रोमियो 2

परमेशरेरो न्याय

1एल्हेरेलेइ हे दोष लाने बाला, तू कोई की न भोस; तीं कां कोई बहानो नईं, किजोकि ज़ैस गल्‍लरो तू होरन पुड़ दोष लातस, तैस्से गल्‍ली पुड़ तू अपनो आप भी दोषी बनातस, एल्हेरेलेइ तू एप्पू भी तैन्ने कम केरतस। 2ते अस ज़ानतम कि, ज़ैना एरां कम्मां केरतन परमेशर तैन केरो न्याय केरतां तैन सज़ाह देते। 3ते हे मैन्हु, तू ज़ै बुरां-बुरां कम्मां केरनेबालन पुड़ दोष लातस, ते एप्पू भी तैन्ने कम केरतस; कुन तू समझ़तस, कि तू परमेशरेरे सज़ाही करां बच़ेलो? 4कुन तू परमेशरेरी कृपा, ते बरदाश केरनू, ते सबरारू धन घटिया समझ़तस, ते कुन इन न समझ़स, कि परमेशरेरी कृपा तीं पापन करां मन फिरानो शिखालतीए? 5पन तू ज़िद्दी आस ते अपने पापन करां मन फिरानेरो इन्कार केरतस, ज़ैस दिहाड़े परमेशर अपनो क्रोध हिरालो, तैस मां परमेशरेरो सच़्च़ो न्याय बांदो भोल्हो, त परमेशर तेरो रोड़ेच़ारे न्याय केरेलो। 6परमेशर हर एक्‍की तैसेरे कम्मां केरे मुताबिक बदलो देलो। 7ज़ैना लोक रोड़ां कम्मां केरतां परमेशरेरी तरफां मैल्हने बैली महिमा, ते आदर, ते कधे न खतम भोने बाली ज़िन्दगरे तोपी मां रहतन, परमेशरे तैन हमेशारी ज़िन्दगी देलो। 8पन ज़ैना खुदगरज़न, ते सच़्च़े न मन्नेबालेन, बल्के बुराई केरनि चातन, तैन पुड़ परमेशरेरो क्रोध, ते कोप एज्जेलो। 9ते मुसीबत ते दुख हर एक्‍की मैन्हु पुड़ एज्जेलो ज़ै बुराई केरते। परमेशर पेइलो यहूदी लोकां केरो न्याय केरेलो फिरी गैर यहूदी लोकां केरो न्याय केरेलो। 10हर अक मैन्हु ज़ै रोड़ां कम्मां केरते तैस महिमा, आदर, ते शान्ति मैल्हेली, पन परमेशर इना सैरी चीज़ां पेइले यहूदी लोकन देलो फिरी गैर यहूदी लोकन। 11किजोकि परमेशर केन्चेरी तरफदारी न केरे।

12एल्हेरेलेइ कि ज़ैन गैर कौमरे लोकेईं बगैर मूसेरो कानून मेलतां पाप कियो, परमेशर तैन बगैर मूसेरो कानूने सज़ाह देलो, ते ज़ैनेईं मूसेरो कानून मेलतां पाप कियो, परमेशर तैन सज़ाह भी मूसेरे कानूनेरे मुताबिक देलो। 13किजोकि परमेशरेरे नज़री मां मूसेरो कानून शुन्ने बाले धर्मी नईं, बल्के मूसेरे कानूने पुड़ च़लनेबाले धर्मी ठहराए गानेन। 14फिरी ज़ैखन होरि कौमां केरे लोक ज़ैन कां मूसेरो कानून नईं, स्भावे सेइं किछ मूसेरे कानूनेरे गल्‍लन पुड़ च़लतन, ते मूसेरो कानून तैन कां न भोनेरे बावजूद भी अपने लेई एप्पू कानून आन। 15तैना इन हिरातन कि परमेशरेरो कानून तैन केरे दिलन मां लिखोरोए, ते तैन केरे ज़मीर भी इस गल्‍ली पुड़ गवाही देतन, किजोकि तैन केरे अपने खियाल भी तैन पुड़ दोष लातन या बेइलज़ाम ठहरातन। 16एरू तेइस भोल्हु ज़ेइस परमेशर ज़ै खुशखबरी मीं शुनेवरीए तैसेरे मुताबिक यीशु मसीहेरे ज़िरिये मैन्हु केरि छ़ेपोरी गल्‍लां केरो न्याय केरेलो।

