लूका 17

ठोकरारी वजा बन्नू

(मत. 18:6-7,21-22;मरक. 9:42)

1फिरी तैनी अपने चेलन सेइं ज़ोवं, “एन न भोइसखे कि लोकन ठोकर न लग्गे, पन अफ़सोस तैस मैन्हु पुड़ ज़ै होरि केरे लेई ठोकर बनते। 2तैसेरेलेइ त एन्ने रोड़ू थियूं, कि ढ्लाटेरो ढ्लेइटोल तैसेरे गले उन्ढो छ़ेडतां ते समुन्दरे मां शैरतां छ़डो गाथो, ताके तै होरि जो ज़ैना विश्वासे मां कमज़ोरन ठोकर न बने। 3बस्सा हुशार राथ तुस कुन केरतथ, अगर तुश्शो विश्वासी ढ्ला पाप केरते त तैस समझ़ाथ ते अगर तै पापन करां मन फिराए त तैस माफ़ केरा। 4अगर तै एक्‍की दिहैड़ी मां सत्ते बार तेरो पाप केरे त अगर तै सत्ते फेरेईं तीं कां एइतां माफ़ी मग्गे त तू सत्ते फेरेईं तैस माफ़ केरां।”

विश्वास

5प्रेरितेईं प्रभु सेइं ज़ोवं, “हे प्रभु, इश्शी मद्दत केर कि अस होरे भी मज़बूती सेइं विश्वास केरम।” 6प्रभु यीशुए ज़ोवं, “अगर तुश्शो विश्वास शेरीएरे गलेवे बराबर भी भोल्हो त तुस इस तूतेरे बुट्टे जो ज़ोई सकतथ इट्ठां उखड़ ते समुन्दरे मां लग त तै तुश्शो हुक्म मन्नेलो।

एक्‍की दासेरो फर्ज़

7“तुसन मां एरो कौने, ज़ेसेरो नौकर ऊडारां बेंतो भोए या गोरू च़ारतो भोए ते ज़ैखन तै ऊडारे मरां घरे एज्जे त तैसेरो मालिक तैस ज़ोए कि, ‘लूशी बिश ते रोट्टी खा।’ 8या एन न ज़ोए कि मेरी रोट्टी तियार केरथ ते ज़ांतगर अवं खेइ पीं नन्ना ते ज़ांतगर अवं रेज़्ज़ी नन्ना तू मेरी सेवा केरतो रा, तैल्‍ला पत्ती तू भी खा? 9कुन तै एल्हेरेलेइ नौकरेरू अहसान केरेलो कि, तीं तैन कियूं ज़ैन तीं केरनेरे लेई ज़ोवरू थियूं? 10एन्च़रे ज़ैखन तुस एन सब केरेले ज़ैस केरनेरो तुसन हुक्म दित्तोरो थियो, त ज़ोथ कि, ‘असां निकम्मे नौकर आम? असेईं तैन्ने कियूं ज़ैन केरनू चाते थिये।’”

कोढ़ेरे दश रोगी बझ़ाने

11एक्‍की फेरे यीशु त कने तैसेरे चेले यरूशलेम नगरेरे पासे च़लोरे थिये। तैना सामरिया ते गलीले इलाके मांमेइं च़लोरे थिये। 12ज़ैखन तैना एक्‍की ड्लाव्वें मां पुज़ने बाले थिये त तैड़ी दश कोढ़ी मैल्हे ज़ैना दूर खेड़ोरे थिये। 13तैनेईं बड़े ज़ोरे सेइं ज़ोवं, “हे यीशु, हे प्रभु, असन पुड़ दया केर।” 14यीशुए तैन लेहितां ज़ोवं, “यरूशलेम नगरेरे मन्दरे मां गाथ ते अपनो आप याजकन हिराथ, ते सच़्च़े एरू भोवं कि गाते बार बत्तां तैन केरू कोढ़ साफ भोइ जेवं।” 15पन तैन मरां अक कोढ़ी अपनु कोढ़ हेरतां कि, तैसेरू कोढ़ साफ भोवरूए खुशी भोइतां बड़े ज़ोरे सेइं परमेशरेरी तारीफ़ केरतो वापस यीशु कां अव, 16ते यीशुएरे पव्वन पुड़ दोग रेखतां शुक्र लगो केरने। ऐह मैन्हु सामरी थियो। 17यीशुए तैस पुछ़ू, “कुन तैन दश कोढ़ी केरू कोढ़ साफ नईं भोवरू? फिरी तैना कोरहां जे? 18कुन एस गैर यहूदी मैन्हेरे अलावा तैन होरन एत्री हिम्मत न अई, कि गेइतां परमेशरेरी महिमा केरम?” 19तैखन यीशुए तैस ज़ोवं, “खड़ो उठ ते च़लो गा तीं मीं पुड़ विश्वास कियो तांए तू बेज़्झ़ोस।”

