कहावतां 29
29
1ज़ै बार-बार डांटने पुड़ भी जिद केरतो रहते, तैसेरो अचानक नाश भोइ गालो।
ते तैसेरो कोई भी इंतज़ाम कम्मे न एज्जेलो।
2ज़ैखन धर्मी लोक उच्चे भोतन, तैखन आवाम खुश भोतीए;
पन ज़ैखन दुष्ट राज़ केरते तैखन आवाम अफ़सोस-अफ़सोस केरतीए।
3ज़ै अक्ली सेइं प्यार केरते, तै अपने बाजी खुश केरते,
पन वेश्यान कां गानेबालो दौलती उड़ाते।
4राज़ो न्याये सेइं मुल्खे कायम केरते,
पन ज़ै बड़ी रिश्पत नेते तैस पेलटी देते।
5ज़ै मड़द कोन्ची सेइं मिट्ठी-मिट्ठी गल्लां केरते,
तै तैसेरे पव्वां केरे लेई जाल बछ़ाते।
6बुरे मैन्हेरो पाप तैसेरेलेइ फंदो भोते,
पन धर्मी खुश भोइतां जयजयकार केरते।
7धर्मी मड़द कंगालां केरे मुकदमे मां मन लाते;
पन दुष्टी मैन्हु तैस ज़ान्नेरी समझ़ न रख्खे।
8मज़ाक बनानेबाले लोक नगरे फुक्की देतन,
पन अक्लमन्द लोक सरकी ठंडी केरतन।
9ज़ैखन अक्लमन्द बेवकूफन सेइं साथी बेंस केरतन,
तैखन तै बेवकूफ सेकोते ते मज़ाक बनाते, ते तैड़ी शान्ति न राए।
10खूनी लोक ईमानदार मैन्हु सेइं बैर रखतन,
ते सिद्धे लोकां केरे प्राणेरी तोप केरतन।
11बेवकूफ अपने सारे मनेरी गल खोलते,
पन अक्लमन्द अपने मने रोकते, ते च़ुप केरते।
12ज़ैखन हाकिम झूठी गल्लां केरे पासे कन लाते,
तैखन तैसेरे सब सेवक दुष्ट भोइ गातन।
13गरीब ते अंधेर केरनेबाले मैन्हन मां अक बराबरी भोतीए;
यहोवा दूईयां केरि एछ़्छ़न मां लौ देते।
14ज़ै राज़ो कंगालां केरो न्याय सच़्च़ैई सेइं केरते,
तैसेरो तखत सदा टिकोरो रहते।
15सोटी ते डांटी सेइं अक्ल हासिल भोतीए,
पन ज़ैन मट्ठू एन्च़रे शारू गाते तैन अपनि अम्मरी शरमरू कम भोते।
16दुष्टां केरे बधने सेइं पाप भी बद्धते;
पन आखरी मां धर्मी लोक तैन केरू बिछ़ड़नू हेरतन।
17अपने मट्ठे झ़िड़क दे, तैखन तैस सेइं तीं चैन मैल्हेलो;
ते तेरो मन सुखी भोइ गालो।
18ज़ैड़ी दर्शनेरी गल न भोए, तैड़ी लोक बेलगाम भोइ गातन,
पन ज़ै कानूने मन्ते तै धन भोते।
19दास गल्लां केरे ज़िरिये सुधारो न गाए,
किजोकि तै सेमझ़तां भी न मन्ने।
20कुन तू गल्लां केरने मां जल्दी केरनेबाले मैन्हु हेरतस?
तैस करां जादे त बेवकूफे सेइं उमीदे।
21ज़ै अपने नौकरे तैसेरे निकड़ारेरे देंते लाड-प्यारे सेइं पालते,
तै दास आखरी मां तैसेरू मट्ठू#29:21 मट्ठू या बारस बेनतां बिशते।
22क्रोध केरनेबालो मैन्हु लड़ाई मच़ाते
ते बड़ो जादे सरक केरनेबालो पापी भी भोते।
23मैन्हेरे घमण्डेरे वजाई सेइं घटिया भोनू पेते,
पन शरीफ आत्मा बालो आदरारो अधिकारी भोते।
24ज़ै च़ोरे सेइं साथ रखते तै अपने प्राणेरो बैरी भोते;
कसम खाने पुड़ भी तै गल बांदी न केरे।
25मैन्हेरू डरनू फंदो भोइ गाते,
पन ज़ै यहोवा पुड़ भरोसो रखते तैसेरी ठार उच्ची की गाली।
26हाकिमे सेइं मुलाकात केरनी बड़े लोक चातन,
पन मैन्हेरो न्याय यहोवा केरते।
27धर्मी लोक बुरे मैन्हु सेइं नफरत केरतन,
ते दुष्ट मैन्हु भी सिद्धी चाल च़लनेबाले सेइं नफरत केरते।
Currently Selected:
कहावतां 29: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
