1 कुरिन्थियों 12
12
आत्मिक बरदान
1अरे साथी विश्वासियो, हऊँ नीं चाहन्दा भई तुहें आत्मिक वरदान्नां रे बारे ते अंजाण रौ। 2तुहें जाणाँ ये भई ताहली जे तुहें अन्यजाति थे, तां तुहें गुंगियां मूर्तियां रे पिच्छे तियां चलां थे तियां जे तुहांजो चलां थे। 3इस खातर हऊँ तुहांजो खबरदार कराँ भई जो कोई परमेशरा रे आत्मा री अगुवाईया ने बोलां, सै नीं बोलदा भई “यीशु स्रापित आ,” कने नां कोई पवित्र आत्मा ते बिणा बोल्ली सक्कां भई “यीशु प्रभु आ।”
4वरदान त कईयां किस्मां रे, पर आत्मा इक्को इ हया; 5कने सेवा बी कईयां किस्मां री, पर प्रभु इक इ हया; 6कने प्रभावा औल़े काम्म कईयां किस्मा रे, पर परमेशर इक इ हाया, सै जे सब्बीं च हर किस्मा रा प्रभाव पैदा कराँ।
7पर सब्बीं जो फायदा दिलाणे खातर हरेक माहणुये जो आत्मा रा प्रकाश दित्या जां। 8काँह्भई इक्की जो आत्मा ते बुद्धिया रियां गल्लां मिलां इयां, कने किसी दुज्जे जो तिसा इ आत्मा रे मुतावक ज्ञाना रियां गल्लां। 9किसी जो तिसा आत्मा ते विश्वास, कने किसी जो तिसा इ इक्की आत्मा ते चंगा करने रा वरदान मिलां। 10फेरी किसी जो सामर्था रे काम्म करने री ताकत, किसी जो भविष्यवाणी, किसी जो आत्मां री परख, किसी जो कई प्रकारा रियां भाषां बोलणे जो, कने किसी जो भाषां रा मतलब दसणा। 11पर ये सब प्रभावाशाली काम्म सैई इक आत्मा कराँ, कने तिस किसी जो जे सै चांह तिस्सो बन्डी देआं।
शरीर इक : अंग मते
12काँह्भई तियां जे देह त इक इ कने तिसरे अंग बौहत ये, कने तिसा इक्की देहा रे बौहत अंग हुणे पर बी सब मिलीने इक इ देह इ, तियां इ मसीह बी आ। 13काँह्भई अहें सब्बीं क्या यहूदी, क्या यूनानी, क्या दास, क्या अजाद, इक्की आत्मा रे जरिये इक देह हुणे रे खातर बपतिस्मा लैया, कने अहें सब्बीं इक इ आत्मा पाईरा।
14अहां रिया देहा च इक इ अंग नीं पर बौहत सारे अंग ये। 15जे पैर बोल्लो, “हऊँ हाथ निआं, इस खातर देहा रा निआं,” तां क्या सै इस वजह ते देहा रा निआं? 16कने जे कान्न बोल्लो, “हऊँ आक्ख नीं, इस खातर देहा रा निआं,” तां क्या सै इस वजह ते देहा रा निआं? 17जे सारी देह आक्ख इ हुंदी तां सुणना किता ते हुंदा? जे सारी देह कान्न इ हुंदी, तां सुंघणा किता ते हुंदा? 18पर सचमुच परमेशरे अंगाँ जो अपणिया इच्छा रे मुतावक इक-इक करीने देहा च रखया।
19जे सै सारे इक इ अंग हुन्दे, तां देह किति हुन्दी? 20पर हुण अंग त बौहत ये, पर देह इक इ हई। 21आक्ख हत्था ने नीं बोल्ली सकदी, “मिन्जो तेरी जरूरत नीं,” कने नां सिर पैराँ ने बोल्ली सक्कां, “मिन्जो तेरी जरूरत नीं।” 22पर देहा रे सै अंग सै जे दुज्यां ते कमजोर लगां ये, बौहत इ जरूरी ये; 23कने देह तिन्हां अंगाँ रे तिन्हौं जे अहें आदरा रे लायक नीं समझदे, तिन्हौं इ अहें जादा आदर देआंये; कने अहांरे शोभा नीं देणे औल़े अंग होर बी जादा शोभा देणे औल़े हुई जांये, 24फेरी अहांरे शोभा देणे औल़े अंगाँ जो इसरी जरूरत नीं। पर परमेशरे देहा जो येढ़ा बणाई तरा भई तिस अंगा जो जे आदरा री घटी थी तिस्सो होर बी बौहत आदर मिलो।
25ताकि देहा च फूट नीं पौ, पर अंग इक्की दुज्जे री बराबर चिन्ता करो। 26इस खातर जे इक्की अंगा जो दुख मिलां, तां सब अंग तिसने सौगी दुख पांये; कने जे इक्की अंगा री बडयाई हुआं इ, तां सब अंग तिसने सौगी नन्द मनायें।
27इयां इ तुहें सब मिलीने मसीह री देह ये, कने लग-लग तिसरे अंग ये; 28कने परमेशरे कलीसिया च लग-लग माहणु नियुक्त कित्तिरे : पैहले प्रेरित, दुज्जे भविष्यवक्ता, तिज्जे सखाणे औल़े, फेरी सामर्था रा काम्म करने औल़े, चंगा करने औल़े, मदद करने औल़े, प्रबन्ध करने औल़े, लग-लग किस्मा री भाषायें बोलणे औल़े। 29क्या सब प्रेरित ये? क्या सब भविष्यवक्ता ये? क्या सब सखाणे औल़े? क्या सब सामर्था रे काम्म करने औल़े? 30क्या सब्बीं जो चंगा करने रा वरदान मिलया? क्या सारे कईयां किस्मा री भाषां बोलां यें? 31क्या सब अनुवाद कराँ ये? तुहें बड़े-ते-बड़े वरदान्ना रिया धुन्ना च रैं। पर हऊँ तुहांजो होर बी सब्बीं ते खरा रस्ता दसगा?
Currently Selected:
1 कुरिन्थियों 12: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
