रोमियो 10
10
1मेरे साथी विश्वासियो, ये मेरे दिला री इच्छा इ कने हऊँ परमेशरा ने इस्राएल रे लोकां खातर प्राथना कराँ भई तिन्हांरा छुटकारा ओ। 2काँह्भई हऊँ जाणाँ भई तिन्हां च परमेशरा रे प्रति उत्साह हया, पर तिन्हांरा ये उत्साह सच्चे ज्ञाना रे मुतावक नींआ। 3काँह्भई सै तिसा धार्मिकता जो नीं जाणी पाये सै जे परमेशरा ते मिलां इ, कने तिन्हें अपणी इ धार्मिकता जो बनाणे री कोशिश कित्ती, इस खातर तिन्हे परमेशरा रिया धार्मिकता रे खातर अप्पूँजो नीं सौंपया।
4काँह्भई मसीह तिस मकसदा जो पूरा करी चुक्कीरा, जिस मकसदा खातर जे व्यवस्था दित्ति गई थी, ताकि सै जे कोई तिस पर विश्वास करो सै परमेशरा रिया नज़राँ च धर्मी हुई सक्को।
छुटकारा सबनीं रे खातर
5मूसे ये लिखिरा भई धार्मिकता व्यवस्था रा पालन करने ते मिलां इ : “सै जे कोई व्यवस्था रे हुक्मां रा पालन कराँ सै जिऊंदा रैहणा”
6पर विश्वासा ते मिलणे औल़ी धार्मिकता रे बारे च, पवित्रशास्त्र ये बोलां, “तू अप्पूँ ते ये मत पुछदा भई स्वर्गा जो किस जाणा?” (यनिके मसीह जो थल्ले लौणे खातर!) 7या, ये मत पुछणा भई “थल्ले अधोलोका च किस जाणा?” (यनिके मसीह जो मूईरेयां चते जिऊंदा करीने ऊपर लौणे खातर!)
8पर पवित्रशास्त्र ये बोल्लां, “परमेशरा रा बचन तेरे नेड़े आ, तेरे मुँआं पर आ कने तेरे मना चा,” ये सै वचन आ, सै जे अहांजो परमेशरा पर विश्वास करने रे बारे च बोलां, तिसरा जे अहें प्रचार कराँ ये। 9जे तू अपणे मुँआं ते स्वीकार करो, भई यीशु मसीह प्रभु आ, कने तू अपणे दिला ते ये विश्वास करो, भई परमेशरे तिस्सो मूईरयां चते जिऊंदा कित्या, तां तिज्जो परमेशरा छुटकारा देणा। 10काँह्भई अहांरे विश्वासा रे जरिये माहणु परमेशरा रियां नज़राँ च धर्मी बणां कने अपणे मुँआं ते स्वीकार करने रे जरिये अहें छुटकारा पाया। 11काँह्भई पवित्रशास्त्र ये बोलां, “सै जे कोई तिस पर विश्वास करगा तिस शर्मिन्दा नीं हूणा।” 12ये इस खातर आ भई यहूदियां कने अन्यजातियां च कोई फर्क निआं, काँह्भई सारयां रा प्रभु त इक इ हाया कने सै जे तिसजो पुकाराँ ये तिन्हांजो सै बौहत आशीष देआं। 13काँह्भई, “सै जे कोई प्रभुये जो पुकारगा, तिसरा इ छुटकारा हूणा।”
इस्राएल रा खुशखबरिया जो नकारना
14पर सै जे प्रभुये पर विश्वास नीं करदे, सै तिस्सो कियां पुकारगे? कने सै तिन्हे जे तिसरे बारे च सुणया इ निआं, तिस पर कियां विश्वास करी पांगे? कने फेरी भला तदुआं तक जे कोई तिन्हांजो तिसरे बारे च प्रचार नीं करगा, सै कियां सुणी पांगे? 15कने जे कोई तिन्हांजो प्रचार करने जो नीं भेज्या जाओ, तां सै कियां दस्सी सक्कां ये? तियां जे पवित्रशास्त्रा च लिखिरा, “खुशखबरी ल्यौणे औल़यां रे चरण कितणे छैल़ ये, सै जे खुशखबरी सणवायें।”
16पर सारयां तिसा खुशखबरिया पर विश्वास नीं कित्या : यशायाह भविष्यवक्ता बोलां, “प्रभु, अहांरे सन्देशा पर कोई विश्वास नीं करदा” 17इस खातर ताहली जे तुहें सन्देश सुणां ये, तां विश्वास औआं, कने सन्देश यीशु मसीह रा बचन आ।
18पर हऊँ बोलां, “सच्चीजो यहूदी लोकें परमेशरा रा सन्देश सुणीरा” काँह्भई पवित्रशास्त्रा च लिखिरा,
“तिन्हांरे बोलीरे बचन सारिया धरतिया पर,
कने तिन्हांरे बचन संसारा री सारियां जगहां च पुज्जी चुक्कीरे।”
19ये सच्च आ भई इस्राएली लोक परमेशरा रे सन्देशा जो समझीगे। पैहले मूसा रे जरिये प्रभु ये बोल्लां,
“मांह तिन्हांरे जरिये इस्राएली लोकां जो जल़ण कराणी सै जे सच्चमुच कोई जाति नींये;
मांह मूर्ख जाति रे जरिये तुहांजो गुस्सा दिलाणा।”
20फेरी यशायाह भविष्यवक्ता परमेशरा रे खातर बड़िया हिम्मता ने बोलां, “सै जे मिन्जो नीं खोज्जां थे, तिन्हें मिन्जो पाईल्या:
कने सै जे मिन्जो पुछदे बी नीं थे, तिन्हां पर हऊँ प्रगट हुईग्या।”
21पर परमेशरे इस्राएली लोकां रे बारे च गलाया, “हुक्म नीं मनणे औल़े
अपणे सारे विरोधियां जो अप्पूँ ले वापस औणे रे खातर हऊँ सारा दिन सददा रैयाँ।”
Currently Selected:
रोमियो 10: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
