भजन संहिता 34
34
परमेशर धर्मी मैन्हु मुक्ति देनेबालोए
दाऊदेरू भजन ज़ैखन तैनी अबीमेलेकेरे सामने अपनि शकल बदली, ते अबीमेलेके तै कढो, ते तै च़लो जेव:
1अवं हर वक्त यहोवारू शुक्र केरेलो;
ते तैसेरी तारीफ़ लगातार मेरी ज़बानी पुड़ राहेली।
2अवं यहोवा पुड़ घमण्ड केरेलो;
हलीम लोक एन शुन्तां खुशी भोल्हे।
3मीं सेइं साथी यहोवारी तारीफ़ केरा,
ते एज्जा अस मिलतां तैसेरे नंव्वेरी तारीफ़ केरम;
4मीं यहोवा कां प्राथना की,
तैखन तैनी मेरी बिनती शुनी,
ते तैने अवं मेरे सारे डरे करां छुटाव।
5ज़ैन केरि एछ़्छ़ी तैसेरे पासे लेगोरी रेइ,
तैन लौ मैल्ही;
ते तैन केरे तुत्तरे पुड़ कधे शर्मिन्दगी न एज्जेली।
6इनी गरीब मैन्हे प्राथना की तैखन यहोवा शुनू,
तैनी तैस तैसेरी सारे दुखन करां छुटकारो दित्तो।
7यहोवारो डर मन्नेबालां केरे च़ेवरे पासन तैसेरो दूत
डेरे लेइतां तैस खतरे करां बच़ाते।#इब्रा. 1:14;दान. 6:22.
8अज़मेइतां हेरा कि यहोवा केत्रो भलोए!
केत्रो धने तै मैन्हु ज़ै तैस पुड़ भरोसो रखते।#1 पत. 2:3.
9यहोवा करां डरा, हे तैसेरे पवित्र लोकव!
किजोकि ज़ैना तैसेरो डर मनतन, तैन कोन्ची गल्लरो घाटो न भोए!
10जुवान शेरन त कमी भोतीए
ते तैना ढ्लुखोरे भी रहतन;
पन यहोवारे तोप्पने बालन कोन्ची रोड़ी
चीज़रे घटी न भोल्ही।
11हे बच्चव, एज्जा मेरी गल्लां शुना;
अवं तुसन यहोवारो डर मन्नो शिखालेलो।
12कौन मैन्हु आहे ज़ै ज़िन्दगरी इच्छा रखते,
ते कने लम्मी उमर चाते कि भलियाई हेरे,
13त तै अपनि ज़बान बुरी गल्लां केरने करां बाज़ रख्खे
ते अपने ऐशेरी खबरदारी केरे कि
तैस करां कोई धोखेरी गल न निस्से।#याक. 1:26.
14बुराई शैरतां भलियाई केर;
मेल मिलापे तोप ते तैसेरो पीछो केर।#इब्रा. 12:14.
15यहोवारी एछ़्छ़ी धेर्मी लोकन पुड़ लेगोरी रेइचन,
ते तैसेरे कन तैन केरि बिनती पुड़
लग्गोरे रहतन।#यूह. 9:31.
16यहोवा बुराई केरनेबालां केरे खलाफ भोते,
ताके तैन केरि याद धेरती पुड़ां मिटेई छ़डे।#1 पत. 3:10-12.
17धर्मी लोक बिनती केरतन ते यहोवा शुनते,
ते तै तैन सैरी मुसीबतन करां छुटकारो देते।
18यहोवा ट्लुटोरे दिलां केरे नेड़े रहते,
ज़ैन उमीद नईं तैन्न छुटकारो देते।
19धेर्मी पुड़ बेड़ी मुसीबतां त एइतन,
पन यहोवा तैस तैन सेभन करां
छुटकारो देते।#कह. 24:16;1 तीम. 3:11.
20तै तैसेरी सेभी हेड्डी केरि हिफाज़त केरते;
ते तैन मरां अक भी ट्लोड़ी न गाए।#यूह. 19:36.
21बुरो मैन्हु बुरैइयरे कम्मन सेइं मारो गालो,
ते धेर्मी सेइं बैर रखनेबाले दोषी भोल्हे।
22यहोवा अपने दासां केरि जान कीमत देइतां बच़ाते;
ते ज़ेत्रे तैस पुड़ भरोसो रखतन
तैन मरां कोई भी दोषी न ठहरेलो।
Currently Selected:
भजन संहिता 34: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
