भजन संहिता 37
37
धर्मी मैन्हेरी विरासत ते दुष्टां केरो अन्त
दाऊदेरू भजन
1बुरां कम्मां केरनेबालां केरे वजाई सेइं न कुढ़
बुराई केरनेबालां केरे बारे मां जलन न केर!
2किजोकि तैना घासेरे ज़ेरे लूशी कट्टे गानेन,
ते सब्ज़ घासेरे ज़ेरे लूशी ट्लेक्की गानेन।
3यहोवा पुड़ भरोसो रख,
ते भलियाई केर; मुल्खे मां बस्सोरो रा,#37:3 मुल्खे मां बस्सोरो रा, कनान मुल्ख ज़ेसेरे बारे मां परमेशरेरे हुक्म दित्तोरो थियो, कि परमेशरेरे लोक तैस मां सुखे सेइं रान।
ते सच़्च़ाई मां मन लेइतां रा।
4यहोवा जो अपने सुखेरो आधार ज़ान,
ते तै तेरी योजना पूरी केरेलो।#मत. 6:33.
5अपने बत्तरी फिक्र यहोवा पुड़ छ़ड;
ते तैस पुड़ भरोसो रख,
तैए तेरां कम्मां पूरां केरेलो।
6तै तेरी धार्मिकता लौअरी ज़ेरि,
ते तेरो न्याय दुपहरां केरे लौअरो
ज़ेरो बांदो केरेलो
7यहोवारे सामने च़ुपच़ारे रा,
ते सबरी सेइं तैसेरो इंतज़ार केर,
तैस मैन्हेरे वजाई सेइं न कुढ़, ज़ैसेरां कम्मां कामयाब भोतन,
ते तै बुरी योजनान बेकार केरते!
8क्रोधे करां दूर रा,
ते सरकी छ़ेडी दे!
कुढ़ न, तैस मरां सिर्फ बुराई निसतीए।
9किजोकि ज़ालम मेरि मिटी गानेन;
ज़ैना यहोवारो इंतज़ार केरतन,
तैना ज़मीनरे मालिक भोल्हे।#37:9 तैस मुल्खेरे अधिकारी भोल्हे ज़ेसेरे बारे मां प्रभुए वाधो कियोरो थियो
10थोड़े दिहाड़े बीतने पुड़ दुष्ट न रालो;
ते तू तैसेरे ठैरी रोड़ेच़ारे
हेरने पुड़ भी तीं तै न मैल्हेली।
11पन हलीम लोक ज़मीनरे मालिक भोल्हे,
ते बड़े आरामेरे वजाई सेइं आनन्द मनाले।#मत. 5:5.
12दुष्ट धर्मी मैन्हेरे खलाफ बुरी योजना कढते,
ते तैस पुड़ दंत च़ापते;
13पन प्रभु तैस पुड़ हस्सेलो,
किजोकि तै ज़ानते कि तैसेरी नाश भोने बाली दिहाड़ी#37:13 नाश भोने बाली दिहाड़ी आखरी न्यायेरी दिहाड़ी एजने बालीए।
14दुष्ट लोक तलवार खिचतां,
ते धनुष घिन्तां आन,
ताके गरीब लोकन बिछ़ोड़न,
ते सही चाल च़लनेबालन मैरी छ़डन
15पन तैन केरि तलवारन सेइं तैन्ना केरे अपने दिल छ़िन्दोन,
ते तैन केरे धनुष ट्लोड़े गाले।
16अधर्मेरी हेछी दौलती करां धर्मी मैन्हेरी थोड़ी ज़ेरि दौलत
बड़ी रोड़ी भोचे।
17किजोकि दुष्टां केरि पैखड़ी ट्लोड़ी गैनिन;
पन यहोवा धर्मी लोकन सम्भालते।
18यहोवा बेकसूर लोकां केरि उमरारी खबर रखते,
ते तैन केरो हिस्सो हमेशारे लेई बनोरो रहते।
19मुसीबतरे मौके तैना शरमिन्दे न भोल्हे,
काल एजनेरे दिहाड़न तैना नियन्ने न राले।
20दुष्ट लोक नाश भोइ गानेन;
