यूहन्ना 6
6
यीशु 5000 मड़दन रोट्टी खुवाते
(मत. 14:13-21;मरक. 6:30-44;लूक. 9:10-17)
1एन गल्लन पत्ती यीशु गलीलेरे समुन्दरेरे मतलब तिबिरियुसेरे समुन्दरेरे पार जेव। 2ते अक बड़ी भीड़ तैस पत्ती च़ली, किजोकि ज़ैना चमत्कार तै बिमारन पुड़ हीरतो थियो, ते तैना ठीक भोते थिये ते लोक एन हेरते थिये। 3तैखन यीशु पहाड़े पुड़ च़ेढ़तां अपने चेलन साथी तैड़ी बिश्शो। 4ते यहूदी केरे फ़सहेरू तिहार नेड़ू थियूं।
5ज़ैखन यीशुए अक बड़ी भीड़ अपने पासे एंइती लाही, त तैने फिलिप्पुसे सेइं ज़ोवं, “असां एन केरे लेई रोट्टी कोट्ठां घिन्म?” 6पन तैनी तै गल तैस अज़मानेरे लेई ज़ोई, किजोकि तै एप्पू ज़ानतो थियो कि तै कुन केरेलो। 7फिलिप्पुसे तैस जुवाब दित्तो, “एन केरे लेई 200 दीनारां केरि रोट्टी भी पूरी न भोल्ही कि तैन थोड़ी-थोड़ी मैल्ही गैली।” 8तैसेरे चेलन मरां शमौन पतरसेरे ढ्लाए अन्द्रियासे तैस सेइं ज़ोवं, 9“इड़ी अक मट्ठूए ज़ैस कां जौआं केरि पंच़ रोट्टिन, तै दूई मेछ़लीन, पन एत्रे लोकन जो कुन तैना पूरी भोनिन?” 10यीशुए ज़ोवं, “लोकन बिशाला।” तैड़ी बड़ो घास थियो। तैखन लोक ज़ैना लगभग 5000 मड़द बिश्शोरे थिये। 11तैखन यीशुए रोट्टी ट्लेइ ते शुक्र केरतां बिशने बालन दित्ती, ते तेन्च़रे मेछ़लीन मरां भी ज़ेत्री तैना चातो थियो बेन्टी। 12ज़ैखन तैना खेइतां रज़्ज़े त तैनी अपने चेलन सेइं ज़ोवं, “बच़ोरे टुक्ड़े अकोट्ठे केरा, ताके किछ शारू न गाए।” 13ते तैनेईं अकोट्ठू कियूं, ते जौआं केरे पंच़ रोट्टी केरे टुक्ड़न मरां ज़ैना खाने बालन करां बच़ोरे थिये 12 टोकरे थिये। 14तैखन तै चमत्कार ज़ै तैनी कियोरो थियो लोक हेरतां ज़ोने लगे, “तै नबी ज़ै दुनियाई मां एजनेबालो थियो सच़्च़े ईए।” 15यीशुए एना ज़ैनतां कि एना मीं राज़ो बनानेरे लेई ट्लानो चातन, फिरी तै अकैल्लो पहाड़े पुड़ जेव।
यीशुएरू पैनी पुड़ च़लनू
(मत. 14:22-33;मरक. 6:45-52)
16ज़ैखन ड्लोझ़ भोइ, त तैसेरे चेले समुन्दरेरे बन्ने जे। 17ते किश्ती मां च़ेढ़तां समुन्दरेरे पार कफरनहूम नगरे जो च़ले, तैस वक्ते आंधरू भोवरू थियूं, ते यीशु हेजू तगर तैन कां न थियूं एवरो। 18ते बड़ी तेज़ हवा च़लोरी थी ते समुन्दरे मां छ़ेल्ली उठने लेई। 19ज़ैखन तै लगभग ट्लाई च़ेवरे मील नेड़े अव, त तैनेईं यीशु समुन्दरे पुड़ च़लतो लाव ते किश्तरे नेड़े एइतो लाव ते डरे। 20पन यीशुए तैन सेइं ज़ोवं, “अवं आईं डरा न।” 