यहूदी ते मूसेरो कानून

17तू एप्पू जो यहूदी ज़ोतस, ते मूसेरे कानूने पुड़ तेरो विश्वासे, ते तू अपने आपे पुड़ घमण्ड केरतथ, कि तू परमेशरेरो खास मैन्हु आस। 18ते तू परमेशरेरी मर्ज़ी ज़ानतस, ते तू इन भी ज़ानतस कि कोनां गल्‍लां रोड़ी आन, किजोकि तीं इना गल्‍लां केरू ज्ञान मूसेरे कानूने करां मैल्होरूए। 19ते तू भरोसो रखतस, कि तू कान्न परमेशरेरी बत हिरानेबालोस, ते ज़ैना आंधरे मां आन तैन केरे लेई लौअरो ज़ेरो आस। 20ते बेअक्लन शिखालने बालोस, ते बच्‍चां केरो उस्तादातस, ते तीं पक्‍को पतो कि परमेशरेरो कानून तीं पूरू ज्ञान ते सच़्च़ाई शिखालते। 21ते ज़ैन तू होरन शिखालतस, अपने आपे की न शिखालस? तू होरन शिक्षा देतस कि च़ोरी नईं केरनि, कुन तू च़ोरी केरतस? 22तू ज़ै ज़ोतस, “बदमाशी नईं केरनि,” कुन तू बदमाशी केरतस? तू ज़ै मूरतन सेइं नफरत केरतस, कुन तू मन्दरन लुटतस? 23तू ज़ै घमण्ड केरतस कि तू परमेशरेरे कानूने ज़ानतस, एप्पू किजो कानून न मेनतां, परमेशरेरी तुहीन केरतस? 24“किजोकि तुश्शे यहूदी लोकां केरे वजाई सेइं गैर कौमन मां परमेशरेरे नंव्वेरी तुहीन भोतीए,” एल्हेरेलेइ पवित्रशास्त्रे मां एरू लिखेरूए।

25अगर तू मूसेरे कानूने पुड़ च़लस, त खतनो कराने सेइं तीं फैइदो त आए, पन अगर तू मूसेरो कानून न मन्नस त तीं मां ते तैस मां, ज़ेसेरो खतनो नईं भोवरो कोई फर्क नईं। 26ते अगर कोई मैन्हु ज़ेसेरो खतनो न भोए भोवरो, त तै मूसेरे कानूने पुड़ च़ले, त परमेशरेरे लेई तै मैन्हु ते ज़ेसेरो खतनो भोवरोए दूईये बराबर आन। 27ते ज़ैस मैन्हेरो खतनो नईं भोवरो, अगर तै मूसेरे कानूने पूरू केरे, त तै तीं दोषी ठहरालो। किजोकि तीं कां मूसेरो कानूने ते तेरो खतनो भी भोवरोए, पन फिरी भी तू कानूने पुड़ न च़लस। 28किजोकि सच़्च़ो यहूदी तै नईं ज़ेसेरू ज़र्म यहूदन मां भोवरू या ज़ेसेरो खतनो भोवरोए। 29बलके सच़्च़ो यहूदी तैए, ज़ेसेरो मन परमेशरे कां सच़्च़ोए, ते सच़्च़ो खतनो तैए ज़ै पवित्र आत्मारे कम्मां केरे ज़िरिये दिलेरो भोवरोए, न की मूसेरो कानून मन्ने सेइं भोवरोए। एरे लोकां केरि बडीयाई लोक नईं बल्के परमेशर एप्पू केरते।

Currently Selected:

रोमियो 2: BHDNT

Highlight

Copy

Compare