कहावतां 30
30
आगूरेरे वचन
1याकेरे मट्ठे आगूरेरे प्रभाव केरनेबाले वचन।
तैनी मड़दे ईतीएल ते उक्काले सेइं इन ज़ोवं:
2ज़रूर अवं जानबरेरो ज़ेरो आईं, बल्के मैन्हु ज़ोनेरे काबल भी नईं;
ते मैन्हेरी समझ़ मीं मां नईं।
3न मीं अक्ल हासिल कियोरीए,
ते न परमपवित्र परमेशरेरू ज्ञान मीं मैल्होरूए।
4कौन सुर्गे मां च़ेढ़तां फिरी ओस्तां अव?
केनि हवा अपनि मुठड़ी मां जमा केरतां रख्खोरीए?
केनि महा समुन्दर अपने लिगड़े मां बन्धोरोए?
केनि धेरतरी हद्दां ठहरेवरिन? तैसेरू नवं कुने?
ते तैसेरे मट्ठां केरू नवं कुने? अगर तू ज़ानतस त ज़ो!#30:4 ई पूरी आयत परमेशरेरे बारे मां आहे
5परमेशरेरू अक-अक वचन तेवरूए;
तै एप्पु कां एजनेबालां केरि ढाल बनो।
6तैसेरे वचन्न मां किछ न बधा,
एरू न भोए कि तै तीं डांटे ते तू झूठो ठहरस।
7मीं तीं करां दूई बर मग्गोरन,
एल्हेरेलेइ मेरे मरने करां पेइले तैन्न मीं देने करां तुत्तर न फिरा
8मतलब बेफैइदी ते झूठी गल मीं करां दूर रख; मीं न त गरीब केर ते न अमीर बना;
रोज़ेरी रोट्टी मीं खूवा।
9एरू न भोए, कि ज़ैखन मीं कां खाने जो बड़ू किछ भोइ गाए, तैखन अवं इन्कार केरतां ज़ोईं कि यहोवा कौने?
या कंगाल भोइतां च़ोरी केरि,
ते परमेशरेरे नंव्वेरी बेइज़्ज़त केरि।
10कोन्ची नौकरेरी, तैसेरे मालिके सेइं चोगली न केरां,
एरू न भोए कि तै तीं श्राप दे, ते तू दोषी ठहराव गास।
11एरे लोकन, ज़ैना अपने बाजी श्राप देतन
ते अपनि अम्मा धन न ज़ोन।
12तैना एरे लोकन ज़ैना एपनी नज़री मां शुद्ध आन,
पन तैन केरो मैल धोवरो नईं।
13एक्की पीढ़रे लोक एरे आन तैन केरि नज़र केत्री घमण्डे सेइं भरोरी रहतीए,
ते तैन केरि एछ़्छ़ी केरही च़ैढ़ोरी रैतिन।
14एक्की पीढ़रे लोक एरे आन, ज़ैन केरे दंत तलवार ते तैन केरि दाड़ां चैकू आन,
ज़ैन सेइं तैना शरीफ लोक धेरती पुड़ेरां, ते गरीबन मैन्हन मरां मिटेई छ़डतन।
15ज़ेन्च़रे जोंकेरी दूई कुइयां भोतिन, ज़ैना ज़ोतिन, “दे, दे,”
तेरही ट्लाई चीज़न, ज़ैना रज़्ज़न न; बल्के च़ेवर आन,
ज़ैना कधी न ज़ोन, “बस।”
16पाताल ते बे औलादरी कोख,
धरती ज़ै पानी पी पीतां रज़्ज़े न,
ते अग ज़ै कधी न ज़ोए, “बस।”
17ज़ैस अछ़्छ़ी सेइं कोई अपने बाजी पुड़ बेइज़्ज़तरी नज़र केरे,
ते बेइज़्ज़ती सेइं साथी अपनि अम्मरो हुक्म न मन्ने,
तैस अछ़्छ़ी वैदरे कंव्वां घेड़ी-घेड़ी कढेलां,
ते उकाबेरे बच्चे खाले।
18ट्लाई गल्लां मेरे लेई जादे मुश्किल आन,
बल्के च़ेवर आन, ज़ैना मेरी समझ़ी करां दूरन।
19अम्बरे मां उकाब च़ुड़ोलवेरी बत,
चट्टानी पुड़ सप्पेरी चाल, समुन्दरे मां ज़िहाज़ेरी बत,
ते कुइये सेइं साथी मड़देरी चाल।
20व्यभिचार केरनेबाली कौन्शरी चाल भी तेरही आहे;
तै रोट्टी खेइतां आशी पूंछ़तीए,
ते ज़ोतीए, मीं कोई अनर्थ कम नईं कियोरू।
21ट्लाई गल्लां केरे वजाई सेइं धरती थरकतीए; बल्के च़ेवर आन,
ज़ैना तैस झ़ेलोन न
22गुलामेरू राज़ो बन्नू,
बेवकूफेरू पेट भरनु
23भिट्टी कौन्श ड्लानी,
ते नौकरैनरू अपने मालकिनरू बारस भोनू।
24धेरती पुड़ च़ेवर निकड़े जीप आन,
ज़ैना बड़े जादे अक्लमन्दन
25बिंदली कमज़ोर त आन,
पन धुप्परे दिहाड़न मां अपनि खानेरी चीज़ां अकोट्ठी केरतिन;
26चट्टानी बिज्जू#30:26 चट्टानी बिज्जू ई जीप खरगोशेरो ज़ेरो भोते कमज़ोर भोतन,
पन फिर भी तैन केरि कुढां पहाड़न पुड़ भोतिन;
27टिट्टां केरो राज़ो त न भोए,
फिर भी तैना सब जथो बनेई-बनेइतां च़लतन;
28ते छिपकली#30:28 छिपकली या गरज़ार हथ्थे सेइं ट्लाई त गातीए,
फिर भी राज़ भवनन मां रहतीए।
29ट्लाई खूबसूरत च़लनेबाले प्राणी आन;
बल्के च़ेवर आन, ज़ैन केरि चाल रोड़ीए:
30शेर ज़ै सब जानबरन मां ताकतबरे,
ते केन्चेरे डरे करां न हटे;
31शिकारी कुतर ते थाव्वो,
ते अपनि सेनाई समेत राज़ो।
32अगर तीं अपनि बडीयाई केरनेरी बेवकूफी की,
या कोई बुरी योजना बनेवरी भोए, त तू रुक ते सोच।
33किजोकि ज़ेन्च़रे दुद्ध दाड़ने सेइं मखन निसतीए,
ते नक मरोड़ने सेइं खून निसते,
तेरही सरकरे भड़काने सेइं लड़ाई पैदा भोतीए।
Currently Selected:
कहावतां 30: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