21ते तै तैस किश्ती मां च़ढ़नेरे लेई तियार भोव, ते तैखने किश्ती तैस ठैरी पुड़ पुज़ी ज़ैड़ी तैना च़लोरे थिये। 22दूइयोवं दिहाड़े तैस मैन्हु केरि भीड़ां ज़ै समुन्दरेरे पार खड़ी थी, इन हेरतां कि एक्की किश्तरे अलावा होरि कोई न थी, यीशु अपने चेलन साथी तैस किश्ती पुड़ न च़ढ़ोरो थियो, पन सिर्फ तैसेरे चेले थिये। 23(तैखन होरि किश्ती तिबिरियुस नगरेरां तैस ठैरी एई, ज़ैड़ी तैनेईं प्रभुएरू शुक्र केरतां रोट्टी खेवरी थी) 24एल्हेरेलेइ ज़ैखन लोकेईं हेरू कि इड़ी न यीशु ते न तैसेरे चेले, ते तैना फिरी तैना निक्की-निक्की किश्तन पुड़ च़ेढ़तां यीशु तोपते कफरनहूम नगरे पुज़्ज़े। 25समुन्दरेरे पार ज़ैखन तैना तैस मैल्हे त तैने ज़ोवं, “हे गुरू, तू इड़ी कताली अव?” 26यीशुए तैन जुवाब दित्तो, “अवं तुसन सेइं सच़-सच़ ज़ोताईं, तुस मीं एल्हेरेलेइ न तोपथ कि तुसेईं चमत्कार लाव, बल्के एल्हेरेलेइ कि रोट्टी खेइतां रज़्ज़े। 27नाश भोने बैली रोट्टरे लेई मेहनत न केरा। पन तैस रोट्टरे लेई मेहनत केरा ज़ै हमेशारी ज़िन्दगी देतीए, ज़ै मैन्हेरू मट्ठू यानी अवं तुसन देइलो, किजोकि बाजी परमेशरे मीं एन्च़रां केरनेरो अधिकार दित्तोरोए।” 28तैनेईं तैस्से सेइं ज़ोवं, “परमेशरेरू कम केरनेरे लेई अस कुन केरम?” 29यीशुए तैन जुवाब दित्तो, “परमेशर तुसन करां एन कम चाते कि तुस तैस पुड़ यानी मीं पुड़ विश्वास केरा ज़ैनी अवं भेज़ोरोईं।” 30तैखन तैनेईं तैस सेइं ज़ोवं, “फिरी तू कुन निशान हिरातस कि अस तैस हेरतां तेरो विश्वास केरम? तू कोन ज़ेरू कम हिरातस? 31इश्शे दादे-पड़दादेईं जंगले मां सुर्गेरी रोट्टी खेइ, ज़ैस जो मन्नो ज़ोतन। ज़ेन्च़रे पवित्रशास्त्रे मां लिखेरूए, तैनी तैन खानेरे लेई सुर्गेरां रोट्टी दित्ती।” 32यीशुए तैन सेइं ज़ोवं, “अवं तुसन सेइं सच़-सच़ ज़ोताईं कि मूसा तुसन तै रोट्टी सुर्गेरां न दित्ती, पन मेरो बाजी तुसन सच़्च़ी रोट्टी सुर्गेरां देते। 33किजोकि ज़ै रोट्टी परमेशर देते, ते तै ईए ज़ै सुर्गेरां एइतां दुनियारे लोकन ज़िन्दगी देतीए।” 34तैखन तैनी तैस्से सेइं ज़ोवं, “हे प्रभु, ऐह रोट्टी असन सुर्गेरां देतो रा।”
