भजन संहिता 38
38
दुखी मैन्हेरी प्राथना
याद केरनेरे लेई दाऊदेरू भजन
1हे यहोवा सरकी सेइं मीं सज़ाह न दे,
ते क्रोधे मां मीं झ़िड़क न दे।
2किजोकि तेरे तीर मीं मां लेग्गी गानेन,
अवं तेरे हथ्थे हैठ देबोरोईं।
3तेरी सरकरी वजाई सेइं मेरी पूरी जानी मां
सहेत नईं,
मेरे पापेरे वजाई सेइं मेरी सैरी हेड्डन मां
आराम नईं।
4किजोकि अवं अपने पापेरे कम्मन मां,
मेरी क्रोड़ी डुब्बी जेवरीए,
ते तै भारी बोझेरो ज़ेरो मेरे झ़ैल्लने करां
बेइर भोइ जेवरोए।
5मेरे बेवकूफरे पापां केरे वजाई सेइं ज़खम शेड़ि जे
ते तैन मरां मुशक च़लतीए।
6अवं बड़ो दुखी ते झुकी जेवरोईं;
सैरी दिहैड़ी अवं शोगेरां लिगड़ां
लेइतां च़लताईं फिरताईं।
7किजोकि अवं शरमरे मारे झुकी जेवरोईं,
ते मेरे जानी मां सहेत नईं।
8अवं कमज़ोर ते चूर-चूर भोवरोईं;
अवं अपने मनेरे घबरानेरे वजाई सेइं तड़पताईं।
9हे प्रभु मेरी सारी खुवैइश तेरे सामने,
ते मेरू करलानू तीं करां छ़पोरे नईं।
10मेरो दिल ज़ोरे सेइं धड़कते,
मेरी ताकतां जुवाब दित्तोरोए;
बल्के मेरी एछ़्छ़ी केरि लौ भी
खतम भोवरीए।
11मेरे दोस्त ते मेरे साथी
मेरी मुसीबत हेरतां मीं करां दूर भोए,
मेरे नेड़ेरे रिश्तेदार दूर खड़े भोए।#भज. 31:11;लूक. 23:49.
12मेरी जान नेनेबाले फंदे बिछ़ाने लगोरेन,
ते मेरे नुक्सानेरी कोशिश केरनेबाले
दुष्टेरी गल्लां ज़ोते,
ते सारे दिहैड़ी धोखेरी योजना सोचतन।
13पन अवं टंवनेरो ज़ेरो शुनी न।
ते अवं लैटेरो ज़ेरो आशी न खोल्ली।
14बल्के अवं एरे मैन्हेरो ज़ेरो आईं,
ज़ैस किछ न शुनोए,
ते ज़ेसेरे ऐशेरां कोई बेंसरी कोई
गल न निस्सी।
15पन हे यहोवा,
मीं तीं पुड़ अपनि उमीद लेवरीए;
हे प्रभु, मेरे परमेशर,
तूए मीं जुवाब दे।
16किजोकि मीं ज़ोवं,
“एरू न भोए कि तैना मीं पुड़ आनन्द केरन;
ज़ैखन मेरो पव घिशकते,
तैखन तैना मेरे खलाफ घमण्ड केरतन।”
17किजोकि अवं त हुनी खिरकने बालोईं;
ते मेरो मातम लगातार मेरे सामने।
18अगर अवं अपने पाप परमेशरे कां मेन्नी,
ते अपने पापेरे वजाई सेइं दुखी रेइलो।
19पन मेरे दुश्मन बेशुमारन,
ते मेरे बैरी बड़े भोइ जे।
20ज़ैना भलियाई केरनेरे बदले बुराई केरतन,
तैना भी मेरी भलियाई पत्ती च़लनेरे
वजाई सेइं मेरी बगावत केरतन।
21हे यहोवा, मीं न शार!
हे मेरे परमेशर, मीं करां दूर न रा!
22हे यहोवा, मीं मुक्ति देनेबालां,
ते मेरी मद्दत केरने मां लूश केर!
Currently Selected:
भजन संहिता 38: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
