भजन संहिता 22
22
दिलेरो दुख ते तारीफ़रू गीत
प्रधान बज़ानेबालेरे लेई अभ्येलेरशर रागे मां दाऊदेरू भजन
1हे मेरे परमेशर, हे मेरे परमेशर,
तीं अवं किजो शारो?
तू मेरी पुकार शुन्ने करां ते मेरी मद्दत केरने करां
किजो दूर रहतस? मेरो छुटकारो कोड़िए?
2हे मेरे परमेशर, अवं दीसां तीं पुकारताईं
पन तू जुवाब न देस;
ते अवं राती भी च़ुप न रेईं।
3पन तू ज़ै इस्राएलेरी तारीफ़रे तखते पुड़ बिशोरोस,
तू त पवित्र परमेशरस।
4तीं पुड़ इश्शे दादे पड़दादे भरोसो रखते थिये;
तैना भरोसो रखते थिये,
ते तू तैन छुटातो थियो।
5ज़ैखन तैनेईं मद्दतरे लेई तीं कां बिनती की
त तीं तैना खतरे करां छुटाए
तैना तींए पुड़ भरोसो रखते थिये।
ते कधी शरमिन्दे न भोए!
6पन अवं त अक कीड़ोईं; अवं इन्सान नईं;
लोकन मां मेरी बदनामी भोवरीए,
ते लोकन मां मेरी बेइज़्ज़ती भोतीए।
7तैना सब ज़ैना मीं हेरतन मेरो मज़ाक उड़ातन,
तैना अपनि ज़िभ केढतां
ते इन ज़ोइतां क्रोड़ी हिलातन,#मत. 27:39;मरक. 15:29.
8तैना ज़ोतन, “तै यहोवा पुड़ भरोसो केरते,
यहोवा तैस छुटाए,
तै तैस बच़ाए किजोकि तै तैस सेइं खुशे।”#भज. 91:14.
9पन तींए अवं गर्भे मरां कढोरोईं;
ज़ैखन अवं दुद्ध पीतो बच्चो थियो,
तैखने करां तीं मीं भरोसो रखनो शिखालो।
10ज़ेरो अवं पैदा भोव; अवं तेरे भरोसे पुड़ छ़ेडी दित्तो;
अम्मरे पेटे करां देंतो तू मेरो परमेशर राहोरोस।
11मीं करां तू दूर न भो किजोकि मुसीबत नेड़े,
ते होरो कोई नईं कि ज़ै मेरी मद्दत केरे।
12बड़े संढेईं अवं घेरतां रखोरोइं,
बाशानेरे#22:12 बाशानेरे बाशान, यरदनेरे पूर्वेरे पासेरो सूबो थियो, ज़ै मालेरे च़रनेरे लेई बड़ी रोड़ी ठार थी। निग्गर संढेईं च़ेवरे पासना अवं घेरतां रखोरोइं।
13तैना छ़िन्दने बाले ते गरज़नेबाले शेरेरे ज़ेरे
अपनु आशी खोलतां बिशोरेन।
14अवं पैनेरो ज़ेरो रुड़ी जेव;
ते मेरी सब हेड्डी केरे जोड़ घिशके:
मेरो दिल मोम भोइ जेव,
तै मेरी जानी मां गेली जेव।
15मेरी ताकत ट्लुटी जेवरीए; ते अवं केपरारो ज़ेरो सखत भोवरोईं;
ते मेरी ज़िभ तैलू सेइं खेत्ती जेवरीए;
ते तू मीं मित्ती#22:15 मित्ती मतलब कब्री मां मां मिलातस।#कह. 17:22.
16किजोकि कुतरेईं अवं घेरतां रखोरोइं;
कुकर्मी मैन्हु केरि मेण्डलां अवं च़ेवरे पासना घेरतां रखोरोइं,
तैना मेरे हथ पव कोशतन।#मत. 27:35;मरक. 15:29;लूक. 23:33.
17अवं एपनी सब हेड्डी गेनि सकताईं;
तैना मीं तकतन ते मेरे पासे घूरतन।
18तैना एप्पु मांमेइं मेरां लिगड़ां बंटतन,
ते मेरे लिगड़न पुड़ चिट्ठी छ़डतन।#मत. 27:35;लूक. 23:34;यूह. 19:24-25.
19पन हे यहोवा तू मीं करां दूर न भोए!
हे मेरे मद्दतगार, मेरी मद्दतरे लेई जल्दी केर!
20मीं तलवारी करां बच़ा,
मेरी जान कुतरां केरे पोचरे करां बच़ा!
21मीं शेरेरे ऐशी करां बच़ा;
हाँ जंगली दांतां केरे शिंगन करां मीं बच़ा।
22अवं अपने ढ्लां केरे सामने तेरे नंव्वेरो प्रचार केरेलो;
हछे लोकां केरे सामने तेरे नंव्वेरी तारीफ़ केरेलो।#इब्रा. 2:12.
23तुस ज़ैना यहोवा करां डरने बालेथ, तैसेरी तारीफ़ केरा!
हे याकूबेरे खानदानेरे लोकव, तुस सब तैसेरी तारीफ़ केरा!
हे इस्राएलेरे खानदानेरे लोकव, तुस सब तैसेरो डर मन्ना!#भज. 135:19-20.
24किजोकि तैनी दुखी लोक घटिया नईं समझ़ोरे
ते न तैन सेइं बैर रख्खे,
यहोवा अपनु तुत्तर तैन करां नईं छ़ुपेवरू;
पन ज़ैखन तैनी तैस कां बिनती की, तैखन तैसेरी शुनी छ़डी।
25बड़े लोकन मां मेरी तारीफ़ केरनी तेरी तरफां भोतीए;
अवं अपनि मिन्नतां तेरो डर रखनेबालां केरे सामने पूरी केरेलो।
26गरीब लोक रोट्टी खेइतां रज़्ज़ेले,
ज़ैना यहोवारे तलाशी मां आन; तैना तैसेरी तारीफ़ केरेले।
तुश्शे प्राण हमेशा ज़ींत रान।
27लोक दुनियारे आखरी कूने तगर तैसेरे नंव्वेरी तारीफ़ केरेले;
ते तैसेरे पासे फिरेले:
ते कौमां-कौमां केरे सब कुल तेरे सामने झुकेले।
28किजोकि राज़ यहोवारू आहे,
ते सेभी कौमन पुड़ तैए हुकूमत केरते।#जक. 14:9.
29धेरतरे सब ताकतबर लोक यहोवा कां बिशतां खाएले ते मथ्थो टेकेले;
तैना सब ज़ैना मित्ती मां मिली गातन
तैना सब अपने-अपने प्राण न बच़ेइ सकन,
तैना सब तैसेरे सामने झुकेले।
30एजनेबाली पीढ़ी तैसेरी सेवा केरेली;
होरि पीढ़ी सेइं प्रभुएरे बारे मां ज़ोवं गालू।
31तैना एज्जेले ते तैसेरां धर्मेरां कम्मां एक्की
नसली शुनाले; ज़ै हेजू पैदा नईं भोवरी,
किजोकि तैन्नी एन सब किछ कियोरूए।
Currently Selected:
भजन संहिता 22: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
