मरकुस 10
10
ड्लाह त कने फारख्ती देनेरे बारे शिक्षा
(मत. 19:1-12;लूक. 16:18)
1तैल्ला पत्ती, यीशु त तैसेरे चेले तैट्ठां उठतां यहूदिया इलाके मां आए, त फिरी यरदन दरियारे उस पार च़ले जे। तैड़ी मैन्हु केरि भीड़ फिरी तैस कां अकोट्ठी भोइ। त तै अपने रीतरे मुताबिक तैन फिरी शिक्षा देने लगो। 2तैखन फरीसी लोकेईं यीशु कां एइतां तैस अज़मानेरे लेई तैस पुछ़ू, “कुन एन जाइज़ आहे कि मड़द अपनि कुआन्शी फारख्ती दे?” 3पन यीशुए तैन्न पुछ़ू, “बड़े पेइले मूसा नेबे तुसन कुन केरनेरो हुक्म दित्तोरो थियो?” 4तैखन तैनेईं यीशुए जुवाब दित्तो, “मूसे मड़दे अज़ाज़त दित्तोरीए कि तै लिखतां फारख्ती दे।” 5तैखन यीशुए तैन्न जुवाब दित्तो, “तुश्शे सखत दिलेरी वजाई सेइं, मूसे तुश्शे लेई ऐह हुक्म दित्तोरो थियो। 6पन दुनियारी शुरुआती मां, ज़ैखन परमेशरे मैन्हु केरि रच़ना की, तैखन तैनी तैना मड़द ते कुआन्श बनेवरेन। 7एल्हेरेलेइ, ड्लाहेरे पत्ती मड़द अपने हाज-बव्वे करां अलग भोइतां अपनि कुआन्शी सेइं साथी रालो, 8ते तैना दूईये अक्के जान भोल्हे।” तैल्ला पत्ती यीशुए ज़ोवं, “एल्हेरेलेइ तैना हुनी परमेशरेरी नज़री मां दूई नईं, पन तैना अक्के आन। 9एल्हेरेलेइ ज़ैना परमेशरे ज़ोड़ोरेन, तैन्न कोई मैन्हु अलग न केरे!”
10बादे मां, ज़ैखन यीशु ते तैसेरे चेले घरे मां थिये, तैखन तैसेरे चेलेईं फारख्ती देनेरे बारे मां तैस फिरी पुछ़ू। 11यीशुए तैन सेइं ज़ोवं, “ज़ै कोई अपनि कुआन्शी फारख्ती देइतां होरो ड्लाह बनाए, त तै तैस पेइली कुआन्शारे खलाफ बदमाशी केरते। 12त अगर कुआन्श अपने मड़दे छ़ेडतां होरो ड्लाह बनाए, त तै अपने पेइले मड़देरे खलाफ बदमाशी केरचे।”
यीशु निक्के बच्चन आशिर्वाद देते।
(मत. 19:13-15;लूक. 18:15-17)
13तैल्ला पत्ती, किछ लोक अपने निक्के बच्चन यीशु कां आन्ने लग्गे ताके तै तैन पुड़ हथ रेखतां आशिर्वाद दे, पन तैसेरे चेलेईं तैना लोक डांटे। 14यीशुए एन हेरतां सेरकोइतां अपने चेलन सेइं ज़ोवं, “निक्के बच्चन मीं कां एजने देथ, तैन्न न ठाका, किजोकि परमेशरेरू राज़ एरे ज़ेरे लोकां केरे लेई आहे। 15अवं तुसन सेइं सच़ ज़ोताईं कि ज़ै कोई परमेशरेरे राज़्ज़े#10:15 परमेशरेरे राज़्ज़ेरे दूई मतलब आन। इश्शी ज़िन्दगी मां, हुन्ना भी परमेशर राज़ केरते। या सुर्गे मां भी तै हमेशा असन पुड़ राज़ केरेलो। निकड़े बच्चेरू ज़ेरू कबूल न केरे, त तै परमेशरेरे राज़्ज़े मां कधी भी दाखल न भोइ सके।” 16तैखन यीशुए तैना बच्चे कुम्मे मां रेखां, तैन पुड़ हथ रेखतां तैन्न आशिर्वाद दित्तो।
हमेशारी ज़िन्दगरे बारे मां अक अमीर जुवान यीशुए सवाल पुछ़ते।
