1 कुरिन्थियों 1

नमस्कार

1हऊँ, पौलुस तुहांजो नमस्कार बोलां, सै जे परमेशरा रिया इच्छा ते यीशु मसीह रा प्रेरित हुणे खातर चुणया गईरा। कने अहांरा साथी विश्वासी सोस्थिनेस बी तुहांजो नमस्कार बोलां। 2हऊँ ये चिट्ठी परमेशरा रिया तिसा कलीसिया रे लोकां जो लिख्या राँ सै जे कुरिन्थुस नगरा ची, तिस्सो जे परमेशरे मसीह यीशुये च पवित्र कित्तिरा कने पवित्र हुणे खातर सद्दीरा; कने तिन्हां सारयां विश्वासियां जो बी सै जे हर जगह अहांरे कने तिन्हारे प्रभु यीशु मसीह रे नौआं री प्राथना कराँ ये। 3अहांरे पिता परमेशर कने प्रभु यीशु मसीह तुहांजो अनुग्रह कने शान्ति देओ।

मसीह च आशीषां

4हऊँ तुहांरे बारे च अपणे परमेशरा रा सदा धन्यवाद कराँ, काँह्भई परमेशरा रा ये अनुग्रह तुहां पर मसीह यीशुये च हुईरा। 5काँह्भई तुहें मसीह च हुईने परमेशरा ते हर गल्लां च बौहत आशीषां पाई रियां यनि बोलणे रे खातर कने तिसरा वचन समझणे रे खातर कई खास योग्यतां पाई रियां, 6इस तरिके ने तिने तुहांजो ये साबित कित्या भई मसीह यीशुये रा सन्देश सच्च आ। 7इस खातर तियां जे तुहें बौहत बेसब्रिया ने अहांरे प्रभु यीशु मसीह रे औणे रा इन्तजार कराँ ये, तां तुहांले परमेशरा रा हरेक वरदान आ। 8तिस तुहांजो आखिर तक मजबूत रखणा ताकि तुहें अहांरे प्रभु यीशु मसीह रे दिन निर्दोष हुन्गे। 9परमेशर बफादार आ, तिने जे तुहांजो अपणे पुत्र अहांरे प्रभु यीशु मसीह रिया संगतिया च सद्दीरा।

कलीसिया च फूट

10अरे साथी विश्वासियो, हऊँ अहांरे प्रभु यीशु मसीह रे अधिकारा ने तुहांजो विनती कराँ, भई तुहें सब इक दूये ने सैहमत रौआ, कने लग-लग टोलियां नीं बणावा, बल्कि सारे इक मन कने इक सोच रक्खीने इक जुट रौआ। 11काँह्भई मेरे साथी विश्वासियो, खलोए रे घराने रे लोकें मिन्जो तुहांरे बारे च दस्सीरा भई तुहें इक्की दूये ने झगड़या राँये। 12मेरे कैहणे रा मतलब येआ भई तुहां चते कोई अप्पूँजो, “पौलुसा रा” कोई “अपुल्लोसा रा” कोई “कैफा रा” तां कोई “मसीह रा” बोलां।

13क्या मसीह बन्डोई गरा? क्या पौलुस तुहांरे खातर क्रूसा पर चढ़ाईरा था? या तुहांजो पौलुसा रे नौआं पर बपतिस्मा मिलया था? 14हऊँ परमेशरा रा धन्यवाद कराँ भई यहूदी सभा घर रा सरदार क्रिस्पुस कने गयुस जो छड्डिने मैं तुहां चते किसी जो बी बपतिस्मा नीं दित्या। 15किति येढ़ा नीं हो भई कोई बोल्लो तुहांजो मेरे नौआं ते बपतिस्मा मिलया। 16कने हाँ, मैं स्तिफनुस रे परिवारा रे लोकां जो बी बपतिस्मा दित्या; इन्हांजो छड्डिने हऊँ नीं जाणदा भई मैं होरी किसी जो बपतिस्मा दित्या। 17काँह्भई मसीहे मिन्जो बपतिस्मा देणे जो नीं, पर खुशखबरी सुनाणे जो भेजीरा, कने ये बी माहणुआं रे शब्दां रे ज्ञाना रे मुतावक नीं, येढ़ा नीं हो भई मसीह रा क्रूस बेकार ठैहरो।

मसीह रा ज्ञान कने परमेशरा री सामर्थ

18काँह्भई क्रूसा रा सन्देश नाश हुणे औल़यां रे खातर मूर्खता इ, पर अहां छुटकारा पाणे औल़यां रे खातर ये परमेशरा री सामर्थ इ। 19काँह्भई पवित्रशास्त्रा च लिखिरा, “माह ज्ञान-वानां रे ज्ञाना जो नाश करना, कने समझदाराँ रिया समझा जो बेकार करी देणा।”

20किति आ ज्ञानी, किति आ शास्त्री कने किति आ इस जुगा रा विवादी? क्या परमेशरे संसारा रे सारे ज्ञान्ना जो मूर्खता साबित नीं कित्या? 21काँह्भई तंजे परमेशरा रे ज्ञाना रे मुतावक संसारे ज्ञाना ते परमेशरा जो नीं जाणया, तां परमेशरा जो ये खरा लगया भई इस प्रचारा रिया मूर्खता रे जरिये विश्वास करने औल़यां जो छुटकारा देओ। 22यहूदी त चमत्कार चाँये, कने यूनानी ज्ञाना रिया खोज्जा चे, 23पर अहें त तिस क्रूसा पर चढ़ाईरे मसीह रा सन्देश सुणवांये, सै जे यहूदियां रे खातर अपमान आ कने अन्यजातियां रे खातर मूर्खता इ; 24पर जिस किसी जो परमेशरे अपणे लोक हुणे खातर सद्दीरा, चाये यहूदी या यूनानी, दोन्नां रे खातर येई मसीह परमेशरा रा सामर्थ कने परमेशरा रा ज्ञान आ। 25काँह्भई परमेशरा री मूर्खता माहणुआं रे ज्ञाना ते ज्ञान-वान इ, कने सै जे परमेशरा री निर्बलता माहणुआं रे बला ते बौहत बलवान इ।

26अरे साथी विश्वासिओ, इस बारे च सोच्चा भई तुहें क्या थे ताहली जे परमेशरे तुहांजो सद्दया। माहणुआं रे बिचारा रे मुतावक तुहां चते कई लोक नां बौहत ज्ञान-वान, कने नां बौहत सामर्थी कने नां राजसी थे। 27पर परमेशरे संसारा रे मूर्ख लोकां जो चुणया, भई ज्ञान वानां जो शर्मिन्दा करो, कने परमेशरे संसारा रे निर्बलां जो चुणया भई बलवानां जो शर्मिन्दा करो;

28कने परमेशरे संसारा रे नीच कने त्यागीरे लोकां जो बी चुणील्या तिन्हांजो जे बेकार समझया जां, ताकि सै जे खास समझे जायें तिन्हांजो नाश करो। 29परमेशरे ये कित्या ताकि कोई बी माहणु परमेशरा रे सामणे घमण्ड नीं करी सक्को। 30पर तिसरिया वजह ने तुहें मसीह यीशुये चे सै जे परमेशरा रिया तरफा ते अहांरे खातर ज्ञान, यनि धार्मिकता कने पवित्रता, कने छुटकारा बणीग्या। 31इस खातर तियां जे पवित्रशास्त्रा च लिखिरा, “जे कोई घमण्ड करना चाओ, तां सै प्रभुये पर घमण्ड करो।”

Currently Selected:

1 कुरिन्थियों 1: KFSNT

Highlight

Copy

Compare