लूका 18

यीशु अपने चेलन अधर्मी हाकिम ते विधवा कुआन्शरी मिसाल देते

1यीशु अपने चेलन अक मिसाल देइतां ज़ोवं, कि हिम्मत हारनेरे बगैर प्राथना केरती राहोरी लोड़े, 2“एक्‍की नगरे मां अक हाकिम रहतो थियो। तै न परमेशरे करां डरतो थियो, ते न कोन्ची मैन्हेरी परवाह केरतो थियो। 3तैस नगरे मां अक विधवा कुआन्श रहती थी ज़ै तैस हाकिमे कां एइती रहती थी, ते तैस कां मिन्नत केरती रहती थी कि, मेरो न्याय केरतां मीं मेरे दुश्मने करां छुटा। 4पेइले त तैनी एत्रो खियाल न कियो पन ज़ैखन ऐह हिसाब च़लतो राव, त तैनी अपने मने मां ज़ोवं, ‘अवं न परमेशरे करां डेरि ते न मैन्हेरी परवाह केरि। 5पन ऐह विधवा कुआन्श मीं परेशान केरती राचे, एल्हेरेलेइ अवं एसारो न्याय केरेलो, नईं त एसां अवं बड़ो ज़लील केरनोईं।’” 6तैखन प्रभु यीशुए ज़ोवं, “शुना ऐह बेइमान हाकिम कुन लगोरो ज़ोने। 7बस कुन परमेशर अपने च़ुनोरे लोकां केरो फैसलो केरने मां च़िर लालो, ज़ैना रात दिहैड़ी फरियाद केरते रातन? 8अवं ज़ोताईं, कि तै तैन केरो फैसलो केरेलो ते लूशी केरेलो। पन फिरी भी ज़ेइस मैन्हेरू मट्ठू यानी अवं एज्जेलो त कुन लोक मीं पुड़ हेजू तगर विश्वास केरते भोल्हो?”

फरीसी लोक ते धड़त नेने बालेरी मिसाल

9यीशुए किछ एरे लोकन अक मिसाल दित्ती कि, ज़ैन अपनो आपे बड़ो धर्मी समझ़ते थिये ते होरन किछ न थिये बुझ़ते। 10“दूई मैन्हु प्राथना केरने मन्दरे मां जे अक फरीसी मैन्हु थियो, ते होरो धड़त (टेकस) घिन्ने बालो थियो। 11फरीसी मैन्हु खड़ो भोइतां प्राथना केरने ते अपने बारे मां सोचने लगो, कि हे परमेशर अवं तेरू शुक्र केरताईं, अवं होरि मैन्हु केरो ज़ेरो नईं ज़ैना डैकू, अधर्मी, बदमाशी केरनेबाले, ते इस धड़त नेने बालेरो ज़ेरो नईं, 12अवं हफते मां दूई बार बरत रखताईं, ते अपनि कमैईयरो दशोवं हिस्सो तींजो देताईं।

13“पन तै धड़त नेनेबालो ज़ै दूर खड़खड़ो थियो, तैनी एत्रू भी न केरि बटु, कि अम्बरेरे पासे तक्‍के बल्के छाती पिट्टतां ज़ोने लगो, ‘हे परमेशर मीं पैपी पुड़ दया केरतां माफ़ केर!’ 14अवं तुसन सेइं सच़ ज़ोताईं, एस धड़त नेनेबाले मैन्हु तैस फरीसी मैन्हु करां धर्मी निस्तां अपने घरजो जेव। किजोकि ज़ै कोई अपनो आप बड्डो बनालो तै निकड़ो बनाव गालो ते ज़ै अपनो आप निकड़ो बनालो तै बड्डो बनाव गालो।”

बच्‍चन बरकत देनी

(मत. 19:13-15;मरक. 10:13-16)

15फिरी किछ लोक निक्‍के बच्‍चन यीशु कां आन्ने लगे ताके यीशु तैन पुड़ हथ रेखतां बरकत दे। चेलेईं तैन लाव त तैना धमकाए ते ठाकू। 16पन यीशुए बच्‍चे एप्पू कां कुजाए ते चेलन सेइं ज़ोवं, “बच्‍चन मीं कां एजने देथ एन न ठाका, किजोकि परमेशरेरू राज़ एरां ज़ेरां केरूए। 17अवं तुसन सेइं सच़ ज़ोताईं, ज़ै कोई परमेशरेरे राज़्ज़े मां गानेरे लेई अपनो आप निक्‍के बच्‍चन बराबर न बनाए, तांतगर परमेशरेरे राज़्ज़े मां दाखल न भोइसखे।”

दौलतमन्द मैन्हु ते हमेशारी ज़िन्दगी

(मत. 19:16-30;मरक. 10:17-31)