(मत. 19:16-30;लूक. 18:18-30)
17तैल्ला पत्ती, ज़ैखन यीशु त तैसेरे चेले घरेरां बेइर निस्तां बत्तां च़ेलि राओरे थिये, ते अक मैन्हु यीशु कां दौड़तो अव। तैनी तैस कां मथ्थो टेकतां तैस पुछ़ू, “हे रोड़े गुरू, हमेशारी ज़िन्दगी हासिल केरनेरे लेई अवं कुन केरि?” 18पन यीशुए तैस पुछ़ू, “किजो तू मींजो रोड़ू ज़ोतस? परमेशरेरे अलावा होरो कोई भी रोड़ो नईं। 19तू त परमेशरेरे हुक्मन ज़ानतस, यानी ‘खून न केरा, बदमाशी न केरा, च़ोरी न केरा, झूठी गवाही न देथ, धोखो न देथ, अपने हाज-बव्वां केरि इज़्ज़त केरा।’ ” 20पन तैनी मैन्हे यीशु जुवाब दित्तो, “हे गुरू, एना सब हुक्म अवं बचपनेरो मन्तो एवरोईं।” 21तैखन यीशुए तैस तेकतां तैस सेइं प्यार कियो, त तैस सेइं ज़ोवं, “तीं मां एक्की गल्लरी कमी आहे। गा, ज़ैन किछ तीं कां आहे तैन बेच़तां गरीब मैन्हन दे, तैखन तीं सुर्गे मां खज़ानो मैल्हेलो। तैल्ला पत्ती, एइतां मेरो चेलो बना, त अपनु क्रूस#10:21 क्रूस छ़ुइतां यीशु पत्ती च़लनू: मतलब कि, यीशुएरे पत्ती च़लनेरे वजाई सेइं दुख या मुसीबत झ़लनेरे लेई, ते मरनेरे लेई भी तियार रानू। छ़ुइतां मीं पत्ती च़ल।” 22यीशुएरी ऐह गल शुन्तां तैस मैन्हेरू तुत्तर ट्लेक्की जेवं, त तै बड़ो दुखी भोइतां च़लो जेव, किजोकि तै बड़ो अमीर थियो त तै अपनु धन छ़डने न चातो थियो।
23तैखन यीशुए च़ेवरे पासन अपने चेलन तेकतां तैन सेइं ज़ोवं, “अमीर मैन्हु केरू परमेशरेरे राज़्ज़े मां दाखल भोनू बड़ू मुश्किल आहे।” 24यीशुएरे चेले तैसेरी गल्लां शुन्तां हैरान#10:24 यहूदी लोक एरो विश्वास केरते थिये कि अगर कोई अमीर आए त तै सुर्गे मां गेइ सकते। एल्हेरेलेइ यीशुएरे चेले तैसेरी ऐह गल शुन्तां हैरान भोए। भोए। पन यीशुए फिरी तैन सेइं ज़ोवं, “हे मट्ठव, ज़ैना धने पुड़ भरोसो रखतन, तैन केरे लेई परमेशरेरे राज़्ज़े मां दाखल भोनू बड़ू मुश्किल आहे! 25परमेशरेरे राज़्ज़े मां अमीर मैन्हेरू दाखल भोने करां ऊँटेरू सांधनेरे पाऐ मरां निसनू सुख्तू आहे!” 26तैखन तैना बड़े हैरान भोइतां एप्पू मांमेइं ज़ोने लग्गे, “अगर अमीर मैन्हेरे लेई मुक्ति#10:26 मुक्ति हासिल केरनि या परमेशरेरे राज़्ज़े मां दाखल भोनू, एना दूईये लगभग अक्के गल आए। हासिल केरनि नामुमकिन आहे, त फिरी केसेरी मुक्ति भोइ सकचे?” 27यीशुए तैन केरे पासे तेकतां ज़ोवं, “मैन्हु अपने आपे न बच़ेइ सकन, यानी मुक्ति हासिल न केरि सकन, पन परमेशर एन केरि सकते, किजोकि परमेशर सब किछ केरि सकते।”
