिसरिया दया रिया वजह ने हुया, अहां चते तिन्हांजो परमेशरे अपणी महिमा पाणे खातर त्यार कित्तिरा। 24यनिके अहें सै चुणीरे लोक ये चाये अहें यहूदी ओ या अन्यजातियां रे ओ। 25तियां जे होशे भविष्यवक्ते रिया कताबा च परमेशर बोलां,

“सै लोक जे मेरे नीं थे, तिन्हांजो मांह अपणे लोक बोलणा;

कने मांह तिन्हांने प्यार करना, तिन्हांजो जे मैं पैहले प्यार नीं कित्या।

26कने येढ़ा हूणा भई तिसा जगह च परमेशरे तिन्हाने ये गलाया था

भई तुहें मेरे लोक नींये, तिसा जगह पर सै जिऊंदा परमेशरा रे बच्चे कहलाणे।”

27कने यशायाह भविष्यवक्ता इस्राएल रे बारे च चिल्लाई ने बोलां,

“चाये इस्राएली लोक समुद्रा रे रेता रे बराबर हो, तां बी तिन्हां चते सिर्फ थोड़े इ बचणे।

28काँह्भई प्रभुये बौहत जल्द,

संसारा रे सारयां लोकां रा न्याय मजबूतिया ने करना।”

29तियां जे यशायाह भविष्यवक्ते पैहले बी गलाया था,

“जे सर्वशक्तिमान प्रभु अहांरे खातर किछ बंशज नीं छडदा,

तां अहें सदोम साई कने अमोरा साई हुई जान्दे।”

इस्राएल रा अविश्वास

30तां फेरी अहें क्या बोलिये? अहें इस नतीजे पर पुज्जे भई अन्यजातियां रे लोक सै जे धार्मिकता रिया खोज्जा च नीं थे, तिन्हे धार्मिकता पाई ली यनिके सै जे विश्वासा रिया वजह ने धर्मी बणाये गये, 31पर इस्राएल रे लोक, सै जे येढ़िया व्यवस्था जो टोल़ीराँ थे सै जे तिन्हौं परमेशरा सौगी ठीक रक्खी सक्कां थी, पर तिन्हांजो नीं मिली।

32कोई पुच्छी सक्कां, तिन्हांजो व्यवस्था काँह नीं मिली? काँह्भई सै अपणे खरयां कम्मां पर निर्भर थे, पर परमेशरा पर विश्वास नीं करदे थे, तिन्हे तिस पत्थरा ने ठोकर खाद्दि सै जे ठोकर देआं,#9:32 तिन्हे तिस पत्थरा ने ठोकर खाद्दि सै जे ठोकर देआं, मतलब सै मसीह पर नराज थे तिसरी तुलना जे इक्की पत्थरा ने कित्ती जाई सक्कां इ सै जे लोकां जो ठोकर देआं 33तियां जे पवित्रशास्त्रा च लिखिरा,

“ध्याना ने सुणा, हऊँ यरूशलेम च इक पत्थर रखां तिसते जे लोकां जो ठोकर लगणी कने सै गिरने,

पर सै जे कोई तिस पर विश्वास कराँ सै कदीं शर्मिन्दा नीं हूणा।”

Currently Selected:

रोमियो 9: KFSNT

Highlight

Copy

Compare