कुलुस्सियां 4

मसीही अनुग्रह

1मालको, तुहें अपणे-अपणे दास्सां ने न्याय कने ठीक-ठीक बर्ताव करा, याद रखा स्वर्गा च तुहांरा बी कोई मालक आ।

2हमेशा प्राथना च लगीरे रौआ, कने ताहली जे तुहें प्राथना करो तां सावधान रौआ कने परमेशरा रा धन्यवाद करदे रौआ; 3कने इस सौगी अहांरे खातर बी प्राथना करा भई परमेशर अहांरे खातर वचन सुणने रा येढ़ा अवसर देई दो, भई अहें मसीह रे तिस भेदा रा बखान करी सक्को तिसरिया वजह ने जे हऊँ कैदा चा, 4प्राथना करा भई हऊँ इस्सो इयां परगट करी सक्कूं, तियां जे मिन्जो दसणा चाहिन्दा।

5मौके जो कीमती समझीने अविश्वासी लोकां ने समझदारिया ने बर्ताव करा। 6तुहांरी बोल्ली सदा मिठी रौ कने तिसते जे समझदारिया री पछयाण लगो कने तुहें जाणी सक्को भई किसी माहणुये जो कियां जबाब देणा चाहिन्दा।

आखरी नमस्कार

7अहांरा प्यारा विश्वासी, तुखिकुस सै जे इक बफादार सेवक आ, कने सै जे अहां सौगी प्रभुये री सेवा कराँ, मेरी सारी गल्लां तुहांजो दस्सी देन्गा। 8हऊँ तिस्सो तुहांले इस खातर भेज्जी राँ, भई तुहांजो तिसते अहांरे सारे हालचाला रा पता चली जाओ, ताकि सै तुहांरे विश्वासा च तुहांजो मजबूत करी सक्को। 9हऊँ अपणे विश्वास लायक कने प्यारे विश्वासी उनेसिमुस जो बी तिसने सौगी भेज्जी राँ सै जे तुहांरे नगरा ते आ; सै तुहांजो येत्थी री सारियां गल्लां दस्सी देन्गे।

10अरिस्तर्खुस, सै जे मेरे सौगी कैदी आ, कने बरनबास रे रिश्तेदार मरकुस रा तुहांजो नमस्कार, (तिसरे बारे च तुहें आज्ञा पाई थी भई जे सै तुहांले आओ, तां तिसने ठीक ढंगा ने बर्ताव करयां।) 11युसतुस रे नौआं ते जाणयां जाणे औल़े यीशुये रा बी तुहांजो नमस्कार हो। यहूदी विश्वासियां चते परमेशरा रे राज्जा खातर मेरे सौगी काम्म करने औल़े सिर्फ ये तिन्न माहणु ये कने इन्हा रिया वजह ने मिन्जो बौहत जादा तसल्ली मिली।

12इपफ्रास रा बी तुहांजो नमस्कार हो, सै जे तुहांरे नगरा चते इक आ कने यीशु मसीह रा दास आ, कने सदा तुहांरे खातर लगना ने प्राथनां च कोशिश करदा रैयां, ताकि तुहें सिद्ध हुईने पूरे विश्वासा सौगी परमेशरा रिया इच्छा च टिक्कीरे रौओ। 13हऊँ तिसरा गवाह भई सै तुहांरे खातर कने लौदीकिया कने हियरापुलिस नगरा रे रैहणे औल़यां रे खातर हमेशा कड़ी मेहणत करदा रैहन्दा। 14प्यारे डाँक्टर लूका कने देमास तुहांजो नमस्कार बोलां ये।

15लौदीकिया नगरा रे साथी विश्वासियां जो, कने नुमफास कने तिन्हांरे घरा री कलीसिया जो नमस्कार बोलणा। 16ताहली जे ये चिट्ठी तुहांरे येत्थी पढ़ी ली जाओ, तां येढ़ा करयां भई लौदीकिया री कलीसिया च बी पढ़वाया जाये, कने लौदीकिया ते मेरी सै चिट्ठी जे तुहांजो मिलो, तिसाजो तुहें बी पढ़ी लेयों। 17कने अरखिप्पुस ते गलायां भई सै इसा गल्ला रा ध्यान रखो भई प्रभु च सै जे सेवा तिस्सो दित्तिरी, सै तिसजो सावधानिया ने पूरी करी सक्को।

18मेरा यनि पौलुसा रा अपणे हत्था रा लिखिरा नमस्कार। याद रखयां हऊँ जेल्ला चा, परमेशरा रा अनुग्रह तुहांजो सौगी रौओ। आमीन।

Currently Selected:

कुलुस्सियां 4: KFSNT

Highlight

Copy

Compare