28तैखन पतरस यीशु सेइं ज़ोने लगो, “तक, अस त सब किछ छ़ेडतां तीं पत्ती च़लोरेम! असन कुन इनाम मैल्हेलू?” 29यीशुए अपने चेलन सेइं ज़ोवं, “अवं तुसन सेइं सच़ ज़ोताईं कि, ज़ैनेईं मेरे लेई त कने मेरे बारे मां खुशखबरी होरे लोकन शुनानेरे लेई अपने घर या ढ्ला या बेइन या हाज या बव या बच्चे या ऊडारां शारोरन, 30तैन्न इस दुनियाई मां शौव गुणा मैल्हेलू। तैना घरन, ढ्लान, बेइन्न, हेईयन, बच्चन त कने ऊडारां हासिल केरेले। लोक भी तैन्न सताले, पन एजनेबाली दुनियाई मां परमेशर तैन्न हमेशारी ज़िन्दगी देलो। 31पन बड़े मैन्हु ज़ैना हुन्ना पेइले आन, तैना बादे मां पत्रोवं भोनेन। त ज़ैना हुन्ना पत्रोवं आन, तैना बादे मां पेइले भोनेन।”
यीशु ज़ोते कि “अवं मारो गानोईं, पन दुबारां ज़ींतो भोनोईं।”
(मत. 20:17-19;लूक. 18:31-34)
32तैल्ला पत्ती, यीशु त तैसेरे चेले ते किछ लोक यरूशलेम नगरे जो च़लते-च़लते, तैना हेजू बत्तां थिये। यीशु तैन केरे अग्री-अग्री च़ेलि राओरो थियो। ते तैसेरे चेले हैरान भोए त होरे लोक डरते-डरते तैस पत्ती च़ली राओरे थिये। तैखन यीशु अपने 12 चेलन बत्ती मरां अलग नेइतां फिरी तैन सेइं तैना गल्लां ज़ोने लगो, ज़ैना तैस सेइं भोने बैली थी। 33तैनी ज़ोवं, “शुना, अस सारे यरूशलेम नगरे जो गेइ राओरेम। तैड़ी मैन्हेरू मट्ठू (यानी अवं) प्रधान याजकन त कने शास्त्री लोकन करां कैद कियो गानोईं, त तैना मीं मारनेरो हुक्म देले त गैर यहूदी लोकां केरे हवाले केरले। 34त होरि कौमां केरे लोक मेरो मज़ाक बनाले, त मीं पुड़ थुकेले, त मीं कोड़े मारेले, त तैना मीं मैरी छ़डेले, पन ट्लेइ दिहाड़ना पत्ती अवं मुड़दन मरां फिरी ज़ींतो भोल्हो।”
याकूब त कने यूहन्ना, यीशु सेइं अक मिन्नत केरतन।
(मत. 20:20-28)
35तैखन याकूब त यूहन्ना, ज़ैना जब्दी नंव्वेरे मैन्हेरां मट्ठां थियां, यीशुएरे नेड़े एइतां तैस सेइं ज़ोने लग्गे, “हे गुरू, अस चातम कि ज़ैन किछ अस तीं केरां मगम, तैन तू असन दे।” 36यीशुए तैन पुछ़ू, “तुसन कुन लोड़ते, ज़ैन अवं तुसन देईं?” 37तैनेईं तैस सेइं ज़ोवं, “असन एन दे कि ज़ैखन तू महिमा सेइं साथी राज़ केरेलो, तैखन तीं सेइं साथी राज़ केरनेरे लेई असन मरां अक तेरे देइने पासे त होरो तेरे बांए पासे राज़गेद्दी पुड़ बिश्शे।” 38पन यीशुए तैन सेइं ज़ोवं, “तुस न ज़ानथ कि तुस कुन मगने लग्गोरेथ! ज़ेन्च़रे दुख अवं झ़ैलने बालोईं, कुन तुस झ़ेल्ली सकतथ? ज़ेन्च़रे अवं मारनोईं कुन तुस भी मारे गानेरे लेई तियारथ?” 39तैनेईं तैस जुवाब दित्तो, “हाँ, अस एन केरि सकतम।” एल्हेरेलेइ, यीशुए तैन सेइं ज़ोवं, “सच़्च़े, ज़ेन्च़रे अवं दुख झ़ैलने बालोईं, तेन्च़रे तुस झ़ल्लेले? ज़ेन्च़रे अवं मारनोईं तेन्च़रे तुस मारे गाले। 40पन तै ठार ज़ैन केरे लेई पेइले तियारी कियोरीए, तैन छ़ेडतां होरे केन्ची अपने देइने पासे त कने अपने बांए पासे राज़गेद्दी पुड़ बिशालनू मेरू कम नईं।”