18केन्ची यहूदी मैन्हे यीशुए पुछ़ू, “हे रोड़े गुरू हमेशारी ज़िन्दगी हासिल केरनेरे लेई अवं कुन केरि?” 19यीशुए जुवाब दित्तो, “तू मींजो रोड़ू किजो ज़ोतस? परमेशरेरे अलावा होरो कोई भी रोड़ो नईं। 20तू त परमेशरेरे हुक्मन ज़ानतस, यानी ‘खून न केरा, बदमाशी न केरा, च़ोरी न केरा, झूठी गवाही न देथ, धोखो न देथ, अपने हाज-बव्वां केरि इज़्ज़त केरा।’ ” 21तैनी मैन्हे ज़ोवं, “एना सब हुक्म अवं बचपनेरो मन्तो एवरोईं।” 22तैखन यीशुए एन शुन्तां ज़ोवं, “तीं मां एक्‍की गल्‍लरी कमीए, तू ज़ैन किछ तीं कांए, तैन बेच़तां गरीब मैन्हन दे, तैखन तीं सुर्गे मां खज़ानो मैल्हेलो। ते एइतां मीं पत्ती च़ल।” 23ऐह गल शुन्तां तै बड़ो उदास भोइ जेव किजोकि तै बड़ो अमीर थियो। 24यीशुए तैस हेरतां ज़ोवं, “अमीरां केरू परमेशरेरे राज़्ज़े मां दाखल भोनू केत्रू आसुखतुए। 25परमेशरेरे राज़्ज़े मां अमीर मैन्हेरू दाखल भोने केरां ऊँटेरू सांधनेरे पाऐ मरां निसनू सुख्तू आहे!” 26ज़ैनेईं ऐह गल शुनी त तैना पुछ़ने लगे, “फिरी केसेरी मुक्ति भोइ सखचे।” 27यीशुए जुवाब दित्तो, “मैन्हन करां त एन न भोइ सके पन परमेशरे करां सब किछ भोइ बटते।” 28पतरसे यीशु सेइं ज़ोवं, “हेर असां त सब किछ छ़ेडतां तीं पत्ती च़लोरेम।” 29यीशु तैन सेइं ज़ोवं, “अवं तुसन सच़ ज़ोताईं, कि एरो कोई नईं ज़ैनी परमेशरेरे राज़्ज़ेरे लेई अपनु घर या कुआन्श ते हाज या बव, ढ्ला या बच्‍चे शारोरे भोन। 30तैस इस दुनियाई मां बड़ू जादे, ते एजने बैली दुनियाई मां हमेशारी ज़िन्दगी मैल्हनी।”

यीशु अपने मौतरे बारे मां ट्लेइयोवं बारे ज़ोते

(मत. 20:17-19;मरक. 10:32-34)

31यीशुए अपने 12 चेले एप्पू सेइं साथी निये ते तैन ज़ोने लगो, हेरा, “अस यरूशलेम नगरे जो च़लोरेम ते नेबेईं ज़ैन किछ मैन्हेरे मट्ठेरे बारे मां लिखेरूए तैन पूरू भोल्हु। 32तै गैर कौमां केरे हथ्थे देनोए, ते तैना तैसेरो मज़ाक बनाले ते तैस बेइज़्ज़त केरेले ते तैसेरे तुत्तरे पुड़ थुकनूए। 33तैस कोड़े मारेले ते तैस मैरी छ़डेले पन तै ट्लेइयोवं दिहाड़े फिरी ज़ींतो भोल्हो।” 34तैनेईं ऐह गल न सेमझ़ी बटी ते यीशुएरी एस गल्‍लरो मतलब तैन करां छ़पोरो राव।

काने भूखैरेरी मिसाल

(मत. 20:29-34;मरक. 10:46-52)

35ते एरू भोवं कि ज़ैखन तैना यरीहो नगरेरे नेड़े पुज़्ज़े त अक कानो मैन्हु बत्तरे ड्लेखी बिशोरो भीख मगतो थियो। 36ज़ैखन तैनी हछे मैन्हु केरि छ़ेड़ शुनी त तै पुछ़ने लगो, “ऐह कोलहेरी शौर लोरी भोने?” 37लोकेईं तैस ज़ोवं, “यीशु नासरी कोस्कोई च़लरोए।” 38तै चिन्डां मैरतां ज़ोने लगो, “हे यीशु नासरी दाऊदेरा मट्ठां मीं पुड़ दया केर।” 39यीशुए सेइं साथी च़लनेबाले लोक तैस काने मैन्हु झ़िड़कने ते ज़ोने लग्गे, च़ुप रा, पन तै मना जादे ज़ोरे-ज़ोरे चिन्डां मैरतां ज़ोने लगो, “हे यीशु नासरी दाऊदेरे मट्ठा मीं पुड़ दया केर।” 40यीशु खेड़ोव ते हुक्म दित्तो, एस मीं कां आनां ज़ैखन तै तैस कां अव त यीशुए तैस पुछ़ू। 41ज़ो, “अवं तेरे लेई कुन केरि?” तैनी काने मैन्हे ज़ोवं, “हे प्रभु अवं चाताईं कि अपनि एछ़्छ़ेईं सेइं लेही बेटि।” 42यीशुए तैस सेइं ज़ोवं, “बेज़्झ़ोईं गा तेरे विश्वासे तू बज़्झ़ावरिस।” 43तै तैखने बेज़्झ़ोव ते लहने लगो ते परमेशरेरी तारीफ़ केरतो यीशु पत्ती च़लो जेव। एन हेरतां सब लोक परमेशरेरी तारीफ़ केरने लगे।

Currently Selected:

लूका 18: BHDNT

Highlight

Copy

Compare