कहावतां 22
22
1बड़े दौलती करां रोड़ू नवं जादे चाने काबले,
ते सोन्नू चैंदी करां होरन करां आदर मैल्हनी रोड़ीए।
2अमीर ते गरीब दूईयन मां अक बराबरी भोतीए;
यहोवा तैन दूईयां केरो बनानेबालोए।
3च़लाक मैन्हु मुसीबत एइतां लेइतां छ़पते;
पन सिद्धे-सादे लोक अग्रोवं गेइतां सज़ाह भोगतन।
4नम्रता ते यहोवारो डर मन्नेरो फल धन,
आदर ते लम्मी ज़िन्दगी भोतीए।
5टारे मैन्हेरे बत्ती मां कंटे ते फंदे रहतन;
पन ज़ै अपने प्राणां केरि हिफाज़त केरते, तै तैन करां दूर रहते।
6बच्चे तैस्से बत्तरी शिक्षा दे ज़ैस मां तैस च़लोरू लोड़े,
ते तै बुढे बारे मां भी तैस करां दूर न भोल्हो।
7अमीर, गरीब लोकन पुड़ राज़ केरते,
ते ओधार नेनेबालो ओधार देनेबालेरो गुलाम भोते।
8ज़ै अन्यायेरू बीज़ बेते, तै मुसीबतरी फसल कटेलो,
ते तैसेरे सरकरो सोटो ट्लुटेलो।
9दया केरनेबाले पुड़ बरकत फलतीए,
किजोकि तै कंगाले अपनि रोट्टी मरां देते।
10मज़ाक बनानेबालन कढ, तैखन लड़ाई मिटाई गाली,
ते बेंस ते बेइज़्ज़ती दूईये ट्लुटी गैली।
11ज़ै मनेरी शुद्धताई सेइं प्यार केरते,
ते ज़ेसेरी गल्लां खूबसूरत भोतिन, राज़ो तैसेरो दोस्त भोते।
12यहोवा ज्ञानी मैन्हु पुड़ नज़र केरतां, तैसेरी हिफाज़त केरतो रहते,
पन धोखे बाज़ेरी गल्लां उलटाते।
13आलसी ज़ोते, बेइर त शेर भोल्हो!
अवं चौकेरे मझ़ाटे मारो गेइलो।
14व्यभिचार केरनेबाली कौन्शरू तुत्तर डुग्घो खड्डो भोते;
ज़ैस सेइं यहोवा सेकोते, तै तैस मां झ़ड़ते।
15मट्ठेरे मने मां बेवकूफेरो ड्लन्ठ बंधोरो रहते,
पन अनुशासनेरी सोटी सेइं तै खोलतां तैस करां दूर की गाचे।
16ज़ैना अपने फैइदेरे लेई कंगाले पुड़ ज़ुलम केरतन,
ते ज़ै अमीरे भेंट देते, तैना दूईये सिर्फ कंगाल भोल्हे।
अक्लमन्देरी गल्लां
17कन लेइतां अक्लमन्दा केरि गल्लां शुन,
ते मेरे ज्ञानेरे गल्लां केरे पासे मन ला;
18अगर तू तैस अपने मने मां रख्खस,
ते तैना सब तेरे ऐशी मरां कढन भी, त ई मन पसंद गल भोल्ही।
19मीं अज़ एल्हेरेलेइ इना गल्लां तीं ज़ोवरिन,
कि तेरो भरोसो यहोवा पुड़ भोए।
20अवं बड़े दिहाड़न करां तेरे फैइदेरे उपदेश
ते ज्ञानेरी गल्लां लिखतो एवरोईं,
21कि अवं तीं सच़्च़े वचना केरू याकीन देईं,
ज़ैस सेइं ज़ै तीं कम्मे मां लाए, तैन्न सच़्च़ो जुवाब देइ सकस।
22कंगाले पुड़ इस वजाई सेइं अंधेर नईं कि तै कंगाले,
ते न शरीफ मैन्हु आदालती मां पिहां;
23किजोकि यहोवा तैन केरो मुकदमो लड़ेलो,
ते ज़ैना लोक तैन केरि दौलत नेतन, तैन केरो प्राण भी तै नेते।
24सरकी बाले मैन्हेरो दोस्त न बेना,
ते जल्दी सरक केरनेबाले सेइं साथी नईं च़लनू,
25कोन्च एरू न भोए कि तू तैसेरी चाल शिखस,
ते तेरो प्राण फंदे मां फंसे।
26ज़ैना लोक हथ्थे पुड़ हथ मारतन,
ते कर्ज़दारां केरे ज़िमेवार भोतन, तैन मां तू न गेइयां।
27अगर तीं कां भुगतान केरनेरे लेई किछ न भोए,
त किजो न शावकार तीं हैठां खट नेलो?
28ज़ै हद तेरे दादे पड़दादेईं बन्धोरी भोए, तैस पुरानी हद न बधा।
29अगर तू एरे मड़दे हेरस ज़ै कम-काज़े मां भरपूर भोए,
त तै राज़ां केरे सामने खड़ो भोल्हो; आम लोकां केरे सामने नईं।
Currently Selected:
कहावतां 22: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