परमेशरेरू राज़ एजनू

(मत. 24:23-28,37-41)

20फरीसी लोक यीशु पुछ़ने लगे, “कि परमेशरेरू राज़ केइस एजनूए? यीशुए तैन जुवाब दित्तो कि परमेशरेरू राज़ एरू नईं कि कोई तैस लेही बटे। 21ते ज़ोन कि हेरा इड़ी या उड़ीए एन्च़रे नईं बल्के परमेशरेरू राज़ तुश्शे मझ़ाटे।” 22यीशुए अपने चेलन सेइं ज़ोवं, “तै दिहाड़ी भी एजनीए कि, ज़ेइस तुस परमेशरेरी दिहैड़न मरां अक दिहाड़ी हेरनेरी इच्छा रखेले, ज़ेइस मैन्हेरू मट्ठे यानी अवं वापस एजनोईं, पन तुस न लेही बटेले। 23लोक तुसन सेइं ज़ोले कि, ‘हेरा, मसीह इड़ीए,’ या ‘उड़ीए या हेरा तै इड़ीए!’ पन तुस तैरां न गेइयथ ते न तैन पत्ती न च़ेलथ। 24किजोकि ज़ेन्च़रे बिजली अम्बरे मरां चेमकतां एक्‍की पासेरां होरि पासे च़ली गाचे, तेन्च़रे मैन्हेरू मट्ठू यानी अवं तैस दिहैड़ी बांदो भोल्हो। 25पन ज़रूरीए कि तै पेइले दुख झ़ेल्‍ली ते इस ज़मानेरे लोक तैस घटिया समझ़न। 26ते ज़ेरू इश्शे पूर्वज नूहेरे ज़माने मां भोवरू थियूं, तेरहु मैन्हेरे मट्ठेरे ज़माने मां भी भोल्हु। 27तेइस भी लोक खाते पीते थिये ते ड्लाह भोंते रहते थिये। ते ज़ांतगर नूह किश्ती मां न थियो जेवरो तांतगर सब किछ भोतू राव। ते फिरी हड़ाई अई ते सब किछ खतम भोइ जेवं। 28ते ज़ेरू इश्शे पूर्वज लूतेरे ज़माने मां भोवरू थियूं, कि लोक खाते पीते थिये बुपार केरते, बागां लाते ते घरां बनाने मां मघन थिये। 29पन ज़ैस दिहैड़ी लूत सदोम नगरे मरां बेइर निस्सो त पत्रोवं अम्बरेरां गंधकेरी अग बैखतां सब किछ खतम केरि छ़डू। 30ते मैन्हेरे मट्ठू यानी मेरू वापस एजनू भी अचानक भोल्हु।

31“तैस दिहैड़ी ज़ै लाए पुड़ भोल्हो त तैसेरो माल सबाब अगर घरे मां भोल्हो त तैस नेने तै अन्तर न एज्जे, ते ज़ै ऊडारे मां भोल्हो तै भी वापस न गाए। 32लूतेरी कुआन्शी सेइं कुन भोवं याद रखा। 33ज़ै अपनि जान बच़ानेरी कोशिश केरेलो तै तैस गुवालो, ते ज़ै तैस गुवालो तै तैस बच़ालो। 34अवं तुसन सेइं ज़ोताईं कि तैस राती दूई मैन्हु एक्‍की खट्टी पुड़ झ़ुल्‍लोरे भोल्हे, ते अक नियो गालो, ते दूइयोवं तैड़ी रालो। 35दूई कुआन्शां हिड्लाट पीहती भोल्ही त अक नेनीए ते अक तैड़ी छ़डनियें। 36दूई मैन्हु ऊडारे मां भोल्हे त अक नेनोए ते अक तैड़ी छ़डनोए।” 37एन शुन्तां तैनेईं यीशुए पुछ़ू, “हे प्रभु असन सेइं ज़ो, एन कोड़ि भोल्हु?” यीशुए तैन ज़ोवं, “ज़ैड़ी ज़िग्ग भोते तैड़ी इल्‍लां जम्हां भोइचन।”

Currently Selected:

लूका 17: BHDNT

Highlight

Copy

Compare