41एन शुन्तां यीशुएरे बाकी दश चेले याकूब त कने यूहन्ना सेइं नराज़ भोइ जे। 42तैखन यीशुए अपने सारे चेले नेड़े कुजेइतां, तैन सेइं ज़ोवं, “तुसन पतोए कि ज़ैना होरि कौमां केरे लोकां केरे राज़ केरनेबाले समझ़े गातन, तैना अपने लोकन पुड़ राज़ केरतन। तैन मरां ज़ैना बड्डे अफसर आन, तैना अपने लोकन पुड़ हुकूमत च़लातन। 43पन तुसन मां एरी ज़ेरि गल न लोड़े, पन ज़ै कोई तुसन मां बड्डो बन्नू चाए, त तै निकड़ो बेनतां तुश्शो सेवक बने। 44त ज़ै कोई तुसन मां प्रधान मैन्हु बन्नू चाए, त तै सारे मैन्हु केरो सेवक बने। 45किजोकि मैन्हेरू मट्ठू, यानी अवं एस दुनियाई मां एल्हेरेलेइ नईं एवरो कि कोई मेरी सेवा केरे, पन एल्हेरेलेइ एवरोईं कि अवं होरि लोकां केरि सेवा केरि त कने बड़े लोकां केरे लेई अपनि जान बलिदान केरि, ताके तैन अपने पापां केरे सज़ाही करां छुटकारो मैल्हे।”
यीशु बरतिमाई नंव्वेरो कानो मैन्हु बज़्झ़ाते।
(मत. 20:29-34;लूक. 18:35-43)
46तैल्ला पत्ती, यीशु त तैसेरे चेले यरीहो नगरे मां पुज़्ज़े। बादे मां, ज़ैखन तैना मैन्हु केरि बड़ी भीड़ी सेइं साथी यरीहो नगरे मरां निस्सी राओरे थिये, त तैखन बरतिमाई नंव्वेरो कानो भिखारी सड़केरे ड्लेखी बिशतां भीख मेग्गी राओरो थियो। तैसेरे बाजी केरू नवं तिमाई थियूं। 47ज़ैखन तैनी शुनू कि नासरत नगरेरो यीशु इलमेइं निस्सी राओरोए, त तै भिखारी ज़ोरे सेइं ज़ोने लगो, “हे यीशु, दाऊद राज़ेरा मट्ठा!#10:47 दाऊद राज़ेरू मट्ठू: यहूदी लोक ज़ानते थिये कि परमेशरेरे तरफां एजनेबालो मसीह, दाऊद राज़ेरे खानदाने मरां भोल्हो। एस विश्वासे सेइं तैनी काने मैन्हे यीशु एन्च़रां कुजव कि दाऊद राज़ेरा मट्ठा। मीं पुड़ दया केर!” 48त बड़े लोकेईं तै डांटो कि, “च़ुप रा।” पन तै पेइले करां जादे चिन्डां मारने लगो, “हे दाऊद राज़ेरा मट्ठा, मीं पुड़ दया केर!” 49तैखन यीशुए रुकतां लोकन सेइं ज़ोवं, “तुस तैस इरां कुजाथ।” लोकेईं तै कानो कुजेइतां तैस सेइं ज़ोवं, “हिम्मत रख! उठ! यीशु तीं एप्पू कां कुजाने लग्गोरोए।” 50तै अपनि च़ादर शैरतां लूशी उठो, ते यीशु कां अव। 51तैखन यीशुए तैस पुछ़ू, “तीं कुन लोड़ते कि अवं तेरे लेई केरि?” काने मैन्हे जुवाब दित्तो, “हे गुरू, अवं लहंनू चाताईं।” 52तैखन यीशुए तैस सेइं ज़ोवं, “तू गा। तीं मीं पुड़ विश्वास कियूं एल्हेरेलेइ अवं तीं बझ़ाताईं।” अकदम तै लहंने लगो त कने यीशु पत्ती च़लो।
Currently Selected:
मरकुस 10: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