35यीशुए तैन सेइं ज़ोवं, “ज़िन्दगरी रोट्टी (ज़ै ज़िन्दगी देनेबाली रोट्टी) अव्वें आईं, ज़ै मीं कां एजते तै कधी निअन्नो न भोल्हो, ते ज़ै मीं पुड़ विश्वास केरेलो तै कधी ट्लिशोरो न भोल्हो। 36पन मीं तुसन सेइं पेइलू ज़ोवरूए, कि तुसेईं अवं लाहोरोईं फिरी भी मीं पुड़ विश्वास न केरथ। 37ज़ैन किछ बाजी मीं देते तैन सब किछ मीं कां एजनूए, ते ज़ै कोई मीं कां एज्जेलो अवं तैस ज़रूर कबूल केरेलो। 38किजोकि अवं अपनि मर्ज़ी नईं, बल्के परमेशरेरी मर्ज़ी पूरी केरनेरे लेई सुर्गेरां एवरोईं ज़ैनी अवं भेज़ोरोईं। 39ईए मेरे बाजेरी मर्ज़ी आहे ज़ैनी अवं भेज़ोरोईं कि ज़ैन किछ तैनी मीं दित्तोरूए तैस मरां अवं किछ न हिरेईं, पन आखरी दिहैड़ी फिरी तैस ज़ींतो केरेलो। 40किजोकि मेरे बाजेरी मर्ज़ी ईए कि ज़ै कोई मट्ठे हेरे ते तैस पुड़ विश्वास केरे, तैस हमेशारी ज़िन्दगी मैल्हे, ते अवं तैस आखरी दिहैड़ी फिरी ज़ींतो केरेलो।”
41एल्हेरेलेइ यहूदी लोक तैस पुड़ कुड़कुड़ाने लगे, किजोकि तैनी ज़ोवरू थियूं, “ज़ै रोट्टी सुर्गेरां एवरीए तै अवं आई।” 42ते तैनेईं ज़ोवं, “कुन एन यूसुफेरू मट्ठू यीशु नईं, ज़ेसेरे अम्मा बाजी अस ज़ानतम? त तै केन्च़रे ज़ोते कि अवं सुर्गेरां एवरोईं?” 43यीशुए तैन जुवाब दित्तो, “एप्पू मांमेइं न कुड़कुड़ाथ। 44कोई मीं कां न एज्जी बटे ज़ांतगर बाजी, ज़ैनी अवं भेज़ोरोईं, तैस मीं कां न आने, ते अवं तैस आखरी दिहैड़ी फिरी ज़ींतो केरेलो। 45नेबी केरे पवित्रशास्त्रे मां एन लिखेरूए, ‘तैना सब परमेशरेरे तरफां शिख्खोरे भोनेन।’ ज़ैनी बाजी करां शुनोरूए त शिख्खोरूए तै मीं कां एइते। 46एसेरो मतलब ई नईं कि केन्चे बाजी लाहोरोए, पन ज़ै परमेशरेरे तरफांए यानी मीं बाजी लाहोरोए। 47अवं तुसन सेइं सच़-सच़ ज़ोताईं ज़ै कोई विश्वास केरते हमेशारी ज़िन्दगी तैसेरीए। 48ज़िन्दगरी रोट्टी (ज़िन्दगी देनेबाली रोट्टी) अव्वें आईं। 49तुश्शे दादे-पड़दादेईं जंगले मां मन्नो खाऊ ते मरे। 50ई तै सुर्गेरी रोट्टीए कि मैन्हु खान ते न मरन। 51ज़िन्दगरी रोट्टी ज़ै सुर्गेरां एवरीए अव्वें आईं। अगर कोई इस रोट्टी मरां खाए, त हमेशा ज़ींतो रालो, ते ज़ैस रोट्टी सेइं दुनियारे लोकन हमेशारी ज़िन्दगी मैलचे, तैन मेरू मासे।”
52एस पुड़ यहूदी लोक एप्पू मांमेइं बेंस केरने लगे, “ई मैन्हु असन अपनु मास केन्च़रे खाने जो देइ बटते?” 53यीशुए तैन सेइं ज़ोवं, “अवं तुसन सेइं सच़-सच़ ज़ोताईं, कि ज़ांतगर तुस मैन्हेरे मट्ठेरू यानी मेरू मास न खाले, ते मेरो खून न पीले, तुसन हमेशारी ज़िन्दगी न मैल्हेली। 54ज़ै मेरू मास खाते ते मेरो खून पीते हमेशारी ज़िन्दगी तैसेरीए ते आखरी दिहैड़ी अवं फिरी तैस ज़ींतो केरेलो। 