ते यहोवारे दुश्मन उडारेरे साफ घासेरे
ज़ेरे नाश भोल्हे,
तैना तूएरे ज़ेरे छ़ेप्पी गानेन।
21दुष्ट कर्ज़ो नेते,
ते भरे न पन धर्मी
अनुग्रह केरतां दान देते।
22किजोकि ज़ैन परमेशर बरकत देते
तैना ज़मीनरे मालिक भोल्हे,
पन ज़ैन पुड़ तै लानत भेज़ते,
तैन केरू नवं निशाने तगर मिटी गाते।
23मैन्हेरी चाल यहोवारे तरफां
मज़बूत भोतीए,
ते तैसेरे चाल चलने सेइं तै खुश रहते।
24अगर बिछ़ड़ी भी गाए त फिरी भी तैड़ी पेवरो न राए;
किजोकि यहोवा तैसेरो सहारो बेनतां रहते।
25अवं जुवान थियो, हुनी बुढो आईं,
अवं हेरतो एवरोईं;
पन न त मीं कधी धर्मी शारोरो,
ते न तैसेरू खानदान टुक्ड़े मगते लावं।
26भक्त मैन्हु त सदा दया केरतां कर्ज़ो देते,
ते तैसेरे खानदाने पुड़ बरकत मैलती रहतीए।
27बुराई शैरतां भलियाई केर;
ते तू सदा आबाद रालो।
28किजोकि यहोवा न्याय ट्लारोए;
ते तै अपने भक्तन कधे न शारेलो।
तैन केरि त हिफाज़त हमेशा रहतीए,
पन दुष्टां केरू खानदान नाश कियूं गालू।
29धर्मी लोक ज़मीनरे मालिक भोल्हे,
ते तैस मां सदा बनोरे राले।
30धर्मी अपने ऐशी मरां अक्लरी गल्लां केरतो,
ते न्यायेरी गल ज़ोते।
31तैसेरे परमेशरेरो कानून तैसेरे
दिले मां बस्सोरो रहते,
तैसेरे पव न घिश्कन।
32दुष्ट मैन्हु धर्मी मैन्हेरे ताकी मां रहते।
ते तैस मारनेरी कोशिश केरते।
33यहोवा तैस तैसेरे हथ्थे मां न छ़डेलो,
ते ज़ैखन तैसेरो खियाल कियो गाए
तैखन तै तैस दोषी करार न देलो।
34यहोवारो इंतज़ार केरतो रा,
ते तैसेरी बत्तां च़लतो रा,
ते तै तीं बेद्धतां ज़मीनरे मालिक केरेलो;
ज़ैखन दुष्ट कट्टे गान, तैखन तू हेरेलो।
35मीं दुष्ट बड़ो ताकतबर
ते एरहो फैलतो हेरो,
ज़ेन्च़रे सब्ज़ बुट
अपने ज़मीनी मां फैलाते।
36पन ज़ैखन कोई तैलमेइं जेव त
हेरू कि तै तैड़ी अथ्थी नईं;
ते मीं भी तै तोप्पो,
पन कोन्ची न मैल्हो।#भज. 37:10.
37ईमानदार मैन्हु पुड़ ध्यान दे
ते धर्मी मैन्हु हेर,
किजोकि मेल मिलापे सेइं रानेबाले मैन्हेरो
आखरी मां फल रोड़ोए।#यशा. 32:17.
38पन पापी लोक साथी नाश किये गाले;
दुष्टां केरे आखरी मां नाशे।
39धर्मी लोकां केरि मुक्ति यहोवारे
तरफां भोतीए;
मुसीबतरे वक्ते तै तैन केरो मज़बूत क़िलोए।
40यहोवा तैन केरि मद्दत केरतां तैन छुटकारो देते;
तै तैन दुष्टन करां छुटेइतां तैन केरि मुक्ति केरते,
एल्हेरेलेइ कि तैनेईं तैस मां अपनि शरण नेइ।
Currently Selected:
भजन संहिता 37: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
