कुलुस्सियां 3

1काँह्भई परमेशरे तुहांजो मसीह ने सौगी मूईरयां चा ते जिऊंदा करीने खड़ा कित्या, तां तिन्हां चिज़ां रे खातर कोशिश करदे रौआ, सै जे स्वर्गा च मौजूद इयां तित्थी जे मसीह परमेशरा रे सज्जे पास्से बैठिरा। 2स्वर्गा रियां चिज़ां रे बारे च लगातार सोचदे रौआ, पर धरतिया री चिज़ां रे बारे च मता सोचदे, 3काँह्भई तुहांरा बुरा स्वाभाव त मरी चुक्कीरे कने तुहांरा जीवन मसीह सौगी परमेशरा च छिपिरा। 4ताहली जे मसीह सै जे अहांरा जीवन आ, भीं ते परगट हूणा, तां तुहें बी तिस सौगी तिसरिया महिमा समेत परगट कित्ते जाणे।

पुराणी जिन्दगी कने नौंईं जिन्दगी

5इस खातर सै किछ जे तुहां च संसारिक आ, तिसजो खत्म करी देआ, यनिके व्यभिचार, अपवित्रता, वासनां, बुरी इच्छां कने लालच सै जे मूर्तियां री पूजा करने रे बराबर आ, 6इन्हां इ गल्लां रिया वजह ने परमेशरा रा कोप हुक्म नीं मनणे औल़यां रे ऊपर पौंवा। 7कने तुहांरिया जिन्दगिया च इक येढ़ा बगत था ताहली जे तुहें इन्हां बुराईयां च जिन्दगी बितां थे। 8पर हुण तुहें इन्हां सारियां गल्लां यनि गुस्सा, झुंझलाहट, बैर-बरोध, निंध्या-चुगली कने मुँआं ते गाल़ी देणा छडी दे।

9अप्पूँ चियें झूट्ठ मता बोलदे काँह्भई तुहें अपणे पुराणे स्वाभावा जो छड्डी चुक्कीरे। 10कने तुहें नया माहणु बणी चुक्कीरे। तुहें अपणे रचणे औल़े साई जादा ते जादा बणी राँये कने तुहें तिस्सो अच्छे तरिके ने समझगे। 11तिसच नांत यूनानी रैया, नां यहूदी, नां खतना, नां खतने ते बगैर, नां विदेशी कने नां असभ्य, नां दास कने इक अजाद माहणुये च कोई फर्क आ: सिर्फ मसीह सब किछ आ कने सारे विश्वासियां च तिसरा इ वास आ।

मसीही जीवन

12काँह्भई तुहें परमेशरा रे चुणीरे पवित्र कने प्यारे लोक ये इस खातर सहानुभूति रखणे औल़े, दया करने औल़े, नरम दिल, तसल्ली रखणे औल़े कने नम्र बणा। 13तुहांजो अप्पूँ चियें ताहली जे कदीं कोई शकैत ओ, तां इक्की दूये री सैहण करी लो कने इक्की दूये रे अपराध माफ करा, तियां जे परमेशरे तुहांरे अपराध माफ कित्ते, तियां इ तुहें बी माफ करा। 14इन्हां गल्लां ते बधीने प्यार इ सब्बीं ते खास आ, सै जे सब्बीं जो पूरे तरिके ने जोड़ां।

15तुहांरे दिलां पर मसीह री शान्ति राज करो, काँह्भई तुहें सारे इक्की शरीरा रा हिस्सा ये; इस खातर इक्की दूये सौगी तुहें शाँतिया ने रैहणे रे खातर सद्दीरे। कने सदा परमेशरा रा धन्यवाद करदे रौआ। 16मसीह रे वचना जो अपणे दिला च पूरे तरिके ने बसणे देआ, कने पूरे ज्ञाना समेत इक्की दुज्जे जो सखावा कने निर्देश देन्दे रौआ, कने अपणे मना च धन्यवाद सौगी परमेशरा खातर भजन, स्तुति कने आत्मा रे गीत गावा। 17वचना च या कम्मां च जो किछ बी करो सब प्रभु यीशुये रे नौआं ते करा, कने तिसरे इ जरिये हर बगत पिता परमेशरा जो धन्यवाद देन्दे रौआ।

मसीह परिवारा रे खातर नियम

18पत्नियो, अपणे घरा औल़े रे प्रति इयां समर्पित हुई जावा, तियां जे प्रभुरे चेले जो शोभा देआं। 19पत्तियो, अपणिया घराऔल़िया ने प्यार करा, कने तिन्हांने शख्तयाई नीं करा। 20बालको, सारियां गल्लां च अपणे माता-पिता री आज्ञा रा पालन करा, काँह्भई प्रभु इसते खुश हुआं। 21माता-पिताओ, अपणे बच्चयां जो तंग नीं करा, किति येढ़ा नीं हो भई सै गुस्सा हुईजो।

22सेबको, अपणे-अपणे संसारिक स्वामियां री सारी गल्लां रा पालन करा, सिर्फ लोकां जो खुश करने रे खातर तिस इ बगत नीं ताहली जे सै देक्खी रायें, बल्कि सच्चे मना ने तिसरी मन्ना, काँह्भई तुहें प्रभुरा आदर कराँ ये। 23सै जे किछ तुहें कराँ ये, अपणे सारे मना ने करा, ये समझीने नीं भई तुहें तिस्सो लोकां रे खातर बल्कि प्रभुरे खातर करी रायें। 24याद रखा भई प्रभुये तुहांजो ईनाम देणा सै जे तिने अपणे लोकां रे खातर रखीरा, अपणे प्रभु मसीह री सेवा करदे रौआ। 25काँह्भई सै जे बुरा कर्म करदा रैयां, तिसजो परमेशरा सजा देणी, काँह्भई परमेशर न्याय करदे वगत किसी रा पक्षपाता नीं करदा।

Currently Selected:

कुलुस्सियां 3: KFSNT

Highlight

Copy

Compare