55किजोकि हकीक्ति मां मेरू मास खानेरी चीज़े ते मेरो खून पीनेरी चीज़े। 56ज़ै मेरू मास खाते ते खून पीते तै मीं मां बनोरो रहते, ते अवं तैस मां। 57ज़ेन्च़रे ज़ींते बाजी अवं भेज़ोरोईं, ते अवं बाजी केरे वजाई ज़ोताईं, तेन्च़रे तै भी ज़ै मीं खालो मेरे वजाई ज़ींतो रालो। 58ज़ै रोट्टी सुर्गेरां एवरीए, तैस रोट्टी ज़ेरि नईं ज़ै तुश्शे दादे-पड़दादेईं खाइ ते बादे मां मरे, पन ज़ै कोई ई रोट्टी खालो तै हमेशा ज़ींतो रालो।” 59इना गल्लां तैनी कफरनहूम नगरेरे एक्की प्राथना घरे मां ज़ोई।
हमेशारे ज़िन्दगरे वचन
60एल्हेरेलेइ तैसेरे चेलन मरां बड़ेईं एन शुन्तां ज़ोवं, “ऐह शिक्षा सकते, एस कौन मेन्नी बटते?” 61यीशु अपने मने मां एना बुझ़तां कि मेरे चेले एस गल्ली पुड़ एप्पू मांमेइं कुड़कुड़ाने लगोरेन, तैन पुछ़ू, “कुन इना गल्लां तुसन मीं पुड़ विश्वास केरने करां रोकतिन?” 62अगर तुस मैन्हेरू मट्ठू यानी अवं ज़ैड़ी पेइलो थियो उबरे (सुर्गे) गातो लाहेले, त कुन भोल्हु? 63परमेशरेरी आत्मा त ज़िन्दगी देनेबालीए, मैन्हु केरि ताकती सेइं किछ न केरोए, ज़ैना गल्लां मीं तुसन सेइं ज़ोई तैना परमेशरेरी आत्मारे तरफां आन ते तैना ज़िन्दगी भी आन। 64पन तुसन मां किछ एरे आन ज़ैना विश्वास न केरन। किजोकि यीशु पेइलो ज़ानतो थियो कि ज़ैना विश्वास न थिये केरते तैना कौन आन, ते तैस कौन ट्लुवालो। 65ते तैनी ज़ोवं, “एल्हेरेलेइ मीं तुसन सेइं ज़ोवरू थियूं, ज़ांतगर बाजी केरे तरफां एन वरदान न मैल्हे तांतगर कोई मीं कां न एज्जी बटे।”
पतरसेरो विश्वास
66एस पुड़ तैसेरे चेलन मरां बड़े उलटे फिरे, ते तैल्ला पत्ती तैस साथी न च़ले। 67तैखन यीशुए 12 चेलन सेइं ज़ोवं, “कुन तुस भी च़लू गानू चातथ?” 68शमौन पतरसे तैस जुवाब दित्तो, “हे प्रभु अस केस कां गाम? हमेशारी ज़िन्दगरी देने बैली गल्लां त तींए कां आन। 69ते असेईं तीं पुड़ विश्वास कियो ते ज़ानू कि तू परमेशरेरो पवित्र मैन्हु आस।” 70यीशुए तैन जुवाब दित्तो, “कुन मीं तुस 12 न च़ुने। फिर भी तुसन मरां अक मैन्हु शैताने।” 71तैने इन तैस शमौन इस्करियोतेरे मट्ठे यहूदा इस्करियोतेरे बारे मां ज़ोवं। हांलाकि तै तैन 12 चेलन मरां अक थियो, ज़ै यीशु ट्लुवांने बालो थियो।
Currently Selected:
यूहन्ना